သျှမ်းပြည် ကွတ်ခိုင်မြို့နယ် နမ့်ဖတ်ကာ ကျေးရွာတွင် စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေးတပ်မတော် (TNLA) တို့ကြား တိုက်ပွဲဖြစ်ပွားပြီး အမျိုးသမီးငယ်တဦး လက်နက်ကြီး ထိမှန်သေဆုံးခဲ့ကာ ကလေးငယ် (၃) ဦး ထိခိုက်ဒဏ်ရာ ရရှိခဲ့ကြောင်း သတင်းရရှိသည်။

.

ယမန်နေ့ (သြဂုတ် ၃၀) ရက်တွင် စစ်ကောင်စီ နှင့် TNLA တို့ နှစ်ဘက်တိုက်ပွဲကြောင့် ကွတ်ခိုင်မြို့နယ် နမ့်ဖတ်ကာမှ အမှတ် (၁) ၊ (၂) ရပ်ကွက် နှင့် ဟိုပုံရပ်ကွက်အတွင်း လက်နက်ကြီး ကျရောက် ပေါက်ကွဲခဲ့ပြီး အသက် (၁၆) နှစ်အရွယ် အမျိုးသမီးငယ် တဦး သေဆုံးပြီး၊ ကလေး ၃ ဦးက ဒဏ်ရာရကြောင်း ကွတ်ခိုင်မြို့ အမျိုးသမီးအရေး လှုပ်ရှားသူ တစ်ဦးက သျှမ်းသံတော်ဆင့် ကို ပြောသည်။

“ရပ်ကွက် ၂ မှာ ၁၃ နှစ်အရွယ် ကောင်မလေး ထိတယ်။ ရပ်ကွက် ၁ မှာ ၁၉ နှစ်အရွယ် ကောင်လေး ထိတယ်။ ဟိုပုံမှာကြတော့ ၁၃ နှစ်ကောင်လေး နဲ့ ၁၆ နှစ်ရွယ် ကောင်မလေးကို ထိတယ်။ ၁၆ နှစ်အရွယ်ကောင်မလေး ကတော့ သေသွားတယ်” ဟု ကွတ်ခိုင်မြို့ အမျိုးသမီး အရေး လှုပ်ရှားသူ တစ်ဦးက သျှမ်းသံတော်ဆင့်ကို ပြောသည်။

ယမန်နေ့ (သြဂုတ် ၃၀) ရက် နံနက်ပိုင်း ၁၀ နာရီ ဝန်းကျင်တွင် TNLA ယူနီဖောင်းဝတ် လူတစ်စုက (၁၂၃) တပ်ရှေ့ လက်နက်ငယ်များဖြင့် လာရောက်ပစ်ခတ်ပြီးနောက် စစ်ကောင်စီတပ်က လက်နက်ကြီးဖြင့် ရမ်းသမ်းပစ်ခတ်ခဲ့ရာမှ လူထိခိုက် သေဆုံးရခြင်း ဖြစ်ကြောင်း သိရသည်။

အဆိုပါ တိုက်ပွဲဖြစ်စဥ်နှင့် ပတ်သက်ပြီး စစ်ကောင်စီက ရမ်းသမ်းပစ်ခတ်မှုကြောင့် အရပ်သားများ ထိခိုက် ဒဏ်ရာ ရခြင်းဖြစ်ကြောင်း တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) ၏ ပြောရေးဆိုခွင့် ရှိသူ ဒု – ဗိုလ်မှူးကြီး တားအိုက်ကျော်က ပြောသည်။

“နမ့်ဖတ်ကာ ဘက်မှာက လက်နက်ကြီး နဲ့ ရမ်းသမ်းပစ်ကြလို့ နေအိမ်တွေကို ထိတယ်။ အရပ်သားဆိုလည်း အမျိုးသား ၂ ဦး နဲ့ အမျိုးသမီး ၂ ဦးကို ထိခိုက်တယ်။ အမျိုးသမီး တစ်ဦးကတော့ ဦးခေါင်းကို လက်နက်ထိတဲ့ အတွက် သေဆုံးသွားရတယ်။ စစ်ကောင်စီဘက်က လက်နက်တွေကို ရမ်းသမ်းပစ်ခတ်လို့ ဖြစ်ရတာပါ” ဟု TNLA ပြောရေးဆိုခွင့်ရှိသူ ဒု-ဗိုလ်မှူးကြီး တားအိုက်ကျော်က သျှမ်းသံတော်ဆင့်ကို ပြောသည်။

ကွတ်ခိုင်မြို့နယ်အတွင်း၌ ပြီးခဲ့သည့် သြဂုတ်လ ၂၈ ရက်မှစပြီး စစ်ကောင်စီ နှင့် TNLA တပ် အကြား စစ်ရေးတင်းမာမှုရှိနေခဲ့ခြင်း ဖြစ်ပြီး စစ်ကောင်စီ တပ်ရင်း အမှတ် (၁၂၃) ရှေ့ပစ်ခတ်မှု နှင့် ပတ်သက်ပြီး မသိရကြောင်းလည်း ဒု-ဗိုလ်မှူးကြီး တားအိုက်ကျောက် က သျှမ်းသံတော်ဆင့်ကို ဆက်ဆိုသည်။

အာဏာသိမ်း စစ်ကောင်စီ နှင့် TNLA တပ်တို့သည် ကွတ်ခိုင်မြို့နယ်၊ နမ့်ဖတ်ကာအတွင်း သာမက မူဆယ်မြို့နယ်၊ စယ်လန့်ကျေးရွာအုပ်စု အတွင်းမှာလည်း စစ်ရေးတင်းမာမှုများ ရှိနေကြပြီး စစ်ကောင်စီမှ လေယာဥ်ဖြင့်ပါ ဗုံးကြဲ တိုက်ခိုက်မှု ရှိခဲ့သည်။

စစ်တပ်မှ နိုင်ငံတော် အာဏာသိမ်းယူပြီးနောက်ပိုင်းတွင် သျှမ်းပြည်အတွင်း လှုပ်ရှားနေကြသည့် တိုင်းရင်းသား လက်နက်ကိုင် တပ်ဖွဲ့များ နှင့် ထိတွေ့တိုက်ပွဲ များပြားလာပြီး နေအိမ်စွန့်ခွာ စစ်ရှောင်ထွက်ပြေးရသည့် ဒေသခံများလည်း များပြားလာသည်။