သျှမ်းပြည် လားရှိုးခရိုင်၊ လားရှိုးမြို့မဈေးအတွင်း ဖွင့်လှစ်ထားသည့် “ဇွဲထက်” ရွှေဆိုင်ရှေ့ ဗုံးပေါက်ကွဲမှု ဖြစ်ပွားပြီး သည့်နောက်တွင် ဒေသခံ အမျိုးသား နှစ်ဦးထက်မနည်း ဖမ်းဆီးခံရမှု ရှိနေကြောင်း စုံစမ်းသိရသည်။
ပြီးခဲ့သည့် ဇူလိုင်လ ၁၅ ရက်နေ့ မနက်ပိုင်းအချိန်တွင် ဗုံးပေါက်ကွဲမှု ဖြစ်ပွားခြင်း ဖြစ်ပြီး အဆိုပါ ဗုံးပေါက်ကွဲမှု အပြီးတွင် စစ်ကောင်စီ တပ်သားများက အမှတ် (၁၀) ရပ်ကွက်၊ နယ်မြေ (၄) တွင် နေထိုင်သည့် အမျိုးသား ၂ ဦးကို ဖမ်းဆီးခေါ်ဆောင်သွားကြောင်း ဒေသခံများက သျှမ်းသံတော်ဆင့်ကို ပြောသည်။
“ဗုံးပေါက်ကွဲမှု နဲ့ ပတ်သက်ပြီး ဖမ်းတာတော့ မဟုတ်လောက်ပါဘူး။ တခြား အကြောင်းအရာနဲ့ ဖမ်းတယ်လို့ပဲ ထင်တယ်။ ဘာကြောင့် အဲ့လိုထင်ရလဲဆိုရင် ဒီ ဗုံးပေါက်ကွဲမှုက ပြည်သူတွေ လုပ်နိုင်မှာမှ မဟုတ်တာ။ လက်နက်ကိုင်တွေ အဖွဲ့အစည်းတွေကပဲ အဲ့လို လက်နက်ရှိတာလေ။ ဒါတော့ တခြားက ကိစ္စကြောင့် ဖမ်းတာ ဖြစ်နိုင်တယ်” ဟု လားရှိုးမြို့ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ဖမ်းဆီးခံရသူ နှစ်ဦးသည် လားရှိုးမြို့ ရပ်ကွက် ၁၀ ၊ နယ်မြေ ၄ တွင် နေထိုင်သည့် လုံးအိုက်ခမ်း နှင့် လုံးအိုက်ရွှေတို့ ဖြစ်ကြပြီး စစ်ကောင်စီ စစ်ကား ၂ စီးဖြင့် လာရောက်ဖမ်းဆီးခြင်း ဖြစ်ကြောင်းလည်း သိရသည်။
“တစ်ယောက် တစ်နေရာစီ သွားဖမ်းကြတာပါ၊ သူတို့ အပြင် တခြားသူတွေလည်း ဖမ်းဆီးခံရတာတွေ ရှိတယ်။ အဲ့တာတွေတော့ စာရင်း မသိရဘူး၊ ဒါကြောင့် ဖမ်းဆီးခံရတဲ့ သူတွေက နှစ်ဦးထက်တော့ ပိုတယ်။” ဟု အထက်ပါ လားရှိုးဒေသခံက သျှမ်းသံတော်ဆင့်ကို ဆက်ပြောသည်။
လားရှိုးမြို့မှ ဇွဲထက် ရွှေဆိုင် ဗုံးပေါက်ကွဲမှုတွင် ဆိုင်ဝန်ထမ်း တစ်ဦး သေဆုံးရသည့်အပြင် ထိခိုက်ဒဏ်ရာ ပြင်းထန်သည့် ဝန်ထမ်း ၃ ဦး အပါအဝင် ထိခိုက်ဒဏ်ရာရသူ စုစုပေါင်း ၁၃ ဦး ရှိနေကြောင်းလည်း သိရသည်။
ယင်းပေါက်ကွဲမှု နှင့် ပတ်သက်ပြီး လက်နက်ကိုင် အဖွဲ့အစည်းမှ အခွန်ဆက်ကြေး တောင်းယူမှု နှင့် ဆက်စပ် ပတ်သက်နိုင်ကြောင်းလည်း ဒေသခံများက ပြောဆို ဝေဖန်နေကြသည်။
ပြီးခဲ့သည့် ဇွန်လတွင်လည်း လားရှိုးမြို့ရှိ Fully Light Hotel မှ ဗုံးပေါက်ကွဲမှု နှစ်ကြိမ်၊ Golden Hill Hotel တွင် ဗုံးပေါက်ကွဲမှု တစ်ကြိမ် နှင့် အသောက စက်သုံးဆီပန့် ဆီဆိုင်တွင် ပေါက်ကွဲမှုတစ်ကြိမ် ဖြစ်ပွားခဲ့သည်။
