သျှမ်းပြည် တောင်ကြီးခရိုင်၊ ညောင်ရွှေမြို့နယ်၊ ရေပယ်ကျေးရွာအနီး ပစ်ခတ်မှုအပြီး လမ်းအသုံးပြုမှုကို အာဏာသိမ်း စစ်ကောင်စီတပ်ဖွဲ့က အချိန်ကန့်သတ်လိုက်ကြောင်း စုံစမ်းသိရသည်။
ပြီးခဲ့သည့် ဇူလိုင်လ ၂၄ ရက်နေ့ ညပိုင်းအချိန်တွင် တောင်လေးလုံး အနီးရှိ ရေပယ်ကျေးရွာ နှင့် မြဘုရင် သကြား စက်ရုံကြား၌ SURF ကားတစ်စီးကို စစ်ကောင်စီတပ်ဖွဲ့က လိုက်လံပစ်ခတ်ရာမှာ ကားထဲလိုက်ပါလာသူ တစ်ဦး သေဆုံးပြီး တခြား ၂ ဦးက ထွက်ပြေး လွတ်မြောက်သွားခြင်း ဖြစ်သည်။
အဆိုပါ ပစ်ခတ်မှုအပြီး ထွက်ပြေးလွတ်မြောက်သွားသူ နှစ်ဦးသည် စစ်ကောင်စီတပ်သား နှင့် ရဲတပ်ဖွဲ့ ဝင်တို့ တောနင်းရှာဖွေ နေလျက်ရှိပြီး လက်ရှိတွင် အဆိုပါ လမ်းကြောင်း ဖြတ်သန်းသွားလာမှုကို အချိန်ကန့်သတ်လိုက်ကြောင်း ဒေသခံများက သျှမ်းသံတော်ဆင့်ကို ပြောသည်။
“ညောင်ရွှေ – ခေါင်တိုင် – တောင်လေးလုံး လမ်းဆုံဂိတ်တွေ ကို စစ်ကောင်စီက စစ်ဆေးရေးဂိတ်က အချိန်နဲ့ ဖြတ်သန်းခွင့်ပေးတယ်။ ခေါင်တိုင်လမ်းပိုင်းကို မနက် ၅ နာရီကနေ ညနေ ၅ နာရီအတွင်းပဲ ဖြတ်ခွင့်ပေးတာ၊ ကျန်တဲ့အချိန်ကတော့ ရောက်တဲ့ နေရာကနေ ရပ်ရတယ်” ဟု ညောင်ရွှေမြို့နယ် ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ လမ်းဖြတ်သန်းခွင့် အချိန်ကန့်သတ်ပေးလိုက်သည့် အပြင် လမ်းသွားလမ်းလာများထံမှ ငွေကြေး ပိုက်ဆံ တောင်းယူခြင်းများလည်း ရှိနေကြောင်း ကြုံတွေ့ရသည့် ကားသမားများက သျှမ်းသံတော်ဆင့်ကို ဆက်ပြောသည်။
“ကျနော် အသိတစ်ယောက် အဲ့လမ်းကနေ ဖြတ်သွားလို့ ပြန်ပြောပြတာပါ။ ကားတစ်စီးကို ရစ်ပြီး ပိုက်ဆံ ၂ သောင်းကနေ ၃ သောင်း အဲ့လို တောင်းယူတယ်တဲ့၊ အခုလို လုပ်လိုက်တော့ လမ်းသွားလမ်းလာတွေ အတွက်ရော၊ ဈေးသည်တွေ အတွက်ရော ခက်ခဲသွားတာပေါ့ ၊ တချို့က ညောင်ရွှေဈေးကို အစောကြီး ရောက်လာကြတာ၊ အခုဆိုရင် ၅ နာရီ မထိုးမချင်း လမ်းမဖြတ်ရတော့ ခက်တာပေါ့” ဟု အထက်ပါ ကားသမားများက သျှမ်းသံတော်ဆင့်ကို ပြောသည်။
ဇူလိုင်လ ၂၄ ရက်တွင် စစ်ကောင်စီ ပစ်ခတ်မှုကြောင့် သေဆုံးသွားသည့် လူငယ်သည် ကယန်းလူမျိုးဟု သိရပြီး မည်သည့်အတွက်ကြောင့် လိုက်လံပစ်ခတ်ခြင်း ခံရသည်ကို သျှမ်းသံတော်ဆင့် အနေဖြင့် သီးခြား အတည်ပြုနိုင်ခြင်း မရှိသေးပေ။
လက်ရှိ အင်းလေးဒေသ အဝင်အထွက်များကို စစ်ကောင်စီတပ်ဖွဲ့မှ တင်းကြပ်စွာ စစ်ဆေးနေပြီး ပေါင်းပိုင်းဂိတ်၊ မှော်ဘီဂိတ်၊ အင်းတိန်ဂိတ် နှင့် ဘုရားနီ၊ သန်းထောင်ကြားမှ စစ်ဆေးရေးတို့က စစ်သားများသည် အမျိုးသမီးများကို လိင်ပိုင်းဆိုင်ရာ ကာယိအိန္ဒြေ ကျူးလွန်မှု စစ်ဆေးမှုများလည်း ပြုလုပ်နေသည့် နေရာဖြစ်သည်။
Leave a Comments