သျှမ်းပြည် ကျောက်မဲခရိုင်၊ မိုင်းငေါ့မြို့နယ် (ခွဲ) မှ နမ့်တွေကျေးရွာအနီး ဖြစ်ပွားသည့် တအာင်း (ပလောင်) အမျိုးသား လွတ်မြောက်ရေး တပ်ဖွဲ့ (TNLA) နှင့် အာဏာသိမ်း စစ်ကောင်စီတို့ အကြား တိုက်ပွဲအပြီးတွင် အရပ်သား နှစ်ဦးက မိုင်းနင်းမိခဲ့ကြောင်း စုံစမ်း သိရသည်။
ဇူလိုင်လ ၁၀ ရက်နေ့တွင် ဖြစ်ပွားသည့် စစ်ကောင်စီ နှင့် တအာင်း(ပလောင်) တပ်ဖွဲ့ (TNLA) တို့၏ တိုက်ပွဲအပြီး ဒေသခံ အမျိုးသား တစ်ဦး နှင့် အမျိုးသမီး တစ်ဦးတို့က မိုင်းနင်းမိပြီး ထိခိုက်ဒဏ်ရာရသွားကြောင်း ဒေသခံများက သျှမ်းသံတော်ဆင့်ကို ပြောသည်။
“နမ့်တွေရွာ အနီးမှာ မိုင်းနင်းမိပေါက်ကွဲတာပါ။ အမျိုးသားဖြစ်သူက ခြေထောက်တွေ၊ ဝမ်းဗိုက်တွေမှာ ထိခိုက် ဒဏ်ရာ ရသွားတယ်၊ အမျိုးသမီးကတော့ ခြေကျင်းဝတ် နဲ့ လက်မောင်းတွေမှာ ဒဏ်ရာပြင်းထန်တယ်၊ နားရွက် မှာလည်း မိုင်းစတွေ ထိထားတယ်”ဟု ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ မိုင်းနင်းမိ ဒဏ်ရာရသည့် အမျိုးသား နှင့် အမျိုးသမီးကို တအာင်း (ပလောင်) အမျိုးသား လွတ်မြောက်ရေး တပ်မတော် TNLA မှ လက်ခံ ဆေးကုသပေးနေကြောင်းလည်း TNLA မှ ထုတ်ပြန်ထားသည်။
ပေါက်ကွဲမှု ဖြစ်သည့် မိုင်းကို မည်သည့်လက်နက်ကိုင်တပ်ဖွဲ့မှ ထောင်ထားသည်ကို မသိရကြောင်း နှင့် TNLA တပ်ဖွဲ့မှလည်း အသေးစိတ် ထုတ်ပြန်ထားခြင်း မရှိပေ။
မိုင်းပေါက်ကွဲမှု မဖြစ်ခင် အဆိုပါ နေရာအနီးတစ်ဝိုက်၌ TNLA တပ်ဖွဲ့ နှင့် စစ်ကောင်စီတို့၏ ထိတွေ့တိုက်ပွဲလည်း ဖြစ်ပွားခဲ့ကြောင်း ဒေသခံများက သျှမ်းသံတော်ဆင့်ကို ဆက်ပြောသည်။
“အဲ့နေ့က TNLA နဲ့ စစ်ကောင်စီနဲ့ တိုက်ပွဲဖြစ်သေးတယ်လေ၊ အဲ့တိုက်ပွဲ အပြီး ဈေးသွားဝယ်တဲ့ အဲ့နှစ်ဦးက မိုင်းကို နင်းမိတာ၊ ဒီမိုင်းက ဘယ်တပ်ဖွဲ့က ထောင်ထားမှန်းတော့ မသိရဘူး” ဟု အထက်ပါ ဒေသခံက သျှမ်းသံတော်ဆင့်ကို ပြောသည်။
ပြီးခဲ့သည့် ဇူလိုင်လ ၁၁ ရက်နေ့မှာလည်း အာဏာသိမ်း စစ်ကောင်စီ နှင့် TNLA တပ်ဖွဲ့တို့က မူဆယ်မြို့နယ်၊ ၁၀၅ မိုင်အနီး ထိတွေ့တိုက်ပွဲ ဖြစ်ပွားခဲ့ပြီး TNLA တပ်ဖွဲ့ဝင် တစ်ဦးကျဆုံးပြီး နှစ်ဦးထိခိုက်ဒဏ်ရာ ပြင်းထန်စွာ ရရှိသွားကြောင်းလည်း သိရသည်။
ယခု ဇူလိုင်လအတွင်းတွင် အာဏာသိမ်း စစ်ကောင်စီတပ်ဖွဲ့သည် TNLA တပ်ဖွဲ့ လှုပ်ရှားရာ နယ်မြေအတွင်းသို့ စစ်အင်အားဖြည့် လှုပ်ရှားမှုများ ခပ်စိပ်စိပ် ဖြစ်လာကြောင်း TNLA ပြန်ကြားရေးမှ သတင်း ထုတ်ပြန် ထားသည်။
