သျှမ်းပြည် ပင်လောင်းမြို့ တောင်ဘက် အထွက်နားရှိ စစ်ကောင်စီ၏ အမှတ် (၄) လေ့ကျင့်ရေး တပ်စခန်းမှ ထွက်ပြေးသည့် တပ်သားတစ်ဦးကို ပြန်လည်ဖမ်းမိပြီး သေဆုံးသည်အထိ ရိုက်နှက်မှု ဖြစ်ပွားခဲ့ကြောင်း စုံစမ်း သိရသည်။
ပြီးခဲ့သည့် ဇူလိုင်လ (၁၂) ရက်တွင် ကိုကြွက်နီ (အပေါင်းအသင်းများမှ ခေါ်သောနာမည်၊ နာမည်အရင်းမသိရ) အပါအဝင် တပ်သား ၅ ဦး ထက်မနည်းသည် စစ်ကောင်စီ၏ အမှတ် (၄) လေ့ကျင့်ရေး တပ်စခန်းမှ ထွက်ပြေးခဲ့ရာ ကိုကြွက်နီက ပြန်လည်ဖမ်းဆီးခံရပြီး သေဆုံးသည် အထိ ရိုက်နှက်ခံရကြောင်း အတူထွက်ပြေးလွတ်မြောက် သည့် တပ်သား တစ်ဦးက သျှမ်းသံတော်ဆင့်ကို ပြောသည်။
“ထွက်ပြေးခဲ့တုန်းကတော့ ကျနော်တို့ အတူတူ ထွက်ပြေးခဲ့ကြတာပါ၊ ဒါပေမဲ့ ကိုကြွက်နီက လူစုနဲ့ ကွဲပြီး လမ်းမှား သွားတာ၊ သူ့ကို ပြန်ဖမ်းမိသွားတယ်၊ သူ့ကို ရိုက်နှက် စစ်ဆေးကြတာပေါ့ဗျာ၊ သူဆုံးသွားပြီ” ဟု ကိုကြွက်နီ နှင့် အတူ အတူထွက်ပြေးလွတ်မြောက်သည့် တပ်သား တစ်ဦးက သျှမ်းသံတော်ဆင့်ကို ပြောသည်။
ကိုကြွက်နီ သေဆုံးမှု နှင့် ပတ်သက်ပြီး ဇူလိုင်လ ၁၃ ရက်တွင် စစ်ကောင်စီတပ်ဖွဲ့က မိသားစုဝင်များကို နှလုံးသွေးကြောကျဉ်းမှုကြောင့် သေဆုံးခြင်း ဖြစ်သည်ဟု အကြောင်းကြားခဲ့ကြောင်းလည်း သိရသည်။
လက်ရှိတွင် သေဆုံးသည့် ကိုကြွက်နီ၏ ရုပ်အလောင်းကို ကလောမြို့ရှိ ကုတင် ၁၀၀ ဆံ့ စစ်ဆေးရုံသို့ ပို့ဆောင် ထားပြီး မိသားစုဝင်များက တွေ့ခွင့်တောင်းထားကြောင်းလည်း သိရသည်။
“သူ့မိသားစုဝင်တွေကို နှလုံးသွေးကြောကျဥ်းရောဂါ နဲ့ သေသွားတယ်လို့ အကြောင်းကြားလိုက်တယ်။ ခုလည်း ကုတင် ၁၀၀ ဆံ့ စစ်ဆေးရုံက ရင်ခွဲရုံကို ပို့ထားနေတယ်ဆိုလို့ မိသားစုဝင်တွေက တွေ့ခွင့်၊ အလောင်းပြန်ရခွင့် တောင်းနေတယ်။ ရ၊ မရတော့ မသိဘူး” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
သေဆုံးသူ ကိုကြွက်နီသည် အသက် ၂၀ ဝန်းကျင်အရွယ် လူငယ် တစ်ဦးဖြစ်ပြီး အမှတ် (၄) စစ်ကောင်စီ လေ့ကျင့်ရေး တပ်စခန်းအတွင်း ရောက်လာသည်မှာ တစ်နှစ်နီးပါးရှိပြီဖြစ်ကြောင်းလည်း တပ်နှင့် နီးစပ်သူများထံမှ သိရသည်။
အဆိုပါ အမှတ် (၄) လေ့ကျင့်ရေး တပ်စခန်းအတွင်းတွင် သင်တန်းသား ၂၀၀ နီးပါး ရှိနေပြီး အများစုက အဓမ္မ စစ်သားစုဆောင်းခံရသူများ ဖြစ်ကြောင်းလည်း သိရသည်။
