ကရင်နီ (ကယား) ပြည်ရှိ စစ်ရှောင်များသည် ထွက်ပြေးတိမ်းရှောင်ချိန် ကြာလာသည်နှင့်အမျှ အကူညီပေးရေး ပိုမို ခက်ခဲလာနေကြောင်း စစ်ရှောင်ကူညီထံမှ သတင်းသိရသည်။
စစ်တပ်က အာဏာသိမ်းပြီးနောက်ပိုင်း ကရင်နီ (ကယား) ပြည်တွင် တိုက်ပွဲကြောင့် နေရပ်စွန့်ပြီး ထွက်ပြေးတိမ်းရှောင်နေရသူ ဦးရေ သိန်းနှင့်ချီ ရှိနေပြီး စားနပ်ရိက္ခာ ကူညီထောက်ပံ့ရေးအတွက် လက်ရှိမှာ အလှူရှင် ကြပ်တည်းလာခြင်း၊ ကုန်ဈေးနှုန်း အဆမတန် မြင့်တက်လာခြင်းကြောင့် အကူညီပေးရေးအတွက် ခက်ခဲလာနေသည်ဟု စစ်ဘေးရှောင်ကူညီသူ တစ်ဦးက ပြောသည်။
“ အကူအညီ လိုတာတော့ အများကြီးလိုပါတယ်။ စစ်ရှောင်စခန်းလည်း များလာတယ်လေ။ စခန်းတစ်ခုကို အိမ်ခြေ အနည်ဆုံး ၄၀ လောက်ရှိပြီး လူဦးရေက ၂ ရာကျော်ရှိတယ်။ တချို့စစ်ရှောင်တွေမှာ အိမ်ခြေ ၁၀၀ ကျော်၊ လူဦးရေ ၅၀၀ ကျော်တယ်။ တချို့စခန်းတွေမှာ အလှူရှင် မလာတာ ၃ လကျော်ရှိပြီ၊ ဆန်တွေလည်း ပြတ်နေတယ် “ ဟု ၎င်း စစ်ဘေးရှောင် ကူညီသူက ပြောသည်။
အဆိုပါ စစ်ရေးပြင်းထန်သည့် နယ်မြေဒေသ ဖြစ်သောကြောင့် ကုန်ဈေးနှုန်းသည် အဆမတန် မြင့်တက်နေရာ ဆန် ၂၄ ပြည်အိတ် ၁ အိတ်ကို ၈ သောင်းကျပ်အထိ မြင့်တက်နေကြောင်း သိရသည်။
ထို့အပြင် အလှူရှင်များထောက်ပံ့မှရသည့် စားနပ်ရိက္ခာများကို စစ်ရှောင်များအတွက် တစ်မိသားစုကို အနည်းဆုံး ဆန်၊ ဆီ၊ ဆား များ ခွဲဝေပေးလျက်ရှိသည်။
“တချို့ စစ်ဘေးရှောင်စခန်းက သွားရတာ အတော့်ကို ခက်ခဲတယ်။ လမ်းပန်းဆက်သွယ်ရေး ခက်ခဲတယ်။ နောက်ပြီးတော့ ကုန်ဈေးနှုန်းတွေ အရမ်းတက်တော့ ကျနော်မှာရှိတဲ့ ဝင်ငွေနဲ့ဝယ်ရတာ မမျှတတဲ့ နေရာတွေလည်း ရှိတာပေါ့နော်။ အဓိကတော့ ငွေကြေးရေး ခက်ခဲနေတာပေါ့ “ ဟု ၎င်း စစ်ရှောင်ကူညီသူက ထပ်လောင်းပြောသည်။
စစ်တပ်အာဏာသိမ်းပြီးနောက်ပိုင်း ကရင်နီ (ကယား) ပြည်အပါအဝင် နယ်စပ်ဒေသ၌ အရပ်သားပြည်သူ (၃၆၅) ဦး သတ်ဖြတ်ခံရပြီး စစ်ရှောင်ဦးရေ (၁၃၆) ဦး သေဆုံးကာ လေကြောင်းတိုက်ခိုက်မှု (၅၂၇) ကြိမ် တိုက်ခိုက်ခံရကြောင်း တိုးတက်သော ကရင်နီပြည်သူ့အင်အားစု PKPF က ဇူလိုင် ၁ ရက်တွင် ထုတ်ပြန်ထားသည်။
