သျှမ်းပြည် ကျိုင်းတုံခရိုင် မိုင်းပျဉ်းမြို့ ရှိ စစ်ကောင်စီ စစ်ဆေးရေးဂိတ်တွင် ထိုင်းထုတ်ကုန်တင်လာသည့် လိုင်းကားများကို ဖမ်းပြီး ငွေညှစ်တောင်းနေကြောင်း စုံစမ်း သိရသည်။
စစ်တပ်အာဏာသိမ်းပြီးနောက်ပိုင်း မိုင်းပျဉ်းမြို့ရှိ စစ်ကောင်စီ စစ်ဆေးရေးဂိတ်တွင် ယခင်ထက် စစ်ဆေးရေး တင်းကြပ်လာပြီး ထိုင်းထုတ်ကုန်တင်လာသည့် လိုင်းကားများကို အခွန်မဆောင် (ဂျူတီမဲ့) ပစ္စည်းများတင်လာသည်ဟု ပြောဆိုပြီး ငွေညစ်တောင်းခံမှု ပြုလုပ်နေကြောင်း ကားသမားများက သျှမ်းသံတော်ဆင့်ကို ပြောသည်။
“ ဂျူတီမဲ့ (အခွန်မဆောင်) ပစ္စည်းတင်လာလို့ ဖမ်းတယ်လို့ ပြောတာပဲ။ သူတို့ဖမ်းပြီဆိုရင် ကုန်ပစ္စည်းဈေးနှုန်းကို ပေါက်ဈေးအတိုင်း ပြန်ရွေးခိုင်းတာ။ ပြီးတော့ ဈေးနှုန်းအတိုင်း နိုင်ငံတော်ကို အခွန် ၃ ရာခိုင်နှုန်း ဆောင်ခိုင်းတယ်။ ပြီးတော့ ကားကိုလည်း ကုန်ပစ္စည်းဈေးနှုန်းပေါက်သလို ရွေးခိုင်းတယ် “ ဟု အဆိုပါ ဒေသတွင် ပြေးဆွဲနေသည့် ကားသမားတစ်ဦးက သျှမ်းသံတော်ဆင့်ကိုပြောသည်။
အဆိုပါ လိုင်းကားတစ်စီး ကုန်ပစ္စည်း တန်ဖိုး ကျပ်သိန်း ၁၀၀ တင်ဆောင်လာပါက အခွန်မဆောင်သည့်ပစ္စည်း တင်လာသည်ဟုဆိုပြီး ကုန်ပစ္စည်းကို ပေါက်ဈေးအတိုင်း ကျပ်သိန်း ၁၀၀ ပြန်ရွေးယူရကြောင်း၊ ကားကိုလည်း ကုန်ပစ္စည်း ပေါက်ဈေးအတိုင်း ကျပ်သိန်း ၁၀၀ ပြန်ရွေးရသဖြင့် စုစုပေါင်း ကျပ်သိန်း ၂၀၀ ကုန်ကျကြောင်း ကိုယ်တိုင်ကြုံတွေ့ခဲ့ရသည့် ကားသမားက ပြောသည်။
စစ်ကောင်စီမှ သတ်မှတ်ထားသော အခွန်မဆောင်သည့် ထိုင်းနိုင်ငံထုတ် စားသောက်ကုန်၊ ကုန်ကြမ်း၊ အသား၊ သစ်သီး၊ အလှကုန် စသည်ဖြင့် အမျိုးပေါင်း ၁၀၀ ကျော်ရှိကြောင်း သိရသည်။
“ အဲ့ကုန်တွေကို နယ်စပ်တံတားပေါ်ကပဲ အခွန်ဆောင်ပြီး ကူးလာကြတာ။ ဖမ်းရင် လိုင်စင်မဲ့ကားတွေကိုဖမ်းရမှာလေ။ အခုက လိုင်းကားတွေကိုဖမ်းနေတာ ကုန်တွေကိုဖမ်းနေတာ မဟုတ်သေးဘူး။ ကားသမားတွေ မွဲအောင်လုပ်နေတာ။ တရားဝင်နိုင်ငံတော်ကို အခွန်ဆာင်ပြီး ပြေးဆွဲနေတဲ့လိုင်းကားတွေကိုပဲ လာလာဖမ်းနေတော့ အဖမ်းခံရတဲ့ ကားဆရာနဲ့ အုံနာတွေက နစ်နာတာ” ဟု ၎င်း လိုင်းကားပြေးဆွဲသူ အမျိုးသားက ထပ်လောင်းပြောသည်။
စစ်တပ်က အာဏာသိမ်းပြီးနောက်ပိုင်း သျှမ်းပြည်တွင်းရှိ ကားလမ်းမကြီးပေါ်ရှိ စစ်ကောင်စီ စစ်ဆေးရေး ဂိတ်သည် ယခင်ထက် ပိုမိုတိုးချဲလာနေပြီး ခရီးသွားပြည်သူ၊ ကုန်တင်ကား၊ လိုင်းကားများကို အကြောင်းပြချက် အမျိုးမျိုးဖြင့် ပိုက်ဆံတောင်းခံနေလျက် ရှိကြောင်း သိရသည်။
