စစ်ကောင်စီ၏ ဝန်ကြီး ၃ ဦး နှင့် စစ်ကောင်စီ နှင့် ဆက်နွယ်သည့် လူပုဂ္ဂိုလ် ၆ ဦး တို့အပြင် အမှတ် (၂) သတ္တုတွင်းလုပ်ငန်းကို ဥရောပ သမဂ္ဂ (EU) က ထပ်မံ ဒဏ်ခတ်လိုက်ကြောင်း ဇူလိုင် ၂၀ ရက် တွင် ကြေညာချက်ထုတ်ပြန်လိုက်သည်။

ဥရောပ သမဂ္ဂ မှ ထပ်မံ အရေးယူလိုက်သည့် သူများမှာ စစ်ကောင်စီ၏ လူဝင်မှုကြီးကြပ်ရေးဝန်ကြီး ဦးမြင့်ကြိုင်၊ အလုပ်သမားဝန်ကြီး ဦးပွင့်ဆန်း နှင့် ကျန်းမာရေးဝန်ကြီး ဒေါက်တာ သက်ခိုင်ဝင်း၊ စစ်ကောင်စီ အဖွဲ့ဝင်များဖြစ်သည့် ဦးအောင်ကျော်မင်း နှင့် Porel အောင်သိန်း တို့အပြင် စစ်ထောက်ချုပ် ဒုတိယ ဗိုလ်ချုပ်ကြီး ကျော်စွာလင်းတို့ ဖြစ်ကြောင်း သိရသည်။

ထို့အပြင် နိုင်ငံပိုင် အမှတ် ၂ သတ္တုတွင်း ဌာနသည် မြန်မာစစ်တပ်အတွက် ဝင်ငွေရအောင် လုပ်ဆောင်ပေးနေခြင်း ဖြစ်သည့် အတွက်ကြောင့် အရေးယူလိုက်ခြင်းဖြစ်ကြောင်းလည်း ထုတ်ပြန်ချက်တွင် ရေးသားထားသည်။

ထိုအရေးယူမှုသည် သတ္တမအကြိမ်မြောက် အရေးယူခြင်း ဖြစ်ပြီး၊ ထိုအရေးယူခံရသူများသည် မြန်မာနိုင်ငံတွင် အကြမ်းဖက်မှုများ၊ ဆိုးဝါးသည့် လူ့အခွင့်အရေး ချိုးဖောက်မှုများနှင့် နိုင်ငံ့တည်ငြိမ်အေးချမ်းမှုအတွက် ခြိမ်းခြောက်မှုများ ဆက်လက်ဖြစ်ပေါ်စေသည့်အတွက် အရေးယူလိုက်ခြင်းဖြစ်ကြောင်း သိရသည်။

စစ်ကောင်စီမှ အရပ်သားပြည်သူများကို နှိပ်စက်ညှဉ်းပန်းမှု၊ လိင် နှင့် ကျားမ အခြေပြုအကြမ်းဖက်မှု၊ အရပ်ဘက် လူမှုအဖွဲ့အစည်းများ၊ လူ့အခွင့်အရေးကာကွယ်စောင့်ရှောက်သူများနှင့် သတင်းသမားများကို ဖမ်းဆီးနှိပ်ကွပ်နေမှုများလည်း ဆက်တိုက်ရှိနေသည်။

ထို့အပြင် ဧပြီ (၁၀) ရက်တွင် စစ်ကောင်စီမှ လေကြောင်းတိုက်ခိုက်မှုများကို ဆက်တိုက်ပစ်ခတ်မှုရှိနေသည့်အပြင် လေကြောင်း တိုက်ခိုက်မှုကြောင့်လည်း အရပ်သား ၂၀၀ နီးပါး သေဆုံးမှု ဖြစ်ပွားသည့်အတွက် စစ်ကောင်စီ၏ ဆိုးဝါးသည့် လူ့အခွင့်အရေး ချိုးဖောက်မှုကို EU က ရှုပ်ချကြောင်းလည်း ဆိုသည်။

ယခုကဲ့သို့ အရေးယူ ဒဏ်ခတ်ထားသူများ၏ ပိုင်ဆိုင်မှုများကို (EU) မှ ထိန်းချုပ်မှာဖြစ်ပြီး ခရီးသွားခွင့် နှင့် EU အဖွဲ့ဝင်နိုင်ငံသားများ ငွေကြေး ဆက်သွယ် ထောက်ပံ့မှုများကိုပါ ပိတ်ပင် တားမြစ်လိုက်သည်။

ဇွန်လ ၂၁ ရက်တွင်လည်း စစ်ကောင်စီအတွက် နိုင်ငံခြားငွေ အဝင်၊ အထွက် နှင့် ငွေပေးချေမှုတို့တွင် အရေးပါသည့် မြန်မာ့နိုင်ငံခြားကုန်သွယ်မှုဘဏ် (MFTB) နှင့် မြန်မာ့ရင်းနှီးမြှုပ်နှံမှု နှင့် ကူးသန်းရောင်းဝယ်ရေးဘဏ် (MICB) တို့ကို အမေရိကန်ဘဏ္ဍာရေးဝန်ကြီးဌာနက ဒဏ်ခတ်ပိတ်ဆို့ အရေးယူခဲ့ကြောင်း သိရသည်။