မြန်မာ – တရုတ်နယ်စပ် ဖြစ်သည့် သျှမ်းပြည် မူဆယ်ခရိုင်အတွင်းရှိ စက်သုံးဆီ ပန့်ဆီဆိုင်များထံသို့ စစ်ကောင်စီ ခွင့်ပြုထားသည့် ကုမ္ပဏီကသာ စက်သုံးဆီများကို ဖြန့်ဖြူးခွင့် ရနေကြောင်း စုံစမ်းသိရသည်။

.

တရုတ်နိုင်ငံမှ တင်သွင်းလာသည့် စက်သုံးဆီများကို မြန်မာပြည်ဘက်မှ ကုမ္ပဏီကြီး ၄ ခုဆီသာ တင်ပို့ခွင့် ရရှိပြီး ယင်းကုမ္ပဏီများမှတဆင့် ဖြန့်ဖြူးသည့် ဆီများကိုသာ သျှမ်းမြောက်ရှိ ပန့်ဆီဆိုင်များ ရယူရောင်းချခွင့် ရနိုင်ကြောင်း ဒေသတွင်းသတင်းရင်းမြစ်က သျှမ်းသံတော်ဆင့်ကို ပြောသည်။

“အခု စစ်ကောင်စီကနေ ခွင့်ပြုထားတဲ့ ကုမ္ပဏီကနေ တင်သွင်းလာတဲ့ ဆီတွေကို ယူပြီး ရောင်းရတာ၊ ကုမ္ပဏီ ကနေ သတ်မှတ်ထားတဲ့ နှုန်းထားအတိုင်း ရောင်းရမှာပေါ့၊ မရောင်းနိုင်တဲ့သူတွေကလည်း ဆီမရဘူး၊ အခု အခြေအနေက အဲ့လိုတွေ ဖြစ်နေတယ်” ဟု သျှမ်းသံတော်ဆင့်၏ ခိုင်မာသည့် သတင်းရင်းမြစ်က ပြောသည်။

တရုတ်မှ စက်သုံးဆီတင်သွင်းခွင့်ရသော ကုမ္ပဏီလေးခုတွင် မန္တလေးမြို့မှ နာမည်ကြီး New Star Light ကုမ္ပဏီ တစ်ခုပါဝင်ပြီး Myanmar Shwe San၊ Kyaw Ni Aung နှင့် Paw Kywe Wa တို့ဖြစ်ပြီး လွန်ခဲ့သည့် မတ်လကတည်းက လုပ်ကိုင်ခွင့်ရရှိခဲ့ခြင်းဖြစ်သည်ဟု စုံစမ်းသိရသည်။

မူဆယ်ခရိုင်အတွင်း၌ စက်သုံးဆီအရောင်းဆိုင် ၄၀ ကျော်ရှိပြီး ထိုဆိုင်များအနေဖြင့် စစ်ကောင်စီခွင့်ပြု ကုမ္ပဏီလေးခုထံမှ တစ်ဆင့်ဝယ်ယူကာ လက်လီပြန်ရောင်းရသော်လည်း တစ်နေရာနှင့် တစ်နေရာ ဈေးနှုန်း မသိကြောင်းလည်း ဒေသခံများက ဆက်ပြောသည်။

“မူဆယ်မြို့က ပန့်ဆီဆိုင်တွေမှာ ဆိုရင် 92 ကို တစ်လီတာ ၂၈၀၀ – ၂၉၀၀ ကျပ် ရှိတယ်။ ဒါပေမဲ့ ၁၀၅ မိုင်မှာကျတော့ 92 တစ်လီတာကို ၂၄၀၀ – ၂၅၀၀ ကျပ် အဲ့လိုရှိတာ။ ဒါကြောင့် မူဆယ်က သူတွေလည်း ၁၀၅ မိုင်တက်ပြီး ဆီဖြည့်လိုက်တယ်၊ မူဆယ် နဲ့ ၁၀၅ မိုင်က ၆ မိုင်လောက်တော့ ကွာဝေးတယ်” ဟု မူဆယ်ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

ထို့အပြင် ဆီသွင်းခွင့်ရ ကုမ္ပဏီများမှ ၎င်းတို့ သတ်မှတ်ဈေးမရသဖြင့် ဆီဖြန့်ဖြူးမှု ရပ်ထားခြင်းလည်း ရှိနေပြီး ရောင်းချရန် ဆီမရှိသည့် မူဆယ်ခရိုင်မှ လက်လီဆိုင်တချို့ ပိတ်ထားရကြောင်းလည်း သိရသည်။

မူဆယ်ခရိုင်အတွင်းမှ ပိတ်ခံထားရသည့် စက်သုံးဆီပန့်ဆီဆိုင် စုစုပေါင်း ၆ ခုရှိနေပြီး ၎င်းတို့သည် ၁၀၅ မိုင်၊ မိုင်းယု ကျေးရွာအုပ်စုရှိ Denko, BOC, စုစံ၊ ဖူးမက်စ်၊ အသောက (၃၀)၊ Regency တို့ဖြစ်ကြောင်းလည်း စုံစမ်းသိရသည်။