မြန်မာ – ထိုင်းနယ်စပ်ဒေသ တာချီလိတ်မြို့ ဝိန်းကျောက်ရပ်ကွက်ရှိ ဘုန်းကြီးကျောင်းတွင် ဝါတွင်းကာလအတွင်း လောင်းကစားဝိုင်းများ ပြုလုပ်ပြီး ညတိုင်းခိုက်ရန်ဖြစ်ပွားကာ ဆူညံနေကြောင်း စုံစမ်းသိရသည်။
.
လောင်းကစားဝိုင်းများကို စက်တင်ဘာလ ၅ ရက်မှစ၍ တစ်လကြာ ပြုလုပ်မည်ဖြစ်ပြီး ဘုန်းကြီးကျောင်းရှိ ကျောင်းဂေါပက အဖွဲ့ဝင်နှင့် ပွဲကန်ထရိုက်တို့အကြား နှစ်ဖက်သဘောတူညီမှုရပြီး ည ၇ နာရီမှ မနက် ၂ နာရီအထိ သတ်မှတ်၍ ဖွင့်လှစ်ခဲ့ကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဘုန်းကြီးကျောင်းတဝန်းလုံး ပတ်ချာလည် လောင်းကစားခုံ ၅၀ လောက်ရှိတယ်။ အရှေ့ဘက်မှာတော့ အသံဆူညံနေတဲ့ DJ၊ ဘီယာဆိုင်အကြီးတစ်ဆိုင်နဲ့ စားသောက်ဆိုင် ၅ ဆိုင်လောက် ရှိတယ်။ လောင်းကစား မျိုးစုံတွေပါတော့ ရန်ဖြစ်ပြီး မူးရူးစကားများကြတာလည်း ညတိုင်းလိုလိုပါပဲ “ ဟု ၎င်းအမျိုးသားတစ်ဦးက ပြောသည်။
အဆိုပါ လောင်းကစားဝိုင်းထဲတွင် လေးကောင်ဂျင်၊ ဖိုက်ကျူး၊ ငါးမန်းဂိမ်း၊ ဂုန်းကင်း စသည့် လောင်းကစားဝိုင်း မျိုးစုံ ခုံပေါင်း ၅၀ ကျော်ရှိကြောင်း သိရသည်။
ထို့အပြင် ဝါတွင်းကာလ ဗုဒ္ဓသာဘာဝင်တို့၏ သီတင်းကျွတ်ကာလ ဥပုလ်ဆောက်တည်ကြရာ နေရာ၌ လောင်းကစားဝိုင်း မပြုလုပ်သင့်ကြောင်း တာချီလိတ်မြို့ဒေသခံများက ပြောဆိုနေကြသည်။
“ ဗုဒ္ဓဘာသာဝင်တို့ရဲ့ ဉပုလ် သီလ ဆောက်တည်ကြရမဲ့ ဝါတွင်းကာလမျိုးမှာ အခုလို လောဘဒေါသဖုံးလွှမ်းပြီး မူးယစ်ရမ်းကားနေတဲ့ ပွဲတော်မျိုးကို ဘုန်းကြီးကျောင်းဝင်းအတွင်း မလုပ်သင့်ဘူး “ ဟု တာချီလိတ်မြို့ဒေသခံ အသက် ၃၀ ကျော် အမျိုးသားက ဆိုပြန်သည်။
ထိုလောင်းကစားဝိုင်းများနှင့် ပတ်သက်ပြီး သက်ဆိုင်ရာ အာဏာပိုင်များက အရေးယူဆောင်ရွက်ခြင်း မရှိခဲ့ပေ။
စစ်တပ်က အာဏာသိမ်းပြီးနောက်ပိုင်း တာချီလိတ်မြို့တွင် နယ်စပ်ဖြစ်သည့်အလျောက် လောင်းကစားဝိုင်းများ၊ အွန်လိုင်း လိမ်လည်မှုများ ပိုမိုပေါများလာသလို နေအိမ်အတွင်းထိ ပြန်ပြေးဆွဲမှုများလည်းရှိပြီး သက်ဆိုင်ရာ အာဏာပိုင်များက ဖမ်းဆီးဆောင်ရွက်နိုင်ခြင်း မရှိခဲ့ကြောင်း ဒေသခံများ၏ ပြောပြချက်အရ သိရသည်။
Leave a Comments