သျှမ်းပြည် လားရှိုးခရိုင် သိန္နီမြို့နယ် နားဆော့ကျေးရွာအုပ်စုတွင်း တိုက်ပွဲ ဖြစ်ပွားပြီးနောက် စစ်ကောင်စီ တပ်သားများသည် အရပ်သားပိုင် ကုန်စုံဆိုင်ထဲဝင်ပြီး ကုန်ပစ္စည်းများ နှင့် ပိုက်ဆံများ လုယူသွား ကြောင်း သိရသည်။

.

ယမန်နေ့ (စက်တင်ဘာလ ၇) ရက် ညနေပိုင်း ၃ နာရီဝန်းကျင် သိန္နီမြို့နယ် နားဆော့ကျေးရွာအုပ်စု၊ နားချက် ကျေးရွာ (ဝၢၼ်ႈၼႃးၶႅၵ်း) တွင် စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တပ်တို့ ထိတွေ့တိုက်ပွဲ ဖြစ်ပွားခဲ့ခြင်း ဖြစ်ကြောင်း သိရသည်။

“တိုက်ပွဲက ပန်ခမ်းရွာကန နားချက်ရွာရောက်သွားတဲ့ အချိန်မှာ ပစ်ခတ်သံလည်း ငြိမ်သွားတယ်၊ တိုက်ပွဲငြိမ်သွားတော့ စစ်ကောင်စီ စစ်ကားက နားချက်ရွာထဲက ကုန်စုံဆိုင်ထဲ ဝင်ပြီး အဲ့ဆိုင်ထဲက မုန့်တွေ၊ ခေါက်ဆွဲခြောက်တွေ၊ ငါးသေတ္တာတွေ ၊ အံဆွဲထဲက ပိုက်ဆံတွေ အကုန်လုံးလည်း ယူသွားတယ်” ဟု ၎င်း သတင်းများကိုသိရှိသည့် အမျိုးသမီး တစ်ဦးက သျှမ်းသံတော်ဆင့်ကို ပြောသည်။

ထို့အပြင် စစ်ကောင်စီဘက်မှ လက်နက်ကြီး/လက်နက်ငယ်များဖြင့် ဦးတည်ချက်မရှိ ထပ်မံ ရမ်းသမ်းပစ်ခတ်မှုများကြောင့် နားချက်ကျေးရွာမှ ကုန်စုံဆိုင်ရှိ နံရံမှာ ကျည်ဆန်ထိမှန်သည့်အပြင် တခြား နေအိမ်နှစ်လုံးထက်မနည်းလည်း လက်နက်ကျည် ထိမှန်ပျက်စီးကြောင်း သိရသည်။

“တချို့က ဆိုင်ထဲဝင်လုနေတဲ့ အချိန် တချို့က လက်နက်ကြီး/ငယ်နဲ့ ရမ်းသမ်း ပစ်ခတ်နေကြတာပေါ့၊ အဲ့မှာ သူတို့ဝင်လုတဲ့ ကုန်စုံဆိုင်ရဲ့ နံရံရော၊ ရွာထဲက နောက်ထပ် အိမ်နှစ်လုံးရော သေနတ်ကျည်တွေ ထိမှန်ပျက်စီးတာ ရှိတယ်” ဟု ၎င်း အမျိုးသမီးက ဆိုပြန်သည်။

ယင်းကဲ့သို့ ထိတွေ့ တိုက်ပွဲဖြစ်ပွားနေစဥ်မှာလည်း မူဆယ် – ကွတ်ခိုင် – လားရှိုး မောင်းနှင်သည့် ကားသမားများလည်း အဆိုပါ တိုက်ပွဲ ဖြစ်ပွားရာ အနီးတွင် နာရီဝက်နီးပါး ယာဥ်များရပ်နား ရကြောင်းလည်း သိရသည်။

အဆိုပါ ထိတွေ့တိုက်ပွဲကြား နှစ်ဖက်တပ်ဖွဲ့များ၏ ထိခိုက်ကျဆုံးမှုများကို သျှမ်းသံတော်ဆင့်မှ ဆက်လက် စုံစမ်းနေဆဲ ဖြစ်သည်။

သိန္နီမြို့နယ်အတွင်း သွားလာလှုပ်ရှားသည့် လက်နက်ကိုင်တပ်ဖွဲ့များ အနေဖြင့် စစ်ကောင်စီတပ်ဖွဲ့ အပြင်၊ ပြည်သူ့စစ်တပ်ဖွဲ့များ၊ TNLA တပ်ဖွဲ့၊ KIA တပ်ဖွဲ့၊ MNDAA တပ်ဖွဲ့ နှင့် SSPP တပ်ဖွဲ့တို့ ရှိနေကြောင်းလည်း သိရသည်။