Wednesday, July 24, 2024

မိုးဗြဲမြို့ပေါ် တပ်စွဲထားသည့် စစ်ကောင်စီမှ မြေမြှုပ်မိုင်းများ ထောင်ထားခြင်းကြောင့် စစ်ရှောင်များ နေရာပြန်လည်ချထားရေး မရသေး

Must read

သျှမ်း – ကရင်နီ (ကယား) နယ်စပ်ဒေသ မိုးဗြဲမြို့ပေါ်တွင် ယနေ့အချိန်ထိ စစ်ကောင်စီမှ တပ်စွဲနေထိုင်လျက်ရှိပြီး မြေမြှုပ်မိုင်းများ ထောင်ထားခြင်းကြောင့် ထွက်ပြေးတိမ်းရှောင်ရသည့် စစ်ရှောင်များ နေရာပြန်လည် မချနိုင်မသေးကြောင်း သတင်းရရှိသည်။

.

စစ်ကောင်စီသည် မိုးဗြဲမြို့ပေါ်တွင် တပ်စွဲနေထိုင်လာရာ လနှင့်ချီ အချိန်ကြာမြင့်ပြီဖြစ်ကြောင်း၊ ၎င်းတို့၏ လုံခြုံရေးအတွက် မြေမြှုပ်မိုင်း အများအပြား ထောင်ထားခြင်း ပြုလုပ်နေကြောင်း တော်လှန်ရေးသတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။

“ မိုးဗြဲမြို့ပေါ်မှာ တပ်စွဲထားတဲ့ စစ်ကောင်စီတပ်က အခုထိပြန်မထွက်သေးဘူး။ ရှိနေတုန်းပဲ။ အဲ့ဒီမှာနေပြီး ပြည်သူတွေဝင်လို့ မရအောင်၊ တော်လှန်ရေးတပ်တွေ ဝင်လို့မရအောင် မိုင်းတွေလည်း အများကြီး ထောင်ထားတယ်။ ဖယ်ခုံအနောက်ဖက်ခြမ်းမှာလည်း သူတို့တပ်စွဲထားတဲ့နေရာဆို မြေမြှုပ်မိုင်း အကုန်ထောင်ထားပြီး ပြန်ထွက်သွားတာ “ ဟု ၎င်းက ပြောသည်။

ပြီးခဲ့သည့် ဇွန်လ ဒုတိယပတ်အတွင်း တိုက်ပွဲပြင်းထန်စွာ ဖြစ်ပွားခဲ့ပြီးနောက်ပိုင်း မိုးဗြဲမြို့ပေါ်တွင် စစ်ရေးငြိမ်သက်လာသည်မှာ ၄ လဝန်းကျင် ရှိနေပြီ ဖြစ်ကြောင်း သိရသည်။

သို့သော်လည်း စစ်ကောင်စီတပ်သည် မကြာခဏ လက်နက်ကြီး ရမ်းသမ်းပစ်ခတ်မှု၊ ပြည်သူများ စိုးရိမ်ကြောက်လန့်အောင် လေယာဉ်ဖြင့် ဗုံးကြဲတိုက်ခိုက်နေလျက်ရှိသည်။

စက်တင်ဘာလ ၇ ရက်နှင့် ၈ ရက် နှစ်ရက်ဆက်တိုက်အတွင်း ဖယ်ခုံမြို့နယ် ဆောင်းဖွေးဆေးရုံအနီးကို စစ်ကောင်စီက တိုက်လေယာဉ်ဖြင့် ၅၀၀ ပေါင် ဗုံးကြဲတိုက်ခိုက်ခဲ့ကြောင်း စစ်ရှောင်ကော်မတီဝင် တစ်ဦးက ပြောသည်။

“တိုက်ပွဲက ငြိမ်ပေမယ့် ပြည်သူတွေကြောက်အောင် သူတို့ ခြိမ်းခြောက်တယ်။ ဆေးရုံကို တစ်ခါလာကြဲ သေးတယ်။ ဆေးရုံပြန်လည်ပတ်ဖို့အတွက် လုပ်နေချိန်မှာ ဆေးရုံအနီးလာကြဲသွားတာ။ ပြောင်းခင်းတွေ ပျက်စီးသွားတာ။ အဒေါ်ကြီးတစ်ယောက် လက်ထိမှန်ပြီး စိုးရိမ်ရသေးတယ် “ ဟု ၎င်း စစ်ရှောင်ကော်မတီ ဝင်က ပြောသည်။

လက်ရှိမှာ သျှမ်း – ကရင်နီ (ကယား) နယ်စပ်ဒေသ တလျောက်တွင် နှစ်ဖက်တပ်ဖွဲ့ စစ်ရေးတင်းမာနေလျက်ရှိသလို စစ်ကောင်စီဘက်မှ စစ်ကြောင်းထိုးမှု ဆက်လက်ပြုလုပ်လာပါက အချိန်မရွေး တိုက်ပွဲ ပြန်လည်ဖြစ်ပွားနိုင်ကြောင်း သိရသည်။

Leave a Comments

- Advertisement -spot_img

Latest article