မြန်မာ – ထိုင်းနယ်စပ်ဒေသဖြစ်သည့် တာချီလိတ်မြို့တွင် အုပ်စုဖွဲ့ပြီး ဆိုင်ခန်းများကို လိုက်လံဖောက်ထွင်းကာ ပစ္စည်းများ ခိုးယူနေကြောင်း စုံစမ်းသိရှိရသည်။
ယခု ရက်ပိုင်းအတွင်း တာချီလိတ်မြို့တွင် ဆိုင်ကယ်တစ်စီး နှင့် နှစ်ယောက်စီး အုပ်စုဖွဲ့က ပြည်သူတချို့ ဆိုင်ခန်းများကို လိုက်လံဖောက်ထွင်းခြင်း၊ ဆိုင်ခန်းရှေ့ ရပ်ထားသည့် ကား၊ ဆိုင်ကယ်များ၏ ဘက်ထရီများကို ခိုးယူခြင်းများ ပြုလုပ်နေကြောင်း ကိုယ်တိုင်ကြုံတွေ့သူ အမျိုးသမီးတစ်ဦး ကပြောသည်။
“ သူခိုး၊ ဓားပြတွေက နေ့တိုင်းလိုလို သောင်းကြမ်းနေတာ။ ဆိုင်ရှေ့မှာ ကားရပ်ထားလည်း မရဘူး၊ ကားထဲက ဘက်ထရီကို ခိုးသွားတယ်။ သူတို့ ခိုးနေတာ ၂၄ နာရီအတွင်း အုပ်စုဖွဲ့ပြီးတော့ ခိုးကြတာ။ အုပ်စုဖွဲ့တစ်ဖွဲ့က ၉ ယောက်လောက်တောင်ရှိတယ် “ ဟု ၎င်း အမျိုးသမီး တစ်ဦးက ပြောသည်။
အဆိုပါ သူခိုး၊ ဓားပြများကို သက်ဆိုင်ရာ အာဏာပိုင်များက ဖမ်းဆီးဆောင်ရွက်ပေးခြင်း မရှိဘဲ ပြည်သူများက စုပေါင်းလိုက်လံ ဖမ်းဆီးပြီး အုပ်ချုပ်ရေးမှူးထံ အပ်ကာ ရိုက်နှက်ပြစ်ဒဏ်ပေးပြီး ပြန်လွတ်ပေးခဲ့သည်။
ထိုသို့ ခိုးဆိုးလုယက်မှုများ နေ့စဉ်ဖြစ်ပွားနေသောကြောင့် လက်ရှိမှာ မည်သူမှ ဖမ်းဆီးအရေးယူဆောင်ရွက်ခြင်း မရှိခြင်းကြောင့် ပြည်သူများသည် လုံခြုံရေးအတွက် ကိုယ်တိုင်ယူနေရကြောင်း သိရသည်။
“သူခိုးတွေ ဖမ်းမိရင် ရွာဥက္ကဌ ကိုဖုန်းဆက်ပြီး လက်ထဲ အပ်ပေးလိုက်တယ်။ ပြီးရင် ပြန်လွတ်ပေးတယ်။ သူခိုးတွေအရမ်းပေါတော့ ဘယ်သူမှ လိုက်မပြောနိုင်တော့ဘူး။ တစ်ခါတလေ ကျွန်မတို့ ပြည်သူတွေ ဖမ်းမိရင် ရိုက်နှက်အပြစ်ဒဏ် ပေးပြီး ပြန်လွတ်ပေးတယ်။ လုံခြုံရေးကတော့ မရှိတော့ဘူး၊ နေ့တိုင်းလိုလို ဖြစ်နေတာပဲ “ ဟု တာချီလိတ် ဒေသခံ အသက် ၃၀ ကျော် အမျိုးသမီးတစ်ဦးက ပြောသည်။
အလားတူ တာချီလိတ်မြို့ ဝိန်းကျောက်ရပ်ကွက် တော်ကော့ပြင် ဘုန်းကြီးကျောင်းဝန်းအတွင်း လောင်းကစားဝိုင်း ဖွင့်လှစ်ပြီး ညစဉ်ညတိုင်း ခိုက်ရန်ဖြစ်ပွားနေကြောင်း သိရသည်။
ပြီးခဲ့သည့် သြဂုတ် ၂၈ ရက်တွင်လည်း တာချီလိတ်မြို့ ဆန်ဆိုင်းရပ်ကွက်အတွင်းရှိ နေအိမ်တစ်လုံးထဲက အမျိုးသမီးနှင့် ကလေးငယ်တစ်ဦးကို အမည်မသိ လူတစ်စုက လက်နက်ကိုင်ဆောင်လာပြီး ပြန်ပေးဆွဲရန် ကြိုးစားခဲ့သည်။
