ကချင်ပြည် KIO ဗဟိုဌာနချုပ် အနီးရှိ နမ်ဆန်ယန်ကျေးရွာမှာ စစ်ကောင်စီ နှင့် KIA ကချင်လွတ်လပ်ရေးတပ်မတော် (KIA) တို့ စစ်ရေးတင်းမာနေသေးကြောင်း စုံစမ်းသိရှိရသည်။
ပြီးခဲ့သည့် ဇူလိုင် (၃) ရက်ကစပြီး စစ်ကောင်စီသည် လက်နက်ကြီး လက်နက်ငယ် ပစ်ခတ်မှုကြောင့် နမ်ဆန်ယန်ကျေးရွာရှိ ဒေသခံ ပြည်သူများ စစ်ဘေးတိမ်းရှောင်နေရကြောင်း KIO ဗဟိုဌာနချုပ် သတင်း နှင့် ပြန်ကြားရေးတာဝန်ခံ ဗိုလ်မှူးကြီးနော်ဘူက သျှမ်းသံတော်ဆင့် ကို ပြောသည်။
“ဒီနေ့ ပစ်ခတ်မှုက ငြိမ်သက်နေပြီး မနေ့ကတော့ လက်နက်ကြီးတွေနဲ့ ပစ်ခတ်တာတွေရှိတယ်။ နမ်ဆန်ယန်ကျေးရွာက ရွာသားတွေတော့ စစ်ဘေးတိမ်းရှောင်ကြတာရှိတယ်။ လူဦးရေ စာရင်း အတိကျတော့ မသိဘူး။ တစ်ချို့တွေကျတော့ ရွာမှာ ရှိသေးတယ်။ သက်ကြီးရွယ်အို ကလေးတွေ အဲ့ဒါတွေပဲ ထွက်ကြတာ။ ရွာလုံးကျွတ်ထွက်ပြေးတာတော့ မဟုတ်ဘူး” ဟု ဗိုလ်မှူးကြီး နော်ဘူ က ဆက်ပြောသည်။
အဆိုပါ တိုက်ပွဲသည် စစ်ကောင်စီဘက်မှ ဇွန်လကတည်းက စစ်အင်အား ပို့ဆောင်ထားခဲ့ပြီး စစ်ရေးတင်းမာနေမှု ရှိခဲ့သည်။
“ဇွန်လကတည်းက စစ်ကောင်စီ က သူတို့ အင်အား ပို့ထားတာရှိတယ်။ သူတို့ လူအင်အားက (၁၀၀) ဝန်းကျင်လောက်ရှိတယ်။ နမ်ဆန်ယန်ကျေးရွာဘက်က စစ်ကောင်စီက စစ်အင်အားထိုးဝင်လာလို့ တိုက်ပွဲဖြစ်ရတာ” ဟု ဗိုလ်မှူးကြီး နော်ဘူ က ပြောသည်။
နမ်ဆန်ယန်ကျေးရွာသည် KIO ဗဟိုဌာနချုပ်ရှိသည့် လိုင်ဇာ နှင့်ကျောချင်းကပ်တည်ရှိကြောင်း သိရသည်။
၂၀၁၁ ခုနှစ် က စစ်ကောင်စီတပ် နှင့် ကချင်လွတ်လပ်ရေးတပ်မတော် (KIA) အကြား တိုက်ပွဲဖြစ်ပွားတဲ့အတွက် နမ်ဆန်ယန်ဒေသခံ ပြည်သူတွေဟာ ဆယ်စုနှစ်တစ်စုကြာ ထွက်ပြေးတိမ်းရှောင်ရာကနေ ၂၀၁၈ ခုနှစ်မှ နေရပ်သို့ ပြန်လည်နေထိုင်ကြသည်ဟု သိရသည်။
