စစ်အာဏာသိမ်းပြီး ၂ နှစ်ကျော်ကာလ အတွင်း အာဏာသိမ်းခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် သျှမ်းပြည် မြောက်ပိုင်း အတွင်းရှိ ပြည်သူ့စစ်ဌာနေတပ်ဖွဲ့ဝင်များ နှင့် စက်တင်ဘာ ၁၀ ရက် နံနက်ပိုင်းတွင် အရှေ့မြောက်ပိုင်း စစ်ဌာနချုပ် ရွှေလီရတနာခန်းမတွင် တွေ့ဆုံဆွေးနွေးခဲ့ကြောင်း သတင်းရရှိသည်။

.

အဆိုပါ တွေ့ဆုံမှုတွင် သျှမ်းပြည်မြောက်ပိုင်းသည် အိမ်နီးချင်း တရုတ်နိုင်ငံ နှင့် ထိစပ်လျက်ရှိပြီး ပို့ကုန်၊ သွင်းကုန်များကို နယ်စပ် ကုန်သွယ်ရေးမှ တစ်ဆင့် ကုန်သွယ်ရေးဆောင်ရွက်လျက်ရှိသဖြင့် နိုင်ငံရေး၊ စီးပွားရေး အရ အရေးကြီးသော ဒေသဖြစ်ကြောင်း၊ ဒေသတွင်း ထွက်ရှိသည့် ထုတ်ကုန်ပစ္စည်းများကို ပြည်ပသို့ များများ တင်ပို့နိုင်ရန်အတွက် ထုတ်ကုန် ပစ္စည်းများ ပိုမို ထုတ်လုပ်နိုင်ရန် နှင့် နယ်စပ်ဒေသ တည်ငြိမ်အေးချမ်းရန် အတွက် ပြည်သူ့စစ်ဌာနေ တပ်ဖွဲ့ဝင်များကို အာဏာသိမ်း ခေါင်းဆောင်က အမှာစကားပြောကြားရာတွင် ထည့်သွင်းပြောဆိုခဲ့သည်။

ဆက်လက်ပြီး ပြည်သူ့စစ်ဌာနေတပ်ဖွဲ့ဝင်များသည် နိုင်ငံတော် လုံခြုံရေး အရ အင်အားဖြည့်ပေးနေသည့် အင်အားစု တစ်ရပ်ဖြစ်ပြီး၊ နယ်မြေတည်ငြိမ်အေးချမ်းအောင် တာဝန်ထမ်းဆောင်နေသည့် အဖွဲ့များဖြစ်သည့်အတွက် လေးစား အသိအမှတ် ပြုကြောင်းလည်း အာဏာသိမ်း ခေါင်းဆောင်က ဆက်လက်ပြောသည်။

အာဏာသိမ်းခေါင်းဆောင် နှင့် တွေ့ဆုံခဲ့သည့် ပြည်သူ့စစ်ဌာနေ တပ်ဖွဲ့များမှာ နမ့်ခမ်းမြို့မ ပြည်သူ့စစ်ခေါင်းဆောင် ဦးအိုက်ဆမ်၊ ပန်းဆေးပြည်သူ့စစ် ခေါင်းဆောင် ဦးကျော်မြင့်၊ မန်ပန် ပြည်သူ့စစ်ခေါင်းဆောင် ဦးစိုင်းမွန်း၊ စိန်ကျော့ ပြည်သူ့စစ်ခေါင်းဆောင် ဦးလွယ်မောင်၊ မုံးစီးပြည်သူ့စစ်ခေါင်းဆောင် ဦးစိုင်းမွန်း နှင့် ထင်ပါကျိုင်း ပြည်သူ့စစ် ခေါင်းဆောင် ဦးခင်မောင်လွင် တို့ တက်ရောက်ခဲ့သည်။

စစ်အာဏာသိမ်းခေါင်းဆောင် အနေဖြင့် သျှမ်းပြည်မြောက်ပိုင်း ပြည်သူ့စစ် ဌာနတပ်ဖွဲ့ဝင်များကို ခေါ်တွေ့ဆုံခြင်းသည် အလွန်ပင် စိတ်ဝင်စားစရာဖြစ်ကြောင်း၊ ပြည်သူ့စစ်များသည် စစ်ကောင်စီရဲ့ လက်ကိုင်တုတ်ဖြစ်တဲ့အလျောက် ယခုလည်း ထိုပြည်သူ့စစ်တပ်ဖွဲ့များကို အသုံးချရန် အတွက် ခေါ်ယူခြင်းသာ ဖြစ်ကြောင်း မူဆယ်မြို့ ဒေသခံများက ပြောဆိုကြသည်။

“ပြည်သူ့စစ်ဆိုတာ စစ်တပ်ရဲ့ လက်အောက်ကပဲလေ။ ဒီဒေသမှာ ပြည်သူ့စစ်တွေ ကောင်းလားဆိုးလားဆိုတာ လူတိုင်းသိတယ်။ စစ်တပ် အလိုကျနေတာ။ ပြည်သူတွေ ကောင်းကျိုး ပေးတဲ့အဖွဲ့မှ မဟုတ်ဘူး။ တရားဝင် လက်မှတ်ရ ရာဇာဝတ်ဂိုဏ်းတွေပါပဲ” ဟု မူဆယ်မြို့ အသက် ၃၅ နှစ်အရွယ် အမျိုးသား တစ်ဦးက သျှမ်းသံတော်ဆင့်ကို ပြောသည်။

အလားတူပင် သျှမ်းပြည် မြောက်ပိုင်းတွင် ကျင်လည် ကျက်စားနေသည့် ပြည်သူ့စစ် ဌာနေတပ်ဖွဲ့ဝင်များသည် မူးယစ်ဆေးဝါးကို တရားဝင်ရောင်းချခြင်း၊ လောင်းကစားကို တရားဝင် ဖွင့်လှစ်ခြင်းတွင် ပါဝင်ပတ်သက်မှုများရှိ နေကြသည်။