သျှမ်းပြည် လားရှိုးမြို့နယ် အီနိုင်းကျေးရွာ အုပ်စု အတွင်းသို့ အာဏာသိမ်း စစ်ကောင်စီ တပ်ဖွဲ့က ယနေ့ (ဇူလိုင် ၂၇ ) ရက် နံနက် ၁၀ နာရီခန့်တွင် လေယာဥ်ဖြင့် ဗုံးကြဲ တိုက်ခိုက်ခဲ့ကြောင်း သိရသည်။
ယနေ့ ဇူလိုင်လ ၂၇ ရက် နံနက်ပိုင်း ၁၀ နာရီဝန်းကျင် အချိန်တွင် အာဏာသိမ်း စစ်ကောင်စီ တပ်ဖွဲ့သည် အီနိုင်းကျေးရွာအုပ်စုရှိ တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) ၏ ယာယီတပ် စခန်းနေရာကို ဗုံးကြဲ တိုက်ခိုက်ခဲ့ကြောင်း သိရသည်။
“ဗုံးတွေ ကြဲချတာ ၁၀ ထက် မနည်းဘူး။ အဲ့နေရာ TNLA တပ်ဖွဲ့ရဲ့ ယာယီ တပ်စခန်းရှိနေတယ်။ အမှန်တော့ အရင်တုန်းက စစ်ကောင်စီတပ်အဟောင်းပဲ၊ စကစတွေက ထွက်သွားတာလည်း ၅ နှစ် နီးနီးလည်း ရှိနေတော့ TNLA က ဝင်နေတာပေါ့၊ ဒီနေ့မှာ မြေပြင်တိုက်ပွဲလည်း မရှိဘဲနဲ့ လေကြောင်းကနေပဲ ဗုံးကြဲချတာ” ဟု လုံခြုံရေး အရ အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ ဗုံးကြဲတိုက်ခိုက်မှုကြောင့် TNLA တပ်သား နှစ်ဦးထိခိုက်ကျဆုံးပြီး အနီးပတ်ဝန်းကျင်ရှိ လူနေအိမ်များ လည်း ထိခိုက်ပျက်စီးကြောင်း သိရသည်။
ယင်းကဲ့သို့ စစ်ကောင်စီဘက်မှ ဗုံးကြဲတိုက်ခိုက်မှု နှင့် ပတ်သက်ပြီး အသေးစိတ် ဖြစ်စဥ် သိရှိရန် အတွက် တအာင်း (ပလောင်) အမျိုးသား လွတ်မြောက်ရေး ပြောရေးဆိုခွင့် နှင့် ပြန်ကြားရေး တာဝန်ခံသို့ ဖုန်းဖြင့် ဆက်သွယ်ခဲ့ သော်လည်း ဖုန်းလက်ခံ ဖြေကြားခြင်း မရှိပေ။
ပြီးခဲ့သည့် ဇူလိုင်လ ၂၅ ရက်တွင်လည်း စစ်ကောင်စီတပ်ဖွဲ့သည် နမ့်အွန်ကျေးရွာအုပ်စု ဆိုင်ခေါင်(ဝ်) ရွာအနီးကို TNLA တပ်ဖွဲ့ သွားလာ လှုပ်ရှားမှု ရှိသည်ဆိုသည့် အကြောင်းပြချက်ဖြင့် ဗုံးကြဲတိုက်ခိုက်မှုကြောင့် ဆိုင်ခေါင်(ဝ်) ရွာ ဒေသခံ နေအိမ်တချို့ ထိခိုက်ပျက်စီးရသည့် အပြင် အသက် (၄၀) အရွယ် အမျိုးသားတစ်ဦးလည်း လက်နက်ကြီး ထိမှန် သေဆုံးခဲ့သည်။
ဇူလိုင်လ ပထမ ပတ်အတွင်းမှ စတင်ကာ အာဏာသိမ်း စစ်ကောင်စီ တပ်ဖွဲ့သည် သျှမ်းပြည်အတွင်း အခြေစိုက် လှုပ်ရှားသည့် တိုင်းရင်းသား လက်နက်ကိုင် တပ်ဖွဲ့များနှင့် ထိတွေ့တိုက်ပွဲ ဖြစ်ပွားမှု ခပ်စိပ်စိပ် ဖြစ်လာသည်။
