စစ်ကောင်စီ လက်အောက်ခံ အစိုးရကျောင်း မဟုတ်သည့် ကိုယ်ပိုင်ကျောင်းများသည် စစ်ကောင်စီ၏ သတ်မှတ်စည်းကမ်း နှင့်အညီ လိုက်နာဆောင်ရွက်ရမည်ဖြစ်ပြီး မလိုက်နာပါက ကျောင်းပိတ်ရသည့်အထိ အရေးယူသွားမည်ဟု ဖိအားပေး ခံနေရကြောင်း စုံစမ်း သိရသည်။
စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတွင် ပညာရေးစနစ် ကျဆင်းလာရာမှ လူငယ်များသည် စစ်အာဏာရှင် ပညာရေး စနစ်ဆိုသည့် အစိုးရကျောင်းကို ဆက်မတက်ချင်သောကြောင့် ကိုယ်ပိုင်ကျောင်းများ၌ ဆက်လက် ပညာသင်ကြား နေကြသည်။
“ကျမတို့ကတော့ ဖွင့်လာတာကြာပြီ အဲ့ကျောင်းက စည်းကမ်းတွေက သိပြီးသားပါ။ အခုဟာက မသိတော့ပါဘူး။ ကျောင်းသားစာရင်းတွေ ပြန်တောင်းပြီး ပြန်လုပ်နေကြတာ။ အခု အစိုးရခေတ်က ဘာတွေလုပ်မှန်းကို မသိတော့ဘူး“ ဟု တောင်ကြီးမြို့ အမည်မဖော်လိုသူ ကိုယ်ပိုင်ကျောင်းဖွင့်လှစ်သူ တစ်ဦးက ပြောသည်။
အဆိုပါ အစိုးရကျောင်း မဟုတ်သည့် ပုဂ္ဂလိက ကိုယ်ပိုင်ကျောင်းများသည် နှစ်စဉ်နှစ်တိုင်း တစ်နှစ်တစ်ကြိမ်ခန့် စစ်ဆေးမေးမြန်းမှု ရှိသော်လည်း အာဏာသိမ်းပြီးနောက်ပိုင်း ကျောင်းသူ၊ ကျောင်းသားများက ကိုယ်ပိုင်ကျောင်းများ၌ ရွှေ့ပြောင်း ပညာသင်ကြားလာသည့်အပေါ် ဖိအားပေး ခံနေရခြင်း သိရသည်။
ထို့အပြင် ကိုယ်ပိုင်ကျောင်းများတွင် ပညာရေးကျောင်းစာအပြင် လက်ရှိတွင် ဂီတ၊ ကွန်ပျူတာသင်တန်း၊ ဘာသာစကား စသည်ဖြင့် ပညာရပ်များ ထည့်သွင်းသင်ကြားလာသောကြောင့် ကျောင်းသူ၊ ကျောင်းသား ဦးရေ ပိုများလာနေကြောင်း သိရသည်။
“ဒီနှစ် ကျောင်းမှာတော့ ကျောင်းသား၊ ကျောင်းသူတွေ ပိုများလာတာပေါ့။ ကျောင်းမှာလည်း ကျောင်းစာတွေ အပြင် ဂီတတွေ၊ ကွန်ပျူတာတွေ၊ ဘာသာစကားတွေ သင်ပေးတယ်လေ။ အခု နိုင်ငံခြားတွေသွားရင် မျက်နှာမငယ်ရအောင်လို့ ဘာသာစကားတွေမှာလည်း အင်္ဂလိပ်အပြင် တရုတ်တွေလည်း သင်ပေးတယ် “ ဟု ၎င်းက ထပ်လောင်းပြောသည်။
အလားတူ ယခုနှစ် ၂၀၂၃ -၂၀၂၄ ပညာသင်နှစ် စာသင်ကျောင်းတွင် နိုင်ငံရေး မသင်ကြားရန်နှင့် ကျောင်းသားများကို နိုင်ငံရေး နှင့် ပတ်သက်ပြီး သင်ကြားပို့ချခြင်း မပြုလုပ်ရန် စစ်ကောင်စီက မှာကြားထားကြောင်း CDM ဆရာများထံမှ သိရှိရသည်။
