သျှမ်းပြည် တောင်ကြီးခရိုင်၊ ရပ်စောက်မြို့နယ် ကျောက်ဂူကျေးရွာရှိ စစ်ကောင်စီ တပ်စခန်းအတွင်း ပေါက်ကွဲမှု ဖြစ်ပွားခဲ့ပြီး စစ်သား ၄ ဦးသေ ၃ ဦး ဒဏ်ရာရရှိသွားကြောင်း သတင်းသိရသည်။

.

ပြီးခဲ့သည့် သြဂုတ်လ ၂၆ ရက် နံနက်ပိုင်း ၉ နာရီဝန်းကျင်တွင် ကျောက်ဂူကျေးရွာရှိ အာဏာသိမ်း စစ်ကောင်စီ တပ်အမှတ် (၃၄၉) အမြှောက်တပ်တွင်းပေါက်ကွဲမှု ဖြစ်ခဲ့ပြီး စစ်သား ၄ ဦးသေ ၃ ဦး ဒဏ်ရာရသွားကြောင်း ဖြစ်စဥ်ကိုသိရှိသည့် အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

“တပ်တွင်းပေါက်ကွဲမှု ဖြစ်တာလို့ သိရတယ်။ သူတို့ (စကစ) ဗုံးကို မတော်တဆ ထိမိလို့ ပေါက်ကွဲမှု ဖြစ်တာတဲ့၊ အဲ့ဒီမှာ စစ်သား ၃ ဦးက ပွဲချင်းပြီး သေတယ်၊ တစ်ဦးက ဆေးရုံကား မရောက်ခင် ထပ်သေတော့ ၄ ဦး ဖြစ်သွားတယ်။ တခြား ဒဏ်ရာရတဲ့သူလည်း ၃/၄ ဦးလောက်ရှိတယ်” ဟု ဖြစ်စဥ်ကို သိရှိသည့် အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

ပေါက်ကွဲမှုအသံသည် အလွန်ကျယ်လောင်ပြီး အသံ ၃ ချက် ဆက်တိုက်ကြားရခြင်း ဖြစ်ကြောင်းလည်း သိရသည်။

ပေါက်ကွဲမှု ဖြစ်ပြီး ခဏအကြာတွင် ဆေးရုံကား နှင့် လူမှုကူညီရေး အသင်းကားများ ရောက်ရှိလာပြီး အလောင်း နှင့် ဒဏ်ရာရသူများကို ဆေးရုံ၊ ရင်ခွဲရုံသို့ သယ်ဆောင်သွားကြောင်းလည်း ၎င်း အမျိုးသားက ဆက်ပြောသည်။

“တချို့ပြောကြတာက ဒဏ်ရာရတဲ့သူတွေကလည်း ဒဏ်ရာတော်တော်ပြင်းထန်တယ်တဲ့၊ တချို့က ကလောက ဆေးရုံကို ပို့ရသလို၊ ပြင်ဦးလွင်ကို ပို့ရတာလည်း ရှိတယ်လို့ ပြောပါတယ်။ အသေးစိတ် အချက်အလက်တွေကိုတော့ မသိရဘူး” ဟု အထက်ပါ ပုဂ္ဂိုလ်က ဆက်ဆိုထားသည်။

ယင်းပေါက်ကွဲမှု ဖြစ်ပွားခဲ့ပြီးသည့်နောက်တွင် စစ်ကောင်စီတပ်သားများက ကျောက်ဂူကျေးရွာအတွင်း စုံစမ်းစစ်ဆေးမှုများ ပြုလုပ်သည့် အပြင် ရွာလူကြီးကိုလည်း တပ်အတွင်း ခေါ်ယူတွေ့ဆုံခဲ့ကြောင်း သိရသည်။

ပြီးခဲ့သည့် ဇူလိုင်လကုန်ပိုင်းတွင်လည်း ရပ်စောက်မြို့နယ် အတွင်း စစ်ကောင်စီ စစ်ဆေးရေးဂိတ် ဖွင့်လေ့ရှိရာ အနီးတစ်ဝိုက်၌ ဗုံးပေါက်ကွဲမှု ဖြစ်ပွားခဲ့ရာ အနီးပတ်ဝန်းကျင်ရှိ ခြံပိုင်ရှင်ကို မျက်နှာစိမ်း ခြံနားမကပ်ရန်နှင့် လုံခြုံရေးကို တိုးမြှင့်ရန် ခံဝန်လက်မှတ် ရေးထိုးခိုင်းခဲ့သည်။

ရပ်စောက်မြို့နယ်၊ ကျောက်ဂူကျေးရွာ နှင့် အနီးတစ်ဝိုက်တွင် အာဏာသိမ်းစစ်ကောင်စီ တပ်ဖွဲ့အပြင် တိုင်းရင်းသား လက်နက်ကိုင်များဖြစ်ကြသည့် ရှမ်းပြည်တိုးတက်ရေးပါတီ၊ ရှမ်းပြည် တပ်မတော် SSPP/SSA ၊ သျှမ်းပြည်ပြန်လည်ထူထောင်ရေး ကောင်စီ ၊ သျှမ်းပြည် တပ်မတော် RCSS/SSA တို့လည်း သွားလာလှုပ်ရှားနေလျက်ရှိကြောင်း သိရသည်။