နှစ်သောင်းကျပ်တန် ငွေစက္ကူအမှတ်တရ အနေဖြင့် အကန့်အသတ်ဖြင့်သာ ငွေစက္ကူ အဟောင်းများနေရာတွင် အစားထိုး လဲလှယ်ပေးခြင်းဖြစ်သည့်အတွက် ငွေကြေးဖောင်းပွမှု မဖြစ်နိုင်ဟု မြန်မာနိုင်ငံတော် ဗဟိုဘဏ် ငွေကြေးစီမံခန့်ခွဲမှုဌာန မှ ညွှန်ကြားရေးမှူးချုပ် ဦးဝင်းမြင့် က ပြောဆိုလိုက်သည်။

နေပြည်တော်တွင် တည်ဆောက်ထားသည့် “မာရဝိဇယ” ဗုဒ္ဓရုပ်ပွားတော်မြတ်ကြီး တည်ဆောက်ပြီးစီးမှု အထိမ်းအမှတ်ဖြင့် နှစ်သောင်းကျပ်တန် ငွေစက္ကူ ကို ထုတ်ဝေရခြင်း ဖြစ်ကြောင်း သိရသည်။

“မြန်မာနိုင်ငံမှာ ငွေကြေးဖောင်းပွမှု လျော့နည်းကျဆင်းစေဖို့ နဲ့ ငွေကြေးဖောင်းပွနှုန်းကို ထိန်းချုပ်နိုင်စေဖို့အတွက် ဗဟိုဘဏ်က ငွေကြေး မူဝါဒ ရှိပါတယ်။ ဒါ့ကြောင့် ငွေကျပ်နှစ်သောင်းတန် ကို အမှတ်တရ အနေ နဲ့ အကန့်အသတ်ဖြင့်သာ ငွေစက္ကူအဟောင်းတွေနေရာမှာ အစားထိုးလဲလှယ်ပေးတဲ့အတွက် ကျပ်နှစ်သောင်းတန် ထုတ်ဝေခြင်းကြောင့် ငွေကြေးဖောင်းပွမှု မဖြစ်နိုင်ပါဘူး” လို့ ညွှန်ကြားရေးမှူး ဦးဝင်းမြင့် ကဆိုသည်။

သို့သော် မြန်မာနိုင်ငံသည် စစ်အာဏာသိမ်းပြီး ၂ နှစ်ကျော်ကာလ နိုင်ငံရေး ရှုပ်ထွေးမှုကြား စီးပွားရေးဘက် ကလည်း ကျဆင်းလာပြီး၊ ငွေကြေးဖောင်းပွမှုနှုန်းကလည်း မြင့်တက်လာသည့်အတွက် ကုန်စျေးနှုန်းကလည်း အဆပေါင်းများစွာ မြင့်တက်လာပြီး ပြည်သူများက အခက်အခဲ မျိုးစုံကြုံတွေ့နေရသည်။

ထို့နောက် ကျပ်နှစ်သောင်းတန် ငွေစက္ကူထုတ်မည့် သတင်းကြောင့်လည်း အချို့ စျေးဆိုင်များ၊ ကုမ္ပဏီများ၊ ပြည်ပ တင်ပို့သည့် လူသုံးကုန်ပစ္စည်းများလည်း ပြတ်လပ်သည့်အထိ ဖြစ်လာသည်။

“သူတို့က ငွေကြေးဖောင်းပွမှု မရှိဘူး ပြောပေမယ့် အဲ့ငွေစက္ကူ သတင်းထွက်ကတည်းက ထိုင်းပစ္စည်းတွေ ပြတ်တော့တာပဲ။ စားသောက်ကုန်တွေ နောက် လူသုံးကုန်တွေ ပြတ်တယ်။ ကလေး အာဟာရမှုန့်တောင် ဝယ်မရဘူး။ ရှေ့ဆက် ဒီထက် ကျပ်တည်းဖို့ပဲ” ဟု မူဆယ်မြို့ ဒေသခံ အမျိုးသမီး တစ်ဦး က သျှမ်းသံတော်ဆင့်ကို ပြောသည်။

ငွေစက္ကူသစ်ထုတ်ဝေမည့် သတင်းကြေညာပြီးနောက်ပိုင်း ပြည်တွင်းရှိ စားသောက်ကုန်ပစ္စည်းများ၊ လူသုံးကုန်ပစ္စည်းများနှင့် ရွှေစျေးကွက် ငွေကြေးလဲလှယ်ရေးအပြင် မြေအရောင်းအဝယ်များလည်း ကမောက်ကမ ဖြစ်လာခဲ့သည်။