သျှမ်းပြည် ကျိုင်းတုံခရိုင်၊ ကျိုင်းတုံမြို့နယ် ကျိုင်းတုံတက္ကသိုလ်သို့ အဝေးသင်တက်ရန် အတွက် ကျောင်းသူ/သားများ၏ ကျောင်းအပ်ခ ငွေကြေးကို တက္ကသိုလ်မှ စာရေးမ ဖြစ်သူက ယူဆောင် ထွက်ပြေးသွားကြောင်း သိရသည်။
.
ယခုလ စက်တင်ဘာလအတွင်း ဖွင့်လှစ်ရန်ရှိသည့် ကျိုင်းတုံ တက္ကသိုလ်မှ အဝေးသင် အတန်းများတွက် ကျောင်းအပ်ခကို ယူဆောင်ထွက်ပြေးခြင်းဖြစ်ကြောင်း တက္ကသိုလ် ကျောင်းသူ နှင့် ဆွေမျိုးတော်စပ် သူတစ်ဦးက သျှမ်းသံတော်ဆင့်ကို ပြောသည်။
“ရွာကနေ ကျောင်းလာတက်ရမယ်ဆိုတော့ ကြိုတင်ကျောင်းအပ်ထား ကြတာပေါ့၊ အဲ့စာရေးမက သူ တာဝန်ယူ အပ်ပေးမယ်၊ စာရွက်စာတန်းတွေကိုလည်း သူပဲ ဖြည့်ပေးမယ်ဆိုလို့ ကျောင်းသား/သူ တွေ ကလည်း သူ့ဆီ ငွေလွှဲပြီး အပ်ကြတာတဲ့၊ ကျောင်းအပ်ခက တစ်ယောက်ကို တစ်သိန်း၊ စာရွက်စာတမ်း ဖြည့်ခက ၅၀၀၀ ကျပ်ကနေ ၇၀၀၀ ကျပ် ယူတာ၊ အခုတော့ ထွက်ပြေးသွားပြီ” ဟု ကျောင်းအပ်ထားသည့် တက္ကသိုလ် ကျောင်းသူ ၏ အဒေါ်ဖြစ်သူက သျှမ်းသံတော်ဆင့်ကို ပြောသည်။
အဆိုပါ ထွက်ပြေးသည့် စာရေးမ မှ တစ်ဆင့် ကျောင်းအပ်မည့် အဝေးသင် တက္ကသိုလ် ကျောင်းသူ/ သားများသည်
စုစုပေါင်း (၃၀) နီးပါး ရှိနေပြီး တစ်ဦးလျှင် ငွေကျပ် တစ်သိန်းငါးထောင်ကျပ် (၁၀၅,၀၀၀) ကျပ် ပေးပို့ထားပြီး ထိုထဲတွင် ပထမနှစ် ကျောင်းသားများ ရှိသလို တတိယနှစ် ကျောင်းသားများလည်း ရှိကြောင်း သိရသည်။
လက်ရှိတွင် အဆိုပါ စာရေးမထံ ကျောင်းအပ်ထားသည့် အဝေးသင် တက္ကသိုလ်ကျောင်းသူ/သားများသည် နောက်တကြိမ် ကျောင်းအပ်ရပြီး ကျောင်းအပ်ခလည်း နောက်တစ်ကြိမ် ပေးဆောင်ရကြောင်း ကျောင်းသူတစ်ဦးက သျှမ်းသံတော်ဆင့်ကို ဆက်ပြောသည်။
“ကျောင်းက ပြန်အပ်ရမှာပေါ့၊ ပိုက်ဆံက နှစ်ခါကုန်သွားတယ်၊ တစ်သိန်းဆိုလည်း တစ်သိန်း တချို့ဆိုရင် ချေးငှားပြီး ကျောင်းကို ပြန်အပ်ကြရတာ၊ ပါမောက္ခကို ပြန်တိုင်ကြပေမဲ့ ဒီကိစ္စမှာ ကျောင်းကလည်း ဘာမှ လုပ်ပေးလို့မရဘူးပြောပါတယ်။ ကျေနပ်လားဆိုရင်တော့ မကျေနပ်ပါဘူး” ဟု အမည်မဖော်လိုသူ ကျိုင်းတုံ တက္ကသိုလ်ကျောင်းသူ တစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ငွေကြေးများ လိမ်လည်ယူသွားသည့် ကျိုင်းတုံ တက္ကသိုလ်က စာရေးမသည် ထွက်ပြေး လွတ်မြောက်နေလျက်ရှိပြီး ကျောင်းသား/သူများကလည်း တရားမျှတစွာဖြင့် ပိုက်ဆံ ပြန်ရလိုကြောင်း ပြောဆိုထားသည်။
Leave a Comments