သျှမ်းပြည် တာချီလိတ်ခရိုင်၊ တာချီလိတ်မြို့ရှိ နာမည်ကြီး Harry Potter KTV အပါအဝင် အခြား နာမည်ကြီး KTV (၅) ခုကို ယာယီ ပိတ်သိမ်းရန် ညွှန်ကြားခြင်း ခံရကြောင်း စုံစမ်းသိရသည်။
ယမန်နေ့ (ဇူလိုင် ၆) ရက်တွင် တာချီလိတ်မြို့မှ စစ်ဆေးရေး တာဝန်ရှိသူများ နှင့် ရဲတပ်ဖွဲ့ဝင်တို့က တာချီလိတ်မြို့ရှိ KTV ရုံများကို ဝင်ရောက်စစ်ဆေးရာ သတ်မှတ်ထားသည့် စည်းကမ်းချက်များ ကိုက်ညီမှု မရှိသည့်အတွက် ယာယီပိတ်သိမ်းရန် ညွှန်ကြားခံလိုက်ရခြင်း ဖြစ်ကြောင်း ပိတ်ခံရသည့် KTV မှ ဝန်ထမ်း တစ်ဦးက သျှမ်းသံတော်ဆင့်ကို ပြောသည်။
“အသေးစိတ် ဖြစ်စဥ်တော့ မသိရပါဘူး။ တာဝန်ရှိသူတွေက မန်နေဂျာ နဲ့ စကားလာပြောတယ်၊ သူတို့ဆီကို တိုင်ချက်တွေ အရောက်များလို့ လာရောက်စစ်ဆေးရတာပါတဲ့၊ ပြီးတော့ ဆေးတွေပါ ရနေသလား ဆိုပြီး မေးတယ်၊ အခုတော့ ရုံကို ယာယီပိတ်ဖို့ ညွှန်ကြားပေမဲ့ ပြန်ဖွင့်နိုင်ဖို့ကတော့ လူကြီးတွေ အချင်းချင်း ညှိနေတုန်းပဲ” ဟု ပိတ်ခံရသည့် KTV မှ ဝန်ထမ်းတစ်ဦးက သျှမ်းသံတော်ဆင့်ကို ပြောသည်။
ယာယီပိတ်သိမ်းရန် ညွှန်ကြားခံရသည့် KTV များသည် တာချီလိတ်မြို့နယ်ရှိ ဝိန်းကျောက် ရပ်ကွက်မှ ရွှေဘူးသီး KTV၊ ကြီးမြတ်သောရွှေမြင်း PUB၊ ကိုးထပ် KTV၊ DAT Bar & KTV နှင့် Harry Potter KTV တို့ ဖြစ်ကြကြောင်း စုံစမ်းသိရသည်။
အဆိုပါ KTV များသည် သတ်မှတ်ထားသည့် စည်းကမ်းချက်များနှင့် ကိုက်ညီမှု မရှိဟု တာဝန်ရှိသူများမှ ပြောဆို သော်လည်း မည်သည့် အကြောင်းကြောင့်ဖြစ်သည်ကို တိတိကျကျ ထုတ်ပြန်ပြောဆိုထားခြင်း မရှိပေ။
ထို့အပြင် လက်ရှိ ပိတ်သိမ်းခံရသည့် KTV များသည် တာချီလိတ်မြို့မှ နာမည်ကြီး KTV များဖြစ်နေပြီး တရုတ် နိုင်ငံထုတ် မူးယစ်ဆေးဝါး အသစ်တမျိုးကိုလည်း စမ်းသုံးနေကြသည့် သတင်းများလည်း ထွက်ပေါ်နေကြောင်း ခိုင်မာသည့် သတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။
“အခု သတင်းကြားမိတာက အဲ့ဒီ တရုတ်နိုင်ငံထုတ် မူးယစ်ဆေး အသစ်တစ်မျိုးကို စမ်းသုံးနေကြလို့ တချို့ KTV က ကောင်မလေးတချို့ မခံနိုင်လို့ အသက်ဆုံးရှုံးရတာလည်း ရှိနေတယ်။ သတင်းတွေကို အမှောင်ချထားလို့သာ လူတွေ သိပ်မသိကြဘူး၊ အဲ့ဒီ ဆေးက K တွေ၊ E တွေ သုံးရသလိုမျိုးပဲ၊ ဒါပေမဲ့ အားအရမ်းပြင်းတယ်တဲ့” ဟု တာချီလိတ်မြို့နေ အမျိုးသား တစ်ဦးက သျှမ်းသံတော်ဆင့်ကို ပြောသည်။
တာချီလိတ်မြို့ KTV များသို့ ဝင်ရောက်လာသည့် အများစုသည် မြန်မာလူမျိုး ကုန်သည်များ၊ စီးပွားရေးလုပ်ငန်းရှင် များအပြင် ထိုင်း၊ တရုတ်၊ ဗီယက်နမ်တို့မှ ကုန်သည်များ၊ ခရီးသည်များကလည်း လာရောက်ပျော်ပါးလေ့ ရှိကြောင်း သိရသည်။
တာချီလိတ်မြို့သည် မြန်မာ – ထိုင်း နယ်စပ်မြို့ဖြစ်သည့်အပြင် အလုပ်အကိုင် အခွင့်အလမ်းအများစုမှာ KTV၊ Bar၊ ကလပ်၊ တရားမဝင် ကာစီနို နှင့် အွန်လိုင်း လောင်းကစားလုပ်ငန်းများ ပေါများလာသည့်အပြင် ထိုင်း၊ တရုတ်၊ ဗီယက်နမ် နှင့် လာအို မှ စီးပွားရေးသမားများ၊ အလုပ်သမားများ တရားမဝင်လာရောက်နေထိုင်ကြသည်။
