မြန်မာ – တရုတ်နယ်စပ် သျှမ်းပြည် မူဆယ်မြို့ရှိ (မူဆယ် – နမ့်ခမ်း ကုန်သည်ကြီးများအသင်းရုံး) သို့ တရုတ်ပြည်ဝင်ရန်အတွက် တိုကင်နံပတ်ပေးသည့် နေရာ ပြောင်းရွှေ့ထားကြောင်း စုံစမ်းသိရှိရသည်။
.
အဆိုပါ တိုကင်ပေးသည့်နေရာကို ယမန်နေ့ (စက်တင်ဘာ ၁၆) ရက် နံနက်ပိုင်းမှ စတင်ပြီး လူဝင်မှုကြီးကြပ်ရေးဌာန (လဝက) မှ မူဆယ်- နမ့်ခမ်း ကုန်သည်ကြီးများ အသင်းရုံးသို့ ပြောင်းရွှေ့လိုက်ကြောင်း မူဆယ်ဒေသခံများက ပြောသည်။
“အရင်က တိုကင်နံပတ် ပေးတာ မန်ဝိန်းတံခါး မှာပေးတယ်။ ခုက မူဆယ် – နမ့်ခမ်း ကုန်သည်ကြီးများအသင်းရုံးမှာ ပြောင်းလာတယ်။ သူတို့ အဲ့ဒီကို ပြောင်းရွှေ့လာတော့ တိုကင်သွားယူတဲ့ သူတွေ ၃ ထောင်လောက်မနည်း တန်းစီစောင့်နေတာ တွေ့ရတယ်။ လွယ်တိန်ခမ်း ကနေ တိုကင်နံပတ်ပေးတဲ့ နေရာထိ ကားတွေလည်း ကြပ်နေတာပဲ” ဟု မူဆယ်ဒေသခံ လူငယ်အမျိုးသားတစ်ဦး ကပြောသည်။
ပြီးခဲ့သည့် စက်တင်ဘာ (၁၃) ရက်မှ စတင်ပြီး လူဝင်မှု ကြီးကြပ်ရေးဌာန (လဝက) မှ တိုကင်နံပတ်ပေးရန်အတွက် မန်ဝိန်းတံခါးတွင်နေရာ စီစဥ်ထားသော်လည်း လာရောက် တန်းစီသူများပြားသည့်အတွက် ယခု နေရာသို့ ပြောင်းရွှေ့လာရခြင်း ဖြစ်နိုင်ကြောင်း ဒေသခံများက ပြောဆိုကြသည်။
“အရင်က သူတို့ တိုကင်နံပတ် ပေးတဲ့ မန်ဝိန်းတံခါးမှာက နေရာ ကျဥ်းပြီး လူတွေများတဲ့အတွက် သူတို့ ဒီ ကုန်သည်ကြီးများ အသင်းမှာ ပြောင်းရွှေ့လာတယ်လို့ ကျနော်တို့တော့ ထင်တယ်” ဟု မူဆယ်ဒေသခံ လူငယ်အမျိုးသား တစ်ဦးကပြောသည်။
ပြီးခဲ့သည့် ရက်ပိုင်းက တရုတ်ပြည်ဝင်ရန်အတွက် နှစ်နိုင်ငံ ဝင်ထွက်ခွင့် တစ်ခါသုံးကတ် TBP ကို မူဆယ်မြို့ရှိ နန်းတော်ဂိတ် နှင့် ဆင်ဖြူဂိတ်တွင် ပြုလုပ်သူ များပြားလာသည့်အတွက် တစ်ရက်လျှင် တိုကင်နံပတ် ၂၀၀ အထိသာ ပြုလုပ်ပေးတော့ကြောင်း သိရသည်။
ကိုဗစ် – ၁၉ ရောဂါဖြစ်ပွားမှုကြောင့် ပိတ်ထားသည့် တရုတ်နယ်စပ်ဂိတ်များကို ပြီးခဲ့သည့် စက်တင်ဘာလ ၄ ရက်မှစတင်ပြီး ပြန်လည်ဖွင့်လှစ်ခဲ့ရာ တစ်ခါသုံးကတ် TBP သွားရောက်လုပ်ကိုင်သူများ နေ့စဉ်နီးပါး စည်ကားနေလျက်ရှိသည်။
ထိုသို့ သွားရောက်လုပ်ကိုင်သူများသည် တရုတ်ပြည်အတွင်း သွားရောက်လုပ်ကိုင်သူများ ဖြစ်ကြသည်။
Leave a Comments