သျှမ်းပြည် လွိုင်လင်ခရိုင် ကျေးသီးမြို့နယ် ကျေးသီး နှင့် မိုင်းကောဝ် ကြား ကားလမ်းပိုင်း တစ်နေရာတွင် ကျည်ဆန်သယ်ဆောင်လာသည့်ကား မီးလောင်မှု ဖြစ်ပွားခဲ့ပြီး ကားသမားက ပျောက်ဆုံးနေကြောင်း ဆုံစမ်းသိရသည်။

ပြီးခဲ့သည့် ဇူလိုင်လ ၃ ရက်နေ့ မနက်ပိုင်း ၉ နာရီဝန်းကျင် အချိန်တွင် ကျေးသီးမြို့ နှင့် မိုင်းကောဝ် ကြားရှိ စစ်ကောင်စီ တပ်စခန်းကုန်းမြင့် အနီးတွင် ကျည်ဆန်များ သယ်ဆောင်လာသည့် Alphard အမျိုးအစား ကား တစ်စီးမီးလောင်သွားကြောင်း ဒေသခံများက သျှမ်းသံတော်ဆင့်ကို ပြောသည်။

“ကားရှေ့ခန်းပိုင်းကစပြီး မီးလောင်တာပါ၊ အဲ့ဒီ ကားရှေ့ခန်းမှာပဲ ကျည်ဆန်တွေ တွေ့ရတယ်၊ တချို့ကျည်က မီးလောင်သလို၊ မီးမလောင်ရသေးတဲ့ ကျည်ဆန်ကတ်တွေလည်း တွေ့ရတယ်၊ ကားခေါင်း အင်ဂျင်ပိုင်းတွေလည်း မီးလောင်တော့ ကားက စက်နှိုးမရတော့ဘူး၊ မီးသတ်လည်း မီးလာငြိမ်းသွားတယ်”ဟု ကျေးသီးမြို့ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ မီးလောင်သည့် ကားတွင် ကျည်ဆန်ကတ်များ တွေ့ရှိရပြီး ကားတစ်စီးလုံး မီးလောင်ပြီး သံများသာ ကျန်ရှိသွားကြောင်း နှင့် စစ်ကောင်စီ လက်အောက်ခံ ရဲ နှင့် စစ်သားများက စစ်ဆေး ယူဆောင်သွားကြောင်း လည်း သိရသည်။

မီးလောင်သည့် ကား နှင့် ကျည်ဆန်ကတ်သည် မည်သည့် အဖွဲ့အစည်း ပိုင်ဆိုင်သည်ကို မသိရသေးသည့် အကြောင်း နှင့် လက်ရှိတွင် ကားမောင်းသူလည်း ပျောက်ဆုံး နေကြောင်း ဒေသခံများက သျှမ်းသံတော်ဆင့်ကို ဆက်ပြောသည်။

“ဘယ်အဖွဲ့က ကျည်ဆန်တွေလဲတော့ မသိဘူး၊ ကားသမားကလည်း ပျောက်ဆုံးနေတယ်၊ ဒီဘက်မှာရှိတဲ့ လှုပ်ရှားတဲ့ လက်နက်ကိုင် တပ်ဖွဲ့တွေကတော့ စစ်ကောင်စီတပ်ရှိမယ်၊ SSPP တပ်ပေါင်းစုလည်း ရှိမယ်၊ ပြီးတော့ RCSS တပ်ဖွဲ့ပေါ့” ဟု ဒေသခံများက သျှမ်းသံတော်ဆင့်ကို ပြောသည်။

လွိုင်လင်ခရိုင်အတွင်း သျှမ်းတပ်နှစ်တပ် ထိတွေ့တိုက်ပွဲ ဖြစ်ပွားခဲ့ပြီးသည့်နောက်ပိုင်း အဆိုပါ ဒေသအတွင်း လှုပ်ရှားသည့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တပ်များ ဆုတ်ခွာပေးရန် စစ်ကောင်စီမှ အကြိမ်ကြိမ် သတိပေး ညွှန်ကြားလာမှု ရှိလာခဲ့သည်။

ယင်းကဲ့သို့ စစ်ကောင်စီ၏ ညွှန်ကြားမှုကို (SSPP/SSA) မှ လက်မခံနိုင်ကြောင်း အကြာင်းပြန်သည့်အတွက် လွိုင်လင်ခရိုင် ဒေသအတွင်း၌ အာဏာသိမ်းစစ်ကောင်စီ နှင့် SSPP/SSA တို့၏ စစ်ရေးတင်းမာမှုများလည်း ရှိနေသည်။