သျှမ်းပြည် ကွတ်ခိုင်မြို့နယ် နမ့်ဖတ်ကာကျေးရွာအုပ်စုအတွင်းတွင် မိုင်းပေါက်ကွဲမှု ဖြစ်ပွားပြီး ကလေးငယ် တစ်ဦး ထိခိုက်ဒဏ်ရာ ပြင်းထန်စွာ ရရှိသွားကြောင်း စုံစမ်းသိရသည်။

ယမန်နေ့ ဇွန်လ ၂၉ ရက်နေ့ မနက်ပိုင်း ၁၀ နာရီဝန်းကျင်အချိန်တွင် နမ့်ဖတ်ကာကျေးရွာအုပ်စုတွင်း နေထိုင်သည့် အသက် (၉) နှစ်အရွယ် ကလေးငယ်တစ်ဦးသည် မိုင်းပေါက်ကွဲမှု နှင့် ကြုံရပြီး ထိခိုက်ဒဏ်ရာ ပြင်းထန်စွာ ရရှိခဲ့ကြောင်း ဒေသခံများက သျှမ်းသံတော်ဆင့် ကိုပြောသည်။

“လယ်တောမှာ ပေါက်ကွဲမှု ဖြစ်တာပါ၊ သူ့အဖိုးနဲ့ လယ်သွားတဲ့အချိန် မိုင်းပေါက်ကွဲမှု နဲ့ ကြုံရတာ။ အဖိုးဖြစ်သူက လယ်ထဲ အမှိုက်တွေ ရှင်းနေတုန်း၊ သူလေးက အထုပ်တစ်ခုကို သွားကိုင်မိတဲ့အချိန် မိုင်းပေါက်ကွဲတာ၊ ဒဏ်ရာကတော့ တော်တော်ပြင်းထန်တယ်” ဟု နီးစပ်သူ အမျိုးသား တစ်ဦးက သျှမ်းသံတော်ဆင့်ကို ပြောသည်။

လယ်တောတွင် အဖိုးဖြစ်သူ နှင့် အတူ လယ်ရှင်းနေစဥ် မိုင်းပေါက်ကွဲမှု ကြုံရခြင်းဖြစ်ပြီး ဝမ်းဗိုက်၊ ခြေထောက် နှင့် လက်တို့တွင် ထိခိုက်ဒဏ်ရာ ပြင်းထန်စွာ ရရှိသွားကြောင်းလည်း သိရသည်။

လက်ရှိတွင် အဆိုပါ ဒဏ်ရာရသည့် ကလေးငယ်ကို လားရှိုးပြည်သူ့ဆေးရုံသို့ ပို့ဆောင် ကုသထားကြောင်း သိရသည်။

မိုင်းပေါက်ကွဲမှု ဖြစ်ပွားသည့် နေရာနှင့် အနီးပတ်ဝန်းကျင်တွင် ပြီးခဲ့သည့် ၂၀၂၂ ခုနှစ်အတွင်း၌ တိုက်ပွဲများ မကြာခဏ ဖြစ်ပွားလေ့ရှိပြီး လက်နက်ကိုင် တပ်ဖွဲ့များသွားလာ လှုပ်ရှားခြင်း ရှိသည့်နေရာဖြစ်ကြောင်းလည်း သိရသည်။

“စစ်ကျန်လက်နက်တွေ ဖြစ်ရင်ဖြစ်မယ်၊ မဟုတ်လည်း လက်နက်ကိုင် တပ်ဖွဲ့တွေ သွားရင်းလာရင်း ကျန်ခဲ့တာ လားတော့ မပြောတတ်ဘူး၊ အခုလို ပေါက်ကွဲတာတော့ မကောင်းဘူးပေါ့။ ထိခိုက်သူတွေက နစ်နာသူ ဖြစ်သွားတယ်၊ ပြီးတော့ အသက်အန္တရာယ်လည်း ဖြစ်နိုင်တယ်၊ လက်နက်ကိုင် တပ်ဖွဲ့တွေကို စစ်ကျန်လက်နက်တွေ မိုင်းတွေ၊ ဗုံးတွေကို ရှင်းပေးစေချင်တယ်” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။

အဆိုပါ ဒေသအတွင်း သွားလာလှုပ်ရှားသည့် လက်နက်ကိုင် တပ်ဖွဲ့များ အနေဖြင့် စစ်ကောင်စီတပ်ဖွဲ့နှင့် ပြည်သူ့စစ်တပ်ဖွဲ့ အပြင် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA ၊ ကချင်တပ်မတော် KIA ၊ တအာင်း (ပလောင်) တပ်မတော် TNLA နှင့် ကိုးကန့်တပ်မတော် MNDAA တို့က သွားလာ လှုပ်ရှားနေကြသည်။

ပြီးခဲ့သည့် ဇွန်လ ၁၉ ရက်နေ့တွင်လည်း နမ္မတူ – မန်တုံကြား လမ်းပိုင်းတစ်နေရာတွင် မိုင်းပေါက်ကွဲမှု ဖြစ်ခဲ့ပြီး အမျိုးသားတစ်ဦး ထိခိုက်ဒဏ်ရာ ရသွားခဲ့သည်။

မြန်မာနိုင်ငံ မြေမြှုပ်မိုင်း စောင့်ကြည့်လေ့လာရေးအဖွဲ့၏ ၂၀၂၀ ခုနှစ် အထိ အစီရင်ခံစာအရ မြေမြှုပ်မိုင်း နှင့် စစ်ကျန် ပေါက်ကွဲ ပစ္စည်းများကြောင့် ထိခိုက်ဒဏ်ရာရမှု၊ သေဆုံးမှု စုစုပေါင်း ၃၆၈ ခု ရှိနေပြီး သျှမ်းပြည်သည် ထိခိုက်၊ ဒဏ်ရာရမှု အများဆုံးအဖြစ် (၁၂၁) ခု ရှိနေကြောင်း သိရသည်။

ဒေသအလိုက်အနေဖြင့် သျှမ်းပြည်တွင် မြေမြှုပ်မိုင်းနင်းမိသူ (၄၂) ရာခိုင်နှုန်းရှိခဲ့ပြီး၊ စစ်ကိုင်းတိုင်းတွင် (၁၂) ရာခိုင်နှုန်း၊ ရခိုင်တွင် (၁၁) ရာခိုင်နှုန်း၊ ကချင်တွင် (၁၀) ရာခိုင်နှုန်း နှင့် ကရင်တွင် (၇) ရာခိုင်နှုန်းရှိပြီး သျှမ်းပြည်သည် အများဆုံး ဖြစ်ကြောင်း သိရသည်။