သျှမ်းပြည် နမ့်ခမ်းမြို့နယ် ကောင်းနောင်မိုရပ်ကွက်တွင် မီးလောင်မှု ဖြစ်ပွားခဲ့ပြီး အိမ်ရှင် အမျိုးသား တစ်ဦးက မီးထဲပါသွားကြောင်း စုံစမ်းသိရသည်။
.
ယမန်နေ့ သြဂုတ်လ ၂၂ ရက် ည ၁၁ နာရီခွဲ ဝန်းကျင်တွင် နမ့်ခမ်းမြို့နယ်၊ ကောင်းနောင်မိုရပ်ကွက်ရှိ ပရိဘောဂ လုပ်ရောင်းသည့် နှစ်ထပ်ပျဥ်ထောင်အိမ် တစ်လုံး၌ မီးလောင်မှု ဖြစ်ပွားကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“မီးလောင်ပြီး ၁၅ မိနစ်လောက်မှ မီးသတ်ကားရောက်လာတာ၊ လမ်းကလည်း ကျဥ်းတော့ ကားတွေ ဝင်ဖို့ခက်တယ်၊ ပျဥ်အိမ်လည်းဖြစ်တယ်၊ ပရိဘောဂ လုပ်တဲ့ သစ်သားတွေလည်း များတော့ မီးက ပိုကျွမ်းတာပေါ့၊ အိမ်ရှင်အမျိုးသားကလည်း အသက်ကြီးတဲ့အပြင် လမ်းလည်းကောင်းကောင်း မလျှောက်နိုင်တော့ သူလည်း မီးထဲပါသွားတယ်” ဟု ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
မီးငြိမ်းသတ်ပေးကြသည့် မီးသတ်ကားများသည် ဗဟိုမီးသတ်ဌာနမှ မဟုတ်ဘဲ ရပ်ကွက်အလိုက် ကိုယ်ထူကိုယ်ထဖြင့် စီစဥ်ထားသည့် ရပ်ကွက်ပိုင် မီးသတ်ကားများ ဖြစ်ကြောင်းနှင့် မီးသတ်ကား စုစုပေါင်း ၈ စီးနီးပါး လာရောက် ကူညီ ငြိမ်းသတ်ခဲ့ကြောင်း ဒေသခံများက ဆက်ပြောသည်။
အိမ်ရှင်အမျိုးသားသည် အသက် ၆၀ ကျော်ဖြစ်ပြီး ၎င်းတစ်ဦးတည်း အိမ်တွင်း ရှိနေချိန်၌ မီးလောင်မှု ဖြစ်ပွားခဲ့ခြင်းဖြစ်ကြောင်းသိရသည်။
မီးလောင်ကိစ္စနှင့် ပတ်သက်ပြီး မည်သည့်ကိစ္စကြောင့် ဖြစ်ရသည်ကို မသိရကြောင်း နှင့် မီးလောင်မှုကြောင့် ဆုံးရှုံးမှု တန်ဖိုး သိန်းရာနှင့်ချီ ရှိနေကြောင်း အနီးပတ်ဝန်းကျင်တွင် နေထိုင်သည့် အမျိုးသား တစ်ဦးကလည်း သျှမ်းသံတော်ဆင့်ကို ပြောသည်။
“အိမ်တန်ဖိုးရော၊ ပရိဘောဂဖိုး၊ သစ်တန်ဖိုး ပြီးတော့အိမ်တွင်းပစ္စည်းနဲ့ မီးလောင်သွားတဲ့ ပိုက်ဆံတွေ ပေါင်းလိုက်ရင် သိန်းရာနဲ့ချီ ရှိတယ်။ မီးလောင်သွားတဲ့ ပိုက်ဆံ အပိုင်းအစတွေ ကြည့်ရင် ကျပ်သိန်း ၂၀၀ ထက်နည်းမှာ မဟုတ်ဘူး။ လျှပ်စစ်မီးကလည်း ၃ ရက်ဆက်တိုက်ပျက်ပြီး မနေ့ကမှ ပြန်လာတာ၊ အဲ့တာကြောင့် မီးလောင်တာလားတော့ မသိဘူး” ဟု အိမ်နီးချင်း အမျိုးသားက သျှမ်းသံတော်ဆင့်ကို ပြောသည်။
လက်ရှိ မီးလောင်မှုထဲ ပါသွားသည့် အိမ်ရှင် အမျိုးသား၏ ရုပ်အလောင်းကို ဒေသအတွင်း ပရဟိတ လူမှုကူညီရေး အသင်းက လာရောက်သယ်ဆောင်ပြီး ဆေးရုံသို့ ပို့ဆောင်ပေးခဲ့ကြောင်းလည်း သိရသည်။
နမ့်ခမ်းမြို့နယ်အတွင်းတွင် ပြီးခဲ့သည့် သြဂုတ်လ ၂၂ ရက်မှ စတင်ကာ လျှပ်စစ်မီး ၃ ရက်ဆက်တိုက် ပြတ်တောက်ခဲ့အပြီး မီးပြန်လာသည့် ယမန်နေ့၌ မီးလောင်မှုနှင့် ကြုံရကြောင်း ဒေသခံများ သိရသည်။
ထို့အပြင် သက်ကြီးရွယ်အိုများကို တစ်ယောက်တည်း မထားသင့်ကြောင်း နှင့် မီးလောင်မှုလျော့ကျ စေနိုင်ရန် အတွက် လျှပ်စစ်မီး မှန်မှန်ရရှိရန်၊ မီးဘေးကြိုတင်ကာကွယ်ရေးလုပ်ဆောင်ချက်ကို အများ ပြည်သူသိရှိနားလည်ရန် ပညာပေးလုပ်ငန်းစဥ်များလည်း လုပ်ဆောင်သင့်ကြောင်း ဒေသခံများက ဝေဖန် အကြံပြုနေကြသည်။
