သျှမ်းပြည် မိုးဗြဲမြို့ပေါ်တွင် စစ်ကောင်စီတပ်စွဲနေထိုင် လျက်ရှိသောကြောင့် ထွက်ပြေးတိမ်းရှောင်နေရသည့် ပြည်သူများအားလုံး နေရပ် မပြန်နိုင်သေးကြောင်း စုံစမ်းသိရသည်။
.
လက်ရှိမှာ မိုးဗြဲမြို့ စည်ကား (၁) ရပ်ကွက်အတွင်း စစ်ကောင်စီ တပ်စွဲနေထိုင်လျက်ရှိသောကြောင့် နေရပ်ပြန်သွားသည့် ပြည်သူတချို့သည် ကားလမ်းဘေး ကပ်လျက်ရှိ နေအိမ်များအတွင်းသာ နေထိုင်ရပြီး လုံခြုံရေးအတွက် စိုးရိမ်နေရကြောင်း စစ်ရှောင်အရေး ကူညီဆောင်ရွက်သူ ဒေသခံတစ်ဦးက ပြောသည်။
နေရပ်ပြန်သွားသည့် ပြည်သူများသည် တောတောင်အတွင်း ထွက်ပြေးတိမ်းရှောင်စဉ်ကာလ၌ စားနပ်ရိက္ခာ ပြတ်လပ်မှုကြောင့် စားစရာမရှိသဖြင့် နေရပ်ပြန်သွားရခြင်း ဖြစ်သည်။
“တိုက်ပွဲကတော့ ငြိမ်နေတယ်။ စစ်တပ်ကလည်း ပြန်မဆုတ်သေးဘူး။ အရင်တုန်းက ကျနော်တို့ ပြည်သူတွေ ဆန္ဒပြပြီး ရဲစခန်းကို မီးရှို့ထားတဲ့နေရာမှာ သူတို့တပ် ပြန်စွဲထားတယ်။ ပြန်သွားတဲ့ ပြည်သူတချို့တွေကတော့ ရပ်ကွက်ထဲမှာတောင် မနေရဲဘူး။ ပြည်ထောင်စု လမ်းဘေးမှာဘဲ ပြန်နေရဲကြတယ်။ ပြန်သွားတဲ့သူတွေလည်း စိုးရိမ်နေသေးတာပေါ့ “ ဟု ၎င်း ဒေသခံတစ်ဦးက ပြောသည်။
အဆိုပါ မိုးဗြဲမြို့ပေါ်တွင် စစ်ကောင်စီ အင်အား ၈၀၀ ခန့်က တပ်စွဲနေထိုင်လျက်ရှိကြောင်း ဒေသခံများက ပြောဆိုခဲ့သော်လည်း သီခြား အတည်ပြုနိုင်ခြင်း မရှိပေ။
အလားတူ ဖယ်ခုံမြို့ အခြေစိုက် စစ်ကောင်စီ ခမရ (၃၃၆) တပ်နှင့် ခလရ (၄၂၁) တပ်ကလည်း ဖယ်ခုံမြို့၏ အရှေ့ဘက်ခြမ်း ဒေသနှင့် အနောက်ဘက်ခြမ်း ဒေသကို တိုက်ပွဲဖြစ်ပွားခြင်း မရှိဘဲ ရမ်းသမ်းပစ်ခတ်မှုများ ပြုလုပ်နေကြောင်း ဖယ်ခုံအနောက်ဖက်ခြမ်းမှ ဒေသခံတစ်ဦးက ပြောသည်။
“ ဖယ်ခုံရဲ့ အရှေ့ဘက်ခြမ်းမှာတော့ တစ်ညကို ၁ လုံး၊ ၂ လုံး ရမ်းသမ်းထုတဲ့ သဘောလုပ်နေတယ်။ တိုက်ပွဲကတော့ မဖြစ်ဘူး။ တပ်ကဘဲ တာဝန်ကျေအောင် ပစ်နေလား မသိဘူးလို့ ပြောနေတယ်။ ဒေသခံတွေက မပြန်ရဲဘူး။ အရှေ့ဘက်ခြမ်း ပစ်လိုက်၊ အနောက်ဘက်ခြမ်း ပစ်လိုက်နဲ့ လုပ်နေသေးတယ် “ ဟု ၎င်း ဒေသခံတစ်ဦးက ပြောသည်။
ပြီးခဲ့သည့် ဇူလိုင်လ ပထမပတ် မိုးဗြဲမြို့ ဒုံထုန်ထန်ရပ်ကွက်အတွင်း ဆေးမှတ်တမ်းစာအုပ် ပြန်ယူသည့် လင်မယားနှစ်ဦးကို စစ်ကောင်စီမှ သေနတ်ဖြင့် ပစ်ခတ်ခဲ့ပြီး အမျိုးသားဖြစ်သူသည် အခင်းဖြစ်နေရာ အိမ်ခြံဝင်းထဲ၌ သေဆုံးသွားကာ ဇနီးဖြစ်သူက ထွက်ပြေးလွတ်မြောက်ခဲ့ကြောင်း သိရသည်။
