ကချင်ပြည် မိုးကောင်းမြို့ရှိ အမှတ် (၁) အခြေခံ အထက်တန်းကျောင်းတွင် ပစ်ခတ်မှု ဖြစ်ပွားပြီး ထိခိုက်ဒဏ်ရာ ရရှိခဲ့သူ ရှိကြောင်း စုံစမ်းသိရှိရသည်။
.
ပြီးခဲ့သည့် သြဂုတ် (၂၀) ရက်တွင် မိုးကောင်းမြို့ရှိ အမှတ် (၁) အခြေခံ အထက်တန်းကျောင်းတွင် စာသင်ကြားနေသည့် စစ်တပ်မိသားစုမှ သား/ သမီးများကို စစ်တပ်ကား ဖြင့် ကျောင်းသို့ လာကြိုရန် စောင့်ဆိုင်းစဥ် အမည်မသိအဖွဲ့မှ လာရောက် ပစ်ခတ်မှု ဖြစ်ပွားကြောင်း သိရသည်။
“ကျောင်းမဆင်းသေးဘူး။ အဲ့ချိန် စစ်တပ်ကား က သူတို့ ကျောင်းအနီးမှာ စောင့်နေတုန်း လာပစ်သွားတာထင်တယ်။ ကားပေါ်မှာ ရှိထားတဲ့ တပ်သား (၃) ဦး ရှိထားပြီး ၂ ဦးတော့ ထိခိုက်ဒဏ်ရာ ပြင်းပြင်းထန်ထန် ရသွားတယ်လို့တော့ ကြားရတယ်”ဟု ကျောင်းသားမိဘ တစ်ဦးက The Voice of Shan- Ni ကို ပြောဆိုထားသည်။
အဆိုပါ လာရောက်ပစ်ခတ်သည့် အဖွဲ့သည် ဆိုင်ကယ် (၂ ) စီး နှင့် လူ (၄) ဦး ဖြစ်ကြောင်း သိရသည်။
“ထိခိုက်ဒဏ်ရာ ရတဲ့ စစ်သားတွေကိုတော့ မြစ်ကြီးနားဘက် သယ်သွားတယ်လို့တော့ ပြောတယ်။ တစ်ချို့ကလည်း သေသွားပြီလို့တော့ ပြောပေမယ့် အတည်ပြုလို့တော့ မရဘူး။ စစ်တပ်ဘက်ကလည်း ဘာမှ တုန့်ပြန်တာ မရှိဘူး”ဟု ဒေသခံ တစ်ဦး ကပြောသည်။
ပစ်ခတ်မှု ဖြစ်ပွားပြီးနောက် စစ်ကောင်စီတပ်မှ စစ်အင်အားဖြင့် လာရောက် စစ်ဆေးမှု ပြုလုပ်ခဲ့ကြောင်းလည်း သိရသည်။
