သျှမ်းပြည် တောင်ကြီးမြို့ ကံကြီးရပ်ကွက်ရှိ နေအိမ်တစ်လုံးထဲကို အမျိုးသားတစ်ဦးက ဓားပြဝင်တိုက်ပြီး အိမ်ရှင်မိသားစု ၃ ဦးကို ဓားဖြင့်ခုတ်ခဲ့ကြောင်း စုံစမ်း သိရသည်။

ယမန်နေ့ ( ဇွန်လ ၃၀ ) ရက် နေ့လည် ၁၁ နာရီဝန်းကျင်တွင် တောင်ကြီးမြို့ ကံကြီးရပ်ကွက်ထဲရှိ နေအိမ်တစ်လုံးထဲကို အမည်မသိ အမျိုးသားတစ်ဦးက ဓားပြ ဝင်တိုက်ခဲ့ကာ အိမ်ရှင်မိသားစု ၃ ဦးကိုလည်း ဓားဖြင့်ခုတ်ခဲ့ကြောင်း တောင်ကြီးမြို့ဒေသခံ တစ်ဦးက ပြောသည်။

“နေ့လယ်ပိုင်း အချိန်လောက် အိမ်ထဲကိုဝင်ပြီး ဓားပြ တိုက်တာ။ အိမ်ရှင် အမျိုးသမီး ၂ ယောက်နဲ့ အမျိုးသား ၁ ယောက်ကိုလည်း ဓားနဲ့ ခုတ်သွားတာ။ တော်သေးလို့ ရပ်ကွက်ကလူတွေ ဝိုင်းဖမ်းမိတာပေါ့။ အိမ်ရှင်တွေတော့ ဓားခုတ်ခံရတဲ့ ဒဏ်ရာတွေနဲ့ ဆေးရုံ တင်ထားရတယ် “ ဟု ၎င်း ဒေသခံတစ်ဦးက ပြောသည်။

အဆိုပါ ဓားပြတိုက်သူကို ရပ်ကွက်နေ ပြည်သူများက ဝိုင်းဝန်းဖမ်းဆီးရပြီးသည့်နောက် ရဲတပ်ဖွဲ့များ ရောက်ရှိလာပြီး ၎င်းဓားပြတိုက်သူကို ဖမ်းဆီးသွားခဲ့ကြောင်း သိရသည်။

ထို့အပြင် စစ်တပ်က အာဏာသိမ်းပြီးနောက်ပိုင်း တောင်ကြီးမြို့တွင် ခိုးဆိုးလုယက်မှု၊ ဓားပြတိုက်မှု၊ အိမ်တွင်း ဖောက်ခံရမှု မကြာခဏ ဖြစ်ပွားနေပြီး အဆိုပါ ပြစ်မှုကျူးလွန်သူကိုတော့ ဖမ်းဆီးရမိတာ နည်းပါးကြောင်း ၎င်းဒေသခံ တစ်ဦးက ဆက်ပြောသည်။

“ ပြီးခဲ့ရက်ကလည်း နာရီစင်လမ်းကြား ဈေးထဲမှာ ရန်ဖြစ်လို့ တစ်ယောက်ဆေးရုံ တင်ရသေးတယ်။ တောင်ကြီးမှာတော့ မကြာခဏ ဆိုသလို ဆိုင်ကယ်ခိုးခံရတယ်၊ ဓားပြတိုက်ခံရတယ်၊ ဖုန်းခိုးခံရတယ်ဆိုတာ မကြာခဏ ကြားနေရ၊ မြင်နေရတာပဲ။ ဘာဉပဒေ၊ ဘာလုံခြုံရေးမှ မရှိဘူး။ အဲ့လိုခိုးဆိုးလုယက် ဖြစ်လာပြီဆိုလည်း ဖမ်းမိတာ သိပ်မရှိဘူး။ ဖမ်းမိတာနည်းတယ် “ ဟု ၎င်းက ထပ်လောင်း ပြောသည်။

ယင်းကဲ့သို့ ခိုးဆိုးလုယက်မှု များလာသဖြင့် တောင်ကြီးမြို့ရှိ ပြည်သူများသည် လမ်းသွားလမ်းလာစဉ်၌ မည်သည့် အချိန် ပစ္စည်းလုယက်ခံရခြင်း၊ အန္တရာယ် တစ်စုံတစ်ရာ ပြုခံရခြင်း စသည့်ဖြင့် စိုးရိမ်ကြောက်လန့်နေမြဲကြောင်း သိရသည်။