သျှမ်းပြည် လင်းခေးခရိုင် မိုးနဲမြို့နယ်အတွင်းရှိ လောင်းကစားဝိုင်းများသည် ၇ လ ကျော်ကြာ ဖွင့်လှစ်ခဲ့ သော်လည်း ယနေ့ အချိန်အထိ ပိတ်သိမ်းခြင်း မရှိသေးကြောင်း စုံစမ်းသိရသည်။
မိုးနဲမြို့နယ်၊ လွိုင်မြေရပ်ကွက်အတွင်း ဖွင့်လှစ်နေသည့် လောင်းကစားဝိုင်းများသည် လက်ရှိအချိန်တွင် (၃) နေရာ တိုးချဲ့ ဖွင့်လှစ်ထားလျက်ရှိပြီး လောင်းကစားဝိုင်းများ ပိတ်သိမ်းပေးရန် ဒေသခံများက အာဏာပိုင်များထံ တိုင်ကြားခဲ့သော်လည်း အရေးယူ ပိတ်သိမ်းပေးခြင်း မရှိကြောင်း ဒေသခံ အိုက်လော (နာမည်လွှဲ) က ပြောသည်။
“လောင်းကစားဝိုင်း ပိတ်ဖို့ တိုင်တာကတော့ တစ်ကြိမ် နှစ်ကြိမ် မကတော့ဘူး။ ဒါပေမဲ့ အရေးယူ ဆောင်ရွက်ပေးဖို့ နေနေသာသာ သူတို့ ကိုယ်တိုင်က အဲ့လောင်းကစားဝိုင်းတွေမှာ ဝင်ကစားနေတာ၊ စစ်တပ်က ဗိုလ်ကြီးတွေ၊ ရဲတွေ လည်း နေ့တိုင်းနီးပါးလာပြီး ကစားနေကြတာ” ဟု မိုးနဲမြို့ က အိုက်လော (နာမည်လွှဲ) က သျှမ်းသံတော်ဆင့်ကို ပြောသည်။
အဆိုပါ လွိုင်မြေရပ်ကွက်အတွင်း ဖွင့်လှစ်ထားသည့် လောင်းကစားဝိုင်းသည် ဧပြီလအတွင်းမှ စတင်ဖွင့်လှစ်ခဲ့ပြီး မိုးနဲမြို့နယ် ဒေသခံများအပြင် တခြားဒေသများလည်း လာရောက် ဆော့ကစားကြကြောင်း သိရသည်။
လောင်းကစားဝိုင်းများ ဖွင့်လှစ်ရန်အတွက် လောင်းကစားဒိုင်သည် မြို့နယ် အုပ်ချုပ်ရေးမှူး၊ စည်ပင် နှင့် ဒေသအတွင်း အာဏာပိုင်များထံသို့ အခွန်ပေးထားခြင်းဖြစ်ကြောင်း မိုးနဲမြို့မှ အသက် (၃၀) ဝန်းကျင် အမျိုးသားတစ်ဦးက ဆက်ပြောသည်။
“အခွန်ပေးပြီး ဖွင့်ထားလို့၊ တစ်ဖက်ကလည်း အခွန်လက်ခံထားလို့ လောင်းကစားဝိုင်းက မပိတ်တာ၊ ဒီဘက်မှာ တော့ လိုင်းကြေးလို့ ခေါ်တာပေါ့နော်။ အဲ့ဒီ လိုင်းကြေးကို အမြှောက်တပ်၊ တပ်နယ်မှူး၊ စရဖ၊ ထွေအုပ် မြို့နယ်ရဲ တပ်ဖွဲ့မှူး ၊ မြို့နယ်စခန်းမှူး ဒါတွေက လက်ခံပြီး ဖွင့်ခွင့်ပြုထားတာ၊ လောင်းကစားဝိုင်းထဲမှာ ပုံမရိုက်ဖို့လည်း တားမြစ်ထားတယ်” ဟု အသက် (၃၀) ဝန်းကျင် မိုးနဲမြို့ခံ အမျိုးသားက သျှမ်းသံတော်ဆင့် ကို ပြောသည်။
ယင်းကဲ့သို့ ကာလရှည်ကြာ လောင်းကစားဝိုင်း ဖွင့်လှစ်နေသည့်အတွက် မိုးနဲမြို့နယ်အတွင်း မျက်နှာစိမ်းဝင်ထွက် သွားလာမှု များပြားပြီး၊ ခိုးယူလုယက်မှုများကလည်း ပိုမိုများပြားလာကြောင်း အထက်ပါ အမျိုးသားက ဆက်ပြောသည်။
“ရပ်ကွက်ထဲမှာကော ဘုန်းကြီးကျောင်းမှာ ရပ်ထားတဲ့ ဆိုင်ကယ်တွေ မကြာခဏ ပျောက်ကြတယ်၊ ပြီးတော့ မျက်နှာစိမ်းတွေ များလာတော့ ဘယ်သူ့ကို့မှ မယုံရဲတော့တဲ့ထိ ဖြစ်လာတယ်။ ဒါက လောင်းကစားဝိုင်းရဲ့ အကျိုးဆက်ပဲဖြစ်တယ်၊ ဒါကြောင့် လောင်းကစားဝိုင်းတွေကို ပိတ်ပေးစေချင်တာ” ဟု အသက် (၃၀) ဝန်းကျင် အမျိုးသားက ဆက်လက် ပြောဆိုထားသည်။
စစ်တပ်မှ နိုင်ငံတော် အာဏာသိမ်းယူပြီး နောက်ပိုင်းတွင် သျှမ်းပြည်အတွင်း မြို့နယ်အများစု၌ လောင်းကစားဝိုင်းများ၊ အွန်လိုင်းလိမ်လည်မှုများ ပိုမိုပေါများလာသလို နေအိမ် အတွင်းထိ ပြန်ပြေးဆွဲမှုများလည်းရှိပြီး သက်ဆိုင်ရာ အာဏာပိုင်များက ဖမ်းဆီး အရေးယူနိုင်ခြင်း မရှိခဲ့ကြောင်းလည်း ဒေသခံများ၏ ပြောပြချက်အရ သိရသည်။
မိုးနဲမြို့နယ်အတွင်း လှုပ်ရှားသည့် လက်နက်ကိုင် တပ်ဖွဲ့များ အနေဖြင့် စစ်ကောင်စီတပ်အပြင် SSS ပြည်သူ့စစ်တပ်တို့ က သွားလာ လှုပ်ရှားသည့် ဒေသဖြစ်ကြောင်း သိရသည်။
