ငြိမ်းချမ်းရေး ညီလာခံ ပြုလုပ်ရန် အတွက် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည် တပ်မတော် (RCSS/SSA) နှင့် စစ်ကောင်စီ လက်အောက်ခံ အမျိုးသား စည်းလုံးညီညွှတ်ရေး နှင့် ငြိမ်းချမ်းရေး ဖော်ဆောင်မှု ညှိနှိုင်းရေး ကော်မတီ NSPNC တို့ နေပြည်တော်တွင် တွေ့ဆုံဆွေးနွေးခဲ့ကြောင်း သတင်းရရှိသည်။
RCSS/SSA နှင့် NSPNC တို့သည် ငြိမ်းချမ်းရေး ညီလာခံ ပြုလုပ်ရန် နှင့် ၂၀၀၈ ဖွဲ့စည်းပုံပြင်ဆင်ရေး တို့နှင့်ဆိုင်သည့် ကိစ္စရပ်များကို ယမန့် (ဇူလိုင် ၁၁)ရက် တွင် နေပြည်တော်၌ တွေ့ဆုံဆွေးနွေးခဲ့ကြောင်း စစ်ကောင်စီ၏ လက်အောက်ခံ The Global News Light of Myanmar တွင်ရေးသားထားသည်။
“၂၀၀၈ ဖွဲ့စည်းပုံ ပြင်ဆင်ရေး၊ ယခင်ဆွေးနွေးပွဲတွေမှာ သဘောတူထားတဲ့ အချက်တွေ အကောင်အထည်ဖော် ဆောင်ရွက်နိုင်ရေး၊ ငြိမ်းချမ်းရေး ညီလာခံကျင်းပရေး၊ ဒေသတည်ငြိမ်အေးချမ်းရေး၊ မူးယစ်ဆေးဝါး တိုက်ဖျက် ရေး၊ ဖွံ့ဖြိုးရေးကိစ္စနှင့် လူသားချင်းစာနာမှုဆိုင်ရာ အကူအညီပံ့ပိုးရေး စတာတွေကို အပြန်အလှန် ဆွေးနွေးညှိနှိုင်းခဲ့တယ်” ဟု စစ်ကောင်စီ လက်အောက်ခံ သတင်းစာတွင် ရေးသားထားသည်။
အဆိုပါ တွေ့ဆုံဆွေးနွေးမှုတွင် စစ်ကောင်စီ လက်အောက်ခံ NSPNC အတွင်းရေးမှူး ဒုတိယဗိုလ်ချုပ်ကြီး ဝင်းဗိုလ်ရှိန် နှင့် ညှိနှိုင်းရေးကော်မတီအဖွဲ့ဝင်များ၊ RCSS/SSA မှ အတွင်းရေးမှူး (၁) ဗိုလ်မှူးကြီး စဝ်စိုင်းငင်း၊ ဗဟို အလုပ် အမှုဆောင် ကော်မတီဝင် ဗိုလ်မှူးကြီး စဝ်ဆောင်းဟန် နှင့် ဗဟိုဦးစီးကော်မတီဝင် စဝ်စိုင်းဟန်တို့ တက်ရောက်နေကြောင်း လည်း သိရသည်။
ယင်းကဲ့သို့ တွေ့ဆုံဆွေးနွေးမှု နှင့် ပတ်သက်ပြီး အသေးစိတ် မေးမြန်း သိရှိနိုင်ရန် သျှမ်းပြည်ပြန်လည် ထူထောင် ရေးကောင်စီ၊ သျှမ်းပြည် တပ်မတော် (RCSS/SSA) မှ တာဝန်ရှိသူများ၊ ပြောရေးဆိုခွင့်ရှိသူများထံသို့ ဖုန်းဆက် သွယ်ခဲ့သော်လည်း ဖုန်းလက်ခံ ဖြေကြားခြင်း မရှိပေ။
ထို့ပြင် ဇူလိုင် ၅ ရက်နှင့် ၆ ရက်တွင်လည်း မွန်ပြည်သစ်ပါတီ (NMSP) နှင့် စစ်ကောင်စီ လက်အောက်ခံ NSPNC တို့သည် နေပြည်တော်၌ တွေ့ဆုံခဲ့သေးကြောင်း သိရသည်။
ပြီးခဲ့သည့် ဇွန်လ ၁၅ ရက် မှ ၁၇ ရက်အထိ ထိုင်းနိုင်ငံ ချင်းမိုင်မြို့တွင် ပြုလုပ်ခဲ့သည့် PPST အဖွဲ့ဝင် ခေါင်းဆောင်များ မျက်နှာစုံညီ အစည်းအဝေး ဆုံးဖြတ်ချက်အရ PPST အဖွဲ့ဝင် (၅) ဖွဲ့မှ စစ်ကောင်စီ နှင့် အတူ တွေ့ဆုံရန် သဘောတူသော်လည်း RCSS/SSA နှင့် မွန်ပြည်သစ်ပါတီ (NMSP) တို့က သီးသန့်တွေ့ဆုံရန် သဘောတူ ဆုံးဖြတ်ခဲ့ကြောင်း ချင်းမိုင်မြို့က တွေ့ဆုံဆွေးနွေးမှု အပြီးတွင် PPST ၏ ပြောရေးဆိုခွင့် ရှိသူ ဗိုလ်မှူးကြီး စောကျော်ညွှန့်က သျှမ်းသံတော်ဆင့်ကို ပြောခဲ့သည်။
“ကျနော်တို့ NCA-S EAO (၇) ဖွဲ့ မျက်နှာစုံညီ အစည်းအဝေးက ရရှိတဲ့ သဘောတူ ဆုံးဖြတ်ချက်တစ်ခုလို့ ပြောရမှာ ပေါ့နော်။ NSPNC နဲ့ တွေ့ဆုံမှု မှာ RCSS နဲ့ NMSP တို့က သီးသန့်အဖွဲ့ အနေ နဲ့ သွားမယ် ဆိုပေမယ့် ကျနော်တို့ EAO ကြားမှာ (၇) ဖွဲ့လုံး သဘောတူညီ ထားတဲ့ အတိုင်း တူတာကို တွဲလုပ်မယ်၊ မတူတာကို ခွဲလုပ်မယ် ဆိုပြီးတော့ ငြိမ်းချမ်းရေးလုပ်ငန်းစဥ်တွေကို ရှေ့ဆက် လုပ်ဆောင်သွားမှာပါ။”ဟု PPST ပြောရေးဆိုခွင့် ရှိသူ ဗိုလ်မှူးကြီး စောကျော်ညွှန့်က သျှမ်းသံတော်ဆင့်ကို ပြောသည်။
ယခုတစ်ကြိမ် တွေ့ဆုံဆွေးနွေးမှုသည် RCSS/SSA တပ်ဖွဲ့နှင့် NSPNC တို့၏ သီးသန့် တွေ့ဆုံဆွေးနွေးမှု ဖြစ်နေပြီး ပြီးခဲ့သည့် ဇွန်လ ၂၆ မှ ၂၈ ရက်နေ့အထိ PPST အဖွဲ့ဝင် (၅) ဖွဲ့ကလည်း စစ်ကောင်စီ လက်အောက်ခံ NSPNC နှင့် တွေ့ဆုံ ဆွေးနွေးမှု ရှိခဲ့သည်။
