တော်လှန်ရုပ်ရှင်ဖြစ်သည့် “မပြီးသေးဘူး ငါတို့အလှည့်ကျန်သေးတယ် ” ဇာတ်ကားကို “Asia Justice and Rights – AJAR” ၏ လူမှုကွန်ရက်စာမျက်နှာတွင် ယမန်နေ့ ( ဇူလိုင် ၁၉) ရက် ညက စတင်ပြသနေပြီ ဖြစ်ကြောင်း သတင်းရရှိသည်။

အဆိုပါ ဇာတ်ကားကို ဒါရိုက်တာ ဏကြီး မှ ရိုက်ကူးထားပြီး သရုပ်ဆောင် အောင်မြင့်မြတ်၊ ပိုင်ဖြိုးသု တို့က အဓိက ပါဝင် သရုပ်ဆောင်ထားသည်။

ထိုဇာတ်ကားသည် စစ်အာဏာသိမ်းပြီးနောက် တော်လှန်ရေးကာလအတွင်း ကြုံတွေ့ရတဲ့ အဖြစ်အပျက်များ ၊ လက်ရှိ ရှင်သန်ရင်ဆိုင် နေရသည့် အခင်းအကျင်း၊ ဖြတ်သန်းနေရသည့် လူမှုဝန်းကျင်၏ အမှန်တရားများကို ထင်ဟပ်ပုံဖော်ရိုက်ကူးထားသည့် တော်လှန်ရေး ရုပ်ရှင်ဖြစ်ကြောင်း သိရသည်။

အဆိုပါ ဇာတ်ကားကို ကမ္ဘာ့နိုင်ငံပေါင်း ၁၄ နိုင်ငံ၏ မြို့ပေါင်း ၃၇ မြို့တွင် ရုံတင်ပြသခဲ့ကြောင်း သိရသည်။

ထိုဇာတ်ကားကို ပြသရာတွင် ရရှိလာသည့် ရန်ပုံငွေများကို Army Representing Myanmar Society (A.R.M.S)၊ အညာတောင်ပံခတ်သံ၊ Voice of PDF အဖွဲ့များမှတဆင့် လှူဒါန်းမှုပြုလုပ်ခဲ့ကြောင်း၊ အချို့အဖွဲ့များကိုလည်း တိုက်ရိုက်လှူဒါန်းမှုများပြုလုပ်ခဲ့သည်။