သျှမ်းပြည် တောင်ကြီးခရိုင်၊ ညောင်ရွှေမြို့နယ်ရှိ တောင်လေးလုံး အကျဥ်းထောင်မှ အကျဥ်းသား အချို့ကို ထောင်ပိုင် တာဝန်ရှိသူများမှ နေရာအပြောင်းအရွှေ့ဖြင့် နေရာအသီးသီးသို့ ပို့ဆောင် နေကြောင်း စုံစမ်းသိရသည်။
.
နိုင်/ကျဥ်းများကို ထောင်ပြောင်းရွှေ့လုပ်ခြင်း နှင့် ပတ်သက်ပြီး ပြီးခဲ့သည့် မတ်လ အတွင်းမှ စတင်ကာ လက်ရှိ စက်တင်ဘာလ အထိ အကန့်အသတ် ဦးရေဖြင့် ပို့ဆောင် နေခြင်းဖြစ်ကြောင်း ဖြစ်စဥ်ကို သိရှိသူ ရှေ့နေ တစ်ဦးက သျှမ်းသံတော်ဆင့်ကို ပြောသည်။
“မတ်လထဲမှာ တောင်လေးလုံးက ထောင်ဖောက်မှု ဖြစ်ခဲ့တယ်လေ။ အဲ့ဒီထောင် ဖောက်မှု မဖြစ်ခင် ဒီက နိုင်/ကျဥ်း တစ်သုတ်ကို အင်းစိန်ထောင်ပို့ ခဲ့ဖူးတယ်။ ထောင်ဖောက်မှု ဖြစ်ပြီးတဲ့နောက် အင်းစိန် ထောင်ရော၊ သာယာဝတီရော၊ အိုးဘိုထောင် စတဲ့နေရာတွေကို ဦးရေအကန့်အသတ်နဲ့ တစ်သုတ်ပြီး တစ်သုတ်ပို့တာ” ဟု ဖြစ်စဥ်ကို သိရှိသည့် ရှေ့နေ တစ်ဦးက သျှမ်းသံတော်ဆင့်ကို ပြောသည်။
ထို့အပြင် နိုင်/ကျဥ်း မဟုတ်သည့် တခြားပုဒ်မဖြင့် ဖမ်းဆီးခံထားရသည့် တောင်လေးလုံးမှ အကျဥ်းကျ နေသူများကိုလည်း နာမည်ကြီး ရဲစခန်းများထံသို့ ပို့ဆောင်ခြင်း ခံရကြောင်းလည်း အထက်ပါ ရှေ့နေက ဆက်ပြောသည်။
လက်ရှိ တောင်လေးလုံးမှ မန္တလေး အိုးဘိုထောင်သို့ ပို့ဆောင်ခြင်း ခံရသည့် နိုင်/ကျဥ်းများထဲမှ ကိုခိုင်မြင့်ထွန်း (ခ) ရွှေလင်းသစ် တစ်ဦးလည်း အပါအဝင်ဖြစ်ပြီး တခြား နိုင်/ကျဥ်းများလည်း ပါဝင်ကြောင်း နိုင်/ကျဥ်း မိသားစုဝင် တစ်ဦးက သျှမ်းသံတော်ဆင့်ကို ပြောသည်။
“မော်စီး (ရွှေ့လင်းသစ်) ကတော့ တစ်ဦးအပါအဝင်ပေါ့။ တခြား နိုင်/ကျဥ်းတွေကိုလည်း စာပို့ အကြောင်းကြားတာ ရှိတယ်။ တချို့ကျတော့လည်း လူကြုံ အကြောင်းကြားတာမျိုးပေါ့။ မော်စီး ကကျတော့ သူ့အမှုက ၁၀ နှစ် ချမှတ်ခံထားရတယ်လေ။ သူ နဲ့ အတူ ပြောင်းခံရတဲ့ တခြားသူတွေက ဘယ်သူတွေလဲ ဆိုတာတော့ မသေချာဘူး” ဟု နိုင်/ကျဥ်းမိသားစုဝင် တစ်ဦးက သျှမ်းသံတော်ဆင့်ကို ပြောသည်။
ကိုခိုင်မြင့်ထွန်း (ခ) မော်စီး (ခ) ရွှေလင်းသစ် သည် သျှမ်းပြည် အခြေစိုက် သတင်းဌာန တစ်ခုမှ သတင်းထောက်ဟောင်း တစ်ဦးဖြစ်ပြီး တောင်ကြီးမြို့နေအိမ်၌ ရှိနေစဥ်တွင် အကြမ်းဖက်မှု တိုက်ဖျက်ရေး ဥပဒေပုဒ်မ – ၅၁ (ဂ) ဖြင့် အမှုဖွင့် တရားစွဲဆိုကာ ဖမ်းဆီးခံရခြင်း ဖြစ်သည်။
ပြီးခဲ့သည့် ၂၀၂၂ ခုနှစ်၊ ဧပြီလ (၅) ရက်တွင် ထောင်ဒဏ် (၁၀) နှစ်ကျခံစေရန် အမိန့်ချမှတ်ခံရခြင်း ဖြစ်ပြီး လက်ရှိတွင် မန္တလေးတိုင်းဒေသကြီးရှိ အိုးဘိုထောင်သို့ ပြောင်းရွှေ့ခံရခြင်းဖြစ်ကြောင်းလည်း သိရသည်။
နိုင်ငံရေး အကျဉ်းသားများ ကူညီစောင့်ရှောက်ရေးအသင်း (AAPP) ၏ စက်တင်ဘာလ (၆) ရက်နေ့ ထုတ်ပြန်ချက် အရ စစ်အာဏာရှင် ဆန့်ကျင်ရေးတွင် ကျဆုံးသူ စုစုပေါင်း (၄,၀၄၇) ဦး၊ ဖမ်းဆီးခံခဲ့ရသူ စုစုပေါင်း (၁၉,၄၂၄) ဦးရှိနေပြီး (၇,၂၆၂) ဦးက ထောင်ဒဏ်ချမှတ်ခံရကြောင်း သိရသည်။
