Saturday, July 20, 2024

သျှမ်းဝါရင့် အဆိုတော် စိုင်းလောဝ်ဆိုင်ကို မနက်ဖန် သင်္ဂြိုဟ် သွားမည်

Must read

သျှမ်းဝါရင့် တေးရေးတေးဆို ဖြစ်သည့် စိုင်းလောဝ်ဆိုင်၏ ရုပ်အလောင်းကို မနက်ဖန် ( သြဂုတ် ၉) ရက်တွင် သင်္ဂြိုဟ်သွားမည်ဟု သတင်းရရှိသည်။

.

စိုင်းလောဝ်ဆိုင်သည် သြဂုတ် (၇) ရက် ညနေ ၆ နာရီ ၂၅ မိနစ်လောက်တွင် ၎င်း၏ ပြင်ဦးလွင် (မေမြို့) နေအိမ်တွင် ကွယ်လွန် သွားခဲ့သည်။

သူကွန်လွန်ချိန်တွင် အသက် ၈၂ အရွယ်ရှိကြောင်း သိရသည်။

စိုင်းလောဝ်ဆိုင် ၏ ရုပ်အလောင်းကို သြဂုတ် (၉) ရက် နေ့လည် ၁ နာရီတွင် ၎င်း၏ နေအိမ်မှ ၈ မိုင်ကုန်းသုဿန် ၌ သင်္ဂြိုလ်သွားမည်ဟု စိုင်းလောဝ်ဆိုင် နှင့် နီးသူထံမှ သိရသည်။

Photo – Pannyabhoga Herngseng (တေးရေး တေးဆို စိုင်းလောဝ်ဆိုင်)

“လက်ရှိ ရုပ်အလောင်းကိုတော့ နေအိမ်မှာ ရှိထားပါတယ်။ သူ့ ညီဖြစ်တဲ့ အဆိုတော် စိုင်းဆိုင်မောဝ်၊ စိုင်းလှိုင်းဆိုင် နဲ့ သူတို့ ဆွေမျိုးတွေကို စောင့်နေပါတယ်။ လာမယ့် ဒီဇင်ဘာ ကျရင် သူ့အသက် (၈၃) နှစ်ပြည့်မယ်” ဟု နီးစပ်သူ တစ်ဦး ကပြောသည်။

စိုင်းလောဝ်ဆိုင်သည် ဆီးချိုရောဂါ၊ အဆုတ်ရောင်ရောဂါ နှင့် အသည်းရောဂါ ဖြစ်ပွားပြီး လွန်ခဲ့သည့် (၂) လကျော်လောက်က ပြင်ဦးလွင် ဆေးရုံမှာ မကြာခဏ ဆေးကုသမှု ခံယူခဲ့ရပါသည်။

ပြီးခဲ့သည့် သြဂုတ် (၃) ရက်တွင် ကျန်းမာရေး အခြေအနေ ဆိုးဝါးသည့်အတွက်ကြောင့် ဆေးရုံသို့ ဆေးကုသမှု ခံယူနေရင်း စိုးရိမ်ရသည့် အခြေအနေ ဖြစ်သည့်အတွက် သြဂုတ် (၇) ရက် ညနေပိုင်းတွင် နေအိမ်သို့ ပြန်လည် ခေါ်ဆောင်ခဲ့ပါသည်။

Photo – Pannyabhoga Herngseng (တေးရေး တေးဆို စိုင်းလောဝ်ဆိုင်)

“ဆေးရုံမှာကတည်းက ဆရာစိုင်းလောဝ်ဆိုင် က မကြာခဏ အသက်ရှုကြပ်ပြီးတော့ မေ့မျောတာဖြစ်ပြီး နိုးလို့ မရဘူးဖြစ်ခဲ့တယ်။ ဆရာဝန်တွေ လာစစ်ဆေးကြည့်တော့ ဦးနှောက်က လည်ပတ်မှု မရှိတော့ပဲ အောက်စီဂျင် အကူနဲ့ပဲ အသက်ရှုနေရတော့ မိသားစုတွေကလည်း နေအိမ်ကို ပြန်ခေါ်ခဲ့တာဖြစ်ပါတယ်။ နေအိမ်ရောက်ပြီး ညပိုင်း ၆ နာရီကျော်မှာ ဆုံးသွားတာဖြစ်ပါတယ်။”ဟု နီးစပ်သူ တစ်ဦးကပြောသည်။

စိုင်းလောဝ်ဆိုင်သည် သျှမ်းပြည် မူဆယ်မြို့တွင် မွေးဖွားခဲ့ပြီး အဘ လုံးဘခိုင် အမိ ပါနန်းအေးစိန် ဖြစ်ပြီး မွေးချင်းမောင်နှမ (၆) ဦးရှိပါသည်။

အဆိုပါ မွေချင်းမောင်နှမ (၆) ဦးထဲက စိုင်းလောဝ်ဆိုင် သည် သားအကြီးဆုံးဖြစ်ပြီး၊ ညီဖြစ်သည့် စိုင်းလိန်ခမ်း၊ စိုင်းဆမ်၊ အဆိုတော် စိုင်းဆိုင်မောဝ် ၊ အဆိုတော် စိုင်းလှိုင်းဆိုင် ဖြစ်ပြီး ညီမငယ်ဖြစ်သည့် နန်းသိန်းဟန် ဖြစ်ပါသည်။

လက်ရှိ မောင်နှမ (၆) ယောက်ထဲမှာတော့ အဆိုတော် စိုင်းဆိုင်မောဝ် နှင့် စိုင်းလှိုင်းဆိုင် ပဲ ကျန်ရစ်ခဲ့ပါသည်။

စိုင်းလောဝ်ဆိုင်သည် နန်းသီတာ နှင့် အိမ်ထောင်ကျပြီး သား (၃) ယောက် ထွန်းကားခဲ့ကြောင်းလည်း သိရသည်။

စိုင်းလောဝ်ဆိုင် မိသားစု

စိုင်းလောဝ်ဆိုင် ကွယ်လွန်သွားချိန်မှာတော့ ၎င်း ရေးသားခဲ့သည့် သီချင်း စုစုပေါင်း (၂) ထောင်ကျော်ရှိခဲ့ပြီး ပထမဆုံး သီချင်းရေးခဲ့သည့် သျှမ်းသီချင်းကတော့ ကွန်းသီခါ (ၵူၼ်းသီႇၶႃ) သီချင်းပဲဖြစ်ပါသည်။

စိုင်းလောဝ်ဆိုင် သီချင်းများကို တက်သစ်စ သျှမ်းလူငယ် အဆိုတော် သာမက ဝါရင့် သျှမ်းအဆိုတော်များစွာ ပြန်လည် သီဆိုခဲ့ပါသည်။ နောက်ပြီး သူသည် သျှမ်းတော်လှန်ရေး သီချင်းကို ရေးစပ်သီဆိုသည့် သူတစ်ဦး ဖြစ်ကာ လူငယ်များ အတွက် စံပြသျှမ်းအဆိုတော်တစ်ဦးလည်း ဖြစ်သည်။

Leave a Comments

- Advertisement -spot_img

Latest article