သျှမ်းပြည် မူဆယ်ခရိုင် မူဆယ်မြို့ပေါ် ဟိုနားရပ်ကွက်သို့ ရောက်ရှိနေသည့် စစ်ဘေးရှောင်များသည် စိုးရိမ်စိတ်ဖြင့် နေရပ်သို့ ပြန်သွားကြောင်း စုံစမ်းသိရသည်။

.

စစ်ကောင်စီတပ် နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ သြဂုတ်လနှောင်းပိုင်းအတွင်း စယ်လန့်ကျေးရွာအနီး တိုက်ပွဲဖြစ်ပွားခဲ့မှုကြောင့် စစ်ရှောင် (၂၀၀) ကျော်သည် ဟိုနားရပ်ကွက်ရှိ ဘုန်းကြီးကျောင်းသို့ ရောက်ရှိလာခြင်း ဖြစ်သည်။

ယမန်နေ့ (စက်တင်ဘာလ ၇) ရက်တွင် ဟိုနားရောက် စစ်ဘေးရှောင် ၂၀၀ ကျော်သည် နေအိမ်အတွက် စိုးရိမ်ပူပန်သဖြင့် လုံခြုံရေး စိုးရိမ်စိတ်ရှိနေသည့်ကြား နေရပ်ပြန်သွားကြကြောင်း ဒေသအတွင်း ပရဟိတ အသင်းဝင် တစ်ဦးက သျှမ်းသံတော်ဆင့်ကို ပြောသည်။

“မနေ့က သူတို့ ပစ္စည်းတွေ သိမ်းပြီး ဟိုနားကျောင်းကနေ ပြန်သွားကြပြီ၊ စိုးရိမ်စိတ်ကတော့ ရှိတာပေါ့နော်။ အခုထိ စစ်တပ်ရော TNLA ရော ရွာထဲမှာ ရှိနေကြတာဆိုတော့ တိုက်ပွဲက အချိန်မရွေး ဖြစ်နိုင်တယ်။ ဒါပေမဲ့ စစ်ရှောင်တွေက အိမ်ကိုပစ်ထားတာ ကြာလို့ စိတ်ပူလို့တဲ့၊ အဲ့ကြောင့် စိုးရိမ်စိတ် ကြားက နေရပ်ပြန်သွားကြတာ” ဟု ပရဟိတ အသင်းဝင် တစ်ဦးက သျှမ်းသံတော်ဆင့်ကို ပြောသည်။

ဟိုနားရောက် စစ်ဘေးရှောင်များသည် စယ်လန့်ကျေးရွာအုပ်စုမှ နမ့်ကတ်ကျေးရွာ၊ မိုက်ဆက်ကျေးရွာ (ဝၢၼ်ႈမႆ့သၵ်း) နှင့် စယ်လန့်ကျေးရွာမှ ဒေသခံများဖြစ်ကြပြီး စုစုပေါင်း ၂၀၀ ကျော် ရှိကြောင်းလည်း သိရသည်။

စစ်ရှောင်ရောက်ရှိလာစဥ် ကာလအတွင်းတွင် စားဝတ်နေရေး နှင့် နေရာထိုင်ခင်းအတွက် မူဆယ်မြို့နယ် အတွင်းရှိ ပရဟိတလူမှုကူညီရေး အသင်းများ စုပေါင်း၍ သော်လည်းကောင်း၊ အနယ်နယ် အရပ်ရပ်မှ ကူညီထောက်ပံ့မှု ဖြင့် သော်လည်းကောင်း ကူညီဆောင်ရွက်ပေးခဲ့ ကြောင်းလည်း သိရသည်။

လက်ရှိတွင် ဟိုနားကျေးရွာမှ စစ်ရှောင်များ အပြင် မူဆယ်မြို့ပေါ် ရပ်ကွက်များသို့ စစ်ရှောင်ကြသည့် စယ်လန့်ဒေသခံ အများစုကလည်း နေရပ်သို့ အသီးသီး ပြန်သွားကြကြောင်းလည်း မူဆယ်မြို့ပေါ် စစ်ရှောင် ကူညီပေးသူ တစ်ဦးက သျှမ်းသံတော်ဆင့်ကို ပြောသည်။

“မူဆယ်မြို့ပေါ်က စွမ်စော် ရပ်ကွက်၊ တင်းလုံရပ်ကွက် ၊ ပန်ခမ်းရွာ တို့က အမျိုးတွေဆီကို စစ်ရှောင်သွားကြတဲ့ အများစုကလည်း နေရပ်ပြန်ကြပြီ။ တိုက်ပွဲသံတွေလည်း မကြားရတော့လို့ ပြန်သွားကြတာ” ဟု မူဆယ်မြို့ပေါ် စစ်ရှောင် ကူညီပေးသူ တစ်ဦးက သျှမ်းသံတော်ဆင့်ကို ပြောသည်။

အာဏာသိမ်း စစ်ကောင်စီတပ် နှင့် TNLA တပ်တို့သည် မူဆယ်မြို့နယ်အတွင်း ထိတွေ့တိုက်ပွဲ ငြိမ်သက် သွားပေမဲ့ သိန္နီမြို့နယ် ၊ ကွတ်ခိုင်မြို့နယ် အနီးပတ်ဝန်းကျင်တွင် ထိတွေ့တိုက်ပွဲများ၊ စစ်ရေးတင်းမာမှုများက ဆက်လက်ရှိနေကြောင်း ဒေသခံများထံမှ သတင်းသိရသည်။

စစ်ကောင်စီတပ် နှင့် TNLA တပ်တို့အကြား ထိတွေ့တိုက်ပွဲတွင် နှစ်ဖက်တပ်သားများ ထိခိုက်ကျဆုံးမှု ရှိသည့်အပြင် အရပ်သားနေအိမ်များ၊ အဆောက်အအုံများလည်း ထိခိုက်ပျက်စီးမှု ရှိနေကြောင်းလည်း သိရသည်။