သျှမ်းပြည် မူဆယ်မြို့နယ် နမ့်အွမ်ကျေးရွာအနီး ၊ ဆိုင်းခေါင်(ဝ်) ကျေးရွာအတွင်းသို့ အာဏာသိမ်း စစ်ကောင်စီ တပ်ဖွဲ့က လေယာဥ်ဖြင့် ဗုံးကြဲတိုက်ခိုက်ရာ ပြည်သူ တစ်ဦးသေ တစ်ဦး ဒဏ်ရာရသွားကြောင်း စုံစမ်းသိရသည်။
ယနေ့ (ဇူလိုင်လ ၂၅) ရက် နံနက်ပိုင်းတွင် ဆိုင်းခေါင် (ဝ်) ကျေးရွာအတွင်း တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) ရှိနေသည့် သတင်းကြောင့် အာဏာသိမ်း စစ်ကောင်စီတပ်ဖွဲ့က လေယာဥ် ဗုံးကြဲတိုက်ခိုက်ခြင်းဖြစ်ကြောင်း ဒေသခံများက သျှမ်းသံတော်ဆင့်ကို ပြောသည်။
“လေယာဥ် နဲ့ ဗုံးကြဲချတာ၊ နေအိမ်တစ်လုံးပေါ် ကျကွဲတယ်။ အမျိုးသား တစ်ဦးကတော့ ပွဲချင်းပြီး သေသွားတယ်။ အမျိုးသမီးကတော့ ခြေထောက်ကျိုးသွားတယ်။ တခြားနေအိမ် ထိခိုက်ပျက်စီးမှုတွေလည်း ရှိနေတယ်” ဟု ဒေသခံများက သျှမ်းသံတော်ဆင့်ကို ပြောသည်။
စစ်ကောင်စီ တပ်ဖွဲ့သည် လေကြောင်းဖြင့် ဗုံးကြဲတိုက်ခိုက်မှု ပြုသည့်အပြင် ဆိုင်းခေါင်(ဝ်) ကျေးရွာ အနီးရှိ ကောင်းဝိန်းကျေးရွာတွင်လည်း မြေပြင်စစ်ကြောင်းထိုးကာ ဒေသခံနေအိမ်များအတွင်း ဝင်ရောက်နေရာ ယူထားလက်ရှိကြောင်းလည်း သိရသည်။
စစ်ကောင်စီတပ်သားများမှ ပြည်သူ့နေအိမ်ဝန်းထဲ ဝင်ရောက်နေထိုင်မှုကြောင့် ဒေသခံ အမျိုးသား လူငယ်များ တချို့က ရှောင်တိမ်းသွားရကြောင်းလည်း ဒေသခံများက သျှမ်းသံတော်ဆင့်ကို ပြောသည်။
“ကောင်းဝိန်းကျေးရွာမှာ စစ်ကောင်စီက ရွာထဲဝင်နေပြီးတော့ ရွာသားတွေကို လမ်းပြခိုင်းတာတွေ လုပ်ခိုင်းနေ တယ်။ အဲ့ဒါကြောင့် လူငယ်တွေ၊ အမျိုးသားတွေ တချို့ကတော့ ထွက်ပြေးတိမ်းရှောင်နေကြပြီ၊ အခု ဆိုင်းခေါ် (ဝ်) ရွာမှာလည်း ပလောင် စစ်သားတွေက သူတို့အတွက် စားစရာတွေ ပို့ပေးခိုင်းလို့ တချို့ကလည်း တိမ်းရှောင် သွားရတယ်” ဟု အထက်ပါ ဒေသခံက သျှမ်းသံတော်ဆင့်ကို ပြောသည်။
လက်ရှိ မြေပြင်အခြေအနေတွင် အာဏာသိမ်း စစ်ကောင်စီ တပ်ဖွဲ့ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့က စစ်ရေးတင်းမာနေလျက်ရှိပြီး စစ်ကောင်စီမှ လေယာဥ်ဖြင့် လှည့်ပတ်မှုများလည်း ရှိနေကြောင်း သိရသည်။
ဗုံးကြဲတိုက်ခိုက်ခံရသည့် ဆိုင်းခေါင် (ဝ်) ကျေးရွာတွင် နေအိမ် အပျက်အစီးများ တစ်လုံးထက်မက ရှိနိုင်ကြောင်း နှင့် လက်ရှိ အချိန်ထိ စစ်ရေးတင်းမာမှု ရှိနေသေးသည့်အတွက် ဒေသအတွင်း လူမှုကူညီရေးအသင်းများ ဝင်ရောက်နိုင်ရန်လည်း ခက်ခဲနေကြောင်းသိရသည်။
အာဏာသိမ်း စစ်ကောင်စီ တပ်ဖွဲ့ နှင့် TNLA သည် ပြီးခဲ့သည့် ဇူလိုင်လ ၂၃ ရက်မှ စတင်ပြီး မူဆယ်မြို့နယ် အတွင်း ထိတွေ့တိုက်ပွဲဖြစ်ပွားခဲ့ရာ ယနေ့ ဇူလိုင်လ ၂၅ ရက်တွင် လေယာဥ်ဖြင့် ဗုံးကြဲတိုက်ခိုက် လာခြင်း ဖြစ်သည်။
Leave a Comments