စစ်အာဏာသိမ်းခေါင်းဆောင် တည်ထားကိုးကွယ်သည့် မာရဝိဇယ ဗုဒ္ဓရုပ်ပွားတော်ကို သြဂုတ် ၂၀ ရက် မှစတင်ပြီး ဝင်ကြေးကောက်ခံသွားမည်ဖြစ်ကြောင်း ထုတ်ပြန်ထားသည်။
.
မာရဝိဇယ ဗုဒ္ဓရုပ်ပွားတော် ကို သြဂုတ်လ မှစတင်ကာ လူကြီး၊ ကလေး တဦး လျှင် ဝင်ကြေး ကျပ် ၁,၀၀၀၊ နိုင်ငံခြားသားတဦးလျှင် အမေရိကန် ဒေါ်လာ ၁၀ ပေးဝင်ရမည်ဖြစ်ကြောင်း သိရသည်။
ထို့အပြင် အပျော်ရိုက်ကင်မရာ (ဖုန်း/ကင်မရာ) ၅,၀၀၀ ကျပ်၊ အလှဓာတ်ပုံရိုက် / Video (Pre-Wedding) အပါ ၅,၀၀၀ ကျပ် ပေးဆောင်ရပြီး နာရီဝက်ပိုတိုင်း ၅,၀၀၀ ကျပ် ထပ်မံပေးဆောင်ရမည်ဖြစ်ကြောင်း၊ ဘုရားသို့လာသည့် သူများစီးလာသည့် ကား ယာဥ်ဝင်ခွင့် ၁ စီးလျှင် ၂ သောင်းကျပ် (၂၀,၀၀၀)၊ Buggy ၁ စီးလျှင် (၄ ယောက်စီး) ၁ နာရီ ကျပ်ငွေ ၁ သောင်း (၁၀,၀၀၀) ပေးဆောင်ရမည်ဟု ထုတ်ပြန်ချက်တွင် ရေးသားထားသည်။
အဆိုပါ စစ်ခေါင်းဆောင် တည်ထားကိုးကွယ်သည့်ဘုရားကို သွားရောက်ဖူးမျှော်လိုပါက တစ်ဦးလျှင် ကျပ်ငွေ ၅,၀၀၀ ရှိမှသာ သွားရောက်နိုင်ပြီး၊ ထိုဘုရားသည် စစ်ကောင်စီအတွက် စီးပွားရေး ငွေရှာနေသည့် ဘုရားဟုလည်း နာမည်ကြီး နေသည်။
“ မြန်မာပြည်သူတွေက ဘုရားဆိုရင် ယုံကြည်ကြတယ်လေ။ ဒါကို အခွင့်ကောင်းယူပြီး ငွေတွေ အဆမတန်ကောက်နေတာ။ စစ်ကောင်စီတွေ ငွေဘယ်လောက်လိုနေလဲဆိုတာ သိသာတယ်။ နောက်ဘုရားကို ဗန်းပြပြီး လုပ်စားနေတာ” ဟု နေပြည်တော်တွင် နေထိုင်သည့် အမျိုးသားတစ်ဦးက သျှမ်းသံတော်ဆင့်ကိုပြောသည်။
ထိုစစ်ခေါင်းဆောင် တည်ထားကိုးကွယ်သည့်ဘုရားကို သွားလိုပါက လက်ကိုင်ဖုန်းကို မယူဆောင်သွားကြရန်၊ မလိုလားအပ်ဘဲ ပိုက်ဆံကုန်နိုင်ကြောင်း၊ ယခုကဲ့သို့ ဘုရားသွားဖူးသည့်ကိစ္စသည်လည်း စစ်ကောင်စီကို ငွေကြေးထောက်ပံ့နေသည့်အတွက် ပြည်သူများ မသွားသင့်ကြောင်း ၎င်းက ဆိုသည်။
“ကျနော်အနေနဲ့ အဲ့ဘုရားကို မသွားစေချင်ဘူး။ နောက်ဆိုရင် မဖြစ်သင့်တာ ဖြစ်လာနိုင်တယ်လေ။ ကျနော်အနေနဲ့ စစ်ကောင်စီကို ငွေကြေးမထောက်ပံ့ဖို့ ပြောချင်တယ်” ဟု နေပြည်တော်တွင် နေထိုင်သည့် အမျိုးသားက ထပ်လောင်းပြောသည်။
စစ်ခေါင်းဆောင် တည်ထောင်ထားသည့် မာရဝိဇယ ရုပ်ထုကို မြန်မာနိုင်ငံအတွင်းရှိ ခရိုနီ စီးပွားရေး လုပ်ငန်းရှင်ပေါင်းများစွာ ကူညီထောက်ပံ့နေသည်။
သြဂုတ် ၁ ရက်တွင် မာရဝိဇယ ရုပ်ထု အနေကဇာ တင်ပွဲပြုလုပ်ခဲ့ပြီး ထိုအနေကဇာတင်ပွဲတွင် သျှမ်းပြည် ကျောက်မဲမြို့ သီဟိုဠ်ပရိယတ္တိစာသင်တိုက် ပဓာနနာယက နိုင်ငံတော် သံဃ မဟာနာယက အဖွဲ့ ဒုတိယ ဥက္ကဌ အဂ္ဂမဟာပဏ္ဍိတ ကျောက်မဲဆရာတော် ဒေါက်တာ ဘဒ္ဒန္တနသာရ က ၁- မကောင်းတဲ့အလုပ်ကို မလုပ်ပါနဲ့ ၂- ကောင်းတဲ့အလုပ်ကိုလုပ်ပါ။ ၃- မိမိရဲ့ စိတ်ကို ဖြူစင်အောင်ထားပါ ဆိုပြီး တရား ၃ ပါးကို ဟောကြားခဲ့သည်။
