သျှမ်းပြည် ဖယ်ခုံမြို့နယ် မိုးဗြဲမြို့အတွင်း ဆေးမှတ်တမ်းစာအုပ် ပြန်ယူသည့် လင်မယားနှစ်ဦး ပစ်ခတ်ခံရပြီး အမျိုးသားဖြစ်သူ သေဆုံးသွားခဲ့ကြောင်း စုံစမ်းသိရသည်။
ပြီးခဲ့သည့် ဇူလိုင်လ ပထမပတ်တွင် မိုးဗြဲမြို့ ဒုံထုန်ထန်ရပ်ကွက်အတွင်း ဆေးမှတ်တမ်းစာအုပ် ပြန်ယူသည့် လင်မယားနှစ်ဦးကို စစ်ကောင်စီမှ သေနတ်ဖြင့် ပစ်ခတ်ခဲ့ပြီး အမျိုးသားဖြစ်သူသည် အခင်းဖြစ်နေရာ အိမ်ခြံဝင်းထဲ၌ သေဆုံးသွားကာ ဇနီးဖြစ်သူက ထွက်ပြေးလွတ်မြောက်ခဲ့ကြောင်း ခိုင်မာသည့် သတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။
“လင်မယား နှစ်ယောက်က တောင်ကြီးဆေးခန်းမှာ ဆေးပြဖို့လိုလို့ ဆေးမှတ်တမ်းစာအုပ်ကို စစ်ရှောင်နေတုန်း သူတို့ မယူသွားမိဘူး။ ဆေးစာအုပ်လိုလို့ဆိုပြီး ပြန်ယူတာ လင်မယားနှစ်ယောက်က ပြန်ယူရင်း စစ်တပ်က လိုက်ပစ်တာ ယောကျာ်းကနေပြီး ဆိုင်ကယ်ကို မိန်းမ ပေးမောင်းခိုင်းပြီး ဒီအတိုင်းပဲ အသေခံလိုက်တယ် “ ဟု ၎င်း သတင်းရင်းမြစ်တစ်ဦးက ပြောသည်။
အဆိုပါ သေနတ်ပစ်ခတ်ခံရသည့် အမျိုးသားတစ်ဦးသည် အသက် ၄၀ နှစ်အရွယ် ရှိပြီး မိုးဗြဲမြို့ ဒုံထုန်ထန်ရပ်ကွက်တွင် နေထိုင်ကာ တိုက်ပွဲကြောင့် နေရပ်စွန့်ပြီး ထွက်ပြေးတိမ်းရှောင်ရသည့် စစ်ဘေးရှောင် တစ်ဦးဖြစ်ကြောင်း သိရသည်။
ထို့အပြင် ပြည်သူများအနေဖြင့် စစ်ကောင်စီတပ်စွဲ နေထိုင်သည့် မိုးဗြဲမြို့တွင်း နေရပ်မပြန်ဖို့ရန် ပြည်သူ့ကာကွယ်ရေး PDF မှ တားမြစ်ထားသည့်ကြား ပြန်သွားသောကြောင့် မကြာခဏ ပစ်ခတ်ခံနေရပြီး အသက်ဆုံးရှုံးနေရကြောင်း သိရသည်။
“ ဒီချိန်မှာ နေရပ်ပြန်သွားလို့ မရတဲ့ အခြေအနေဖြစ်တဲ့ အတွက် ပြည်သူ့ကာကွယ်ရေး PDF တွေကလည်း သတိပေးထားတယ်။ ပြောရမယ်ဆို ကျနော်တို့ ပြည်သူတွေကလည်း စကားနားမထောင်ဘူး။ တိုးတိုးတိတ်တိတ် ခိုးပြန်သွားကြတာပေါ့။ အဲ့မှာက စစ်တပ်က တပ်စွဲထားတော့ ပြန်သွားရင် စစ်တပ်က မဆင်မခြင်၊ ပြည်သူကို ရန်သူလို့ သဘောထားပြီး ပစ်ခတ်သတ်ဖြတ် ခံရတဲ့သူတွေလည်း မနည်းတော့ဘူး “ ဟု ၎င်းခိုင်မာသည့် သတင်းရင်းမြစ်က ထပ်လောင်းပြောသည်။
ထို့ကြောင့် တိုက်ပွဲဆက်လက်ဖြစ်ပွားနေသည့် မိုးဗြဲ၊ ဖယ်ခုံမြို့နယ်အတွင်း စစ်ကောင်စီတပ်များသည် ကျေးရွာအတွင်း တပ်စွဲနေထိုင်လျက်ရှိသဖြင့် ပြည်သူများအနေဖြင့် ဖြတ်သန်းသွားလာခြင်း၊ ရိက္ခာ၊ ပစ္စည်း ပြန်သယ်ယူခြင်း မပြုလုပ်ရန် ပြည်သူ့ကာကွယ်ရေးတပ်ဖွဲ့များက ထပ်မံတိုက်တွန်းထားသည်။
