Saturday, July 20, 2024

ပင်လောင်းမြို့အတွင်း ရေကြီးရေလျှံဖြစ်၊ နေအိမ်ထဲထိ ရေဝင်

Must read

သျှမ်းပြည် ပင်လောင်းမြို့တွင် ယခုသီတင်းပတ်အတွင်း၌ မိုးအဆက်မပြတ် ရွာသွန်းမှုကြောင့် ရေကြီးရေလျှံ ဖြစ်ပေါ်ပြီး နေအိမ်အတွင်းထိ ရေများစီးဝင်နေကြောင်း စုံစမ်းသိရှိရသည်။

.

မိုးအဆက်မပြတ် ရွာသွန်းမှုကြောင့် ယမန်နေ့ (သြဂုတ် ၇) ရက် ညပိုင်းအချိန်မှစပြီး ပင်လောင်းမြို့တွင် ချောင်းရေလျှံမှု နှင့် တောင်ကျရေများကြောင့် ရုတ်တရက် ရေကြီးရေလျှံမှု ဖြစ်ပေါ်လာကာ လက်ရှိ နေအိမ်အောက်ထပ်၌ ဒူးခေါင်းအဆင့်ထိ ရေများ မြင့်တက်နေလျက်ရှိကြောင်း ပင်လောင်းမြို့ဒေသခံ တစ်ဦးက သျှမ်းသံတော်ဆင့်ကိုပြောသည်။

ရေကြီးရေလျှံမှုဖြစ်ပွား

“ မိုးရွာနေတာ (၇-၈) ရက်လောက်ရှိပြီ၊ အဆက်မပြတ်ရွာနေတာ။ တချို့ အနိမ့်ပိုင်းတွေမှာ မနေ့ညကတည်း ရေဝင်နေတာ။ ကျနော်အိမ်ကတော့ ဒီနေ့ မနက်စပြီး ရေတွေဝင်တာ၊ အခု အိမ်အောက်ထပ်မှာ ရေက ဒူးခေါင်း အဆင့်လောက်ထိ တက်နေပြီ။ မိုးက မတိတ်နိုင်သေးဘူး ဒီထက်ရေပိုတက်မယ်ထင်တယ် “ ဟု ၎င်းဒေသခံတစ်ဦးက ပြောသည်။

အဆိုပါ ရေကြီးရေလျှံမှုကြောင့် ပင်လောင်းမြို့ ကန်သာဦးရပ်ကွက်၊ အရှေ့ရပ်ကွက်၊ အနောက်ရပ်ကွက်၊ ဘုရားမြောက်ရပ်ကွက် နှင့် ဈေးတန်းရပ်ကွက် စသည့်ရပ်ကွက်ရှိ နေအိမ်အောက်ထပ်၌ ရေများစီးဝင်နေလျက်ရှိ ကြောင်း သိရသည်။

ရေကြီးရေလျှံမှုဖြစ်ပွား

ယင်းကဲ့သို့ နေအိမ်အောက်ထပ်ထိ ရေများစီးဝင်သောကြောင့် အချိန်မှီ မပြောင်းရွှေ့ရသည့် အိမ်သုံးပစ္စည်းနှင့် အသုံးအဆောင် ပစ္စည်းတချို့သည် ရေထဲမျောပါသွားခြင်း ရှိခဲ့သလို ပြည်သူများသည် နေအိမ်အောက်ထပ်မှ အပေါ်ထပ်သို့ ပြောင်းရွှေ့နေထိုင်ခြင်း ပြုလုပ်ပြီး နေထိုင်ကြရကြောင်း သိရှိရသည်။

လက်ရှိမှာ ရေကြီးရေလျှံမှု နှင့် ပတ်သက်ပြီး စိုးရိမ်ရေ အမှတ်ထိ မရောက်ရှိသေးသောကြောင့် အနိမ့်ပိုင်းဒေသရှိ ပြည်သူများသည် နေအိမ်မှတစ်ဆင့် တခြားနေရာသို့ ပြောင်းရွှေ့နေထိုင်ခြင်း မရှိသေးပေ။

Leave a Comments

- Advertisement -spot_img

Latest article