သျှမ်းပြည် လင်းခေးခရိုင် မိုးနဲမြို့နယ်အတွင်းရှိ ကျေးရွာအုပ်စုထဲတွင် ကြံ့ခိုင်ရေး နှင့် ဖွံ့ဖြိုးရေးပါတီ (USDP) က ကြိုတင်မဲဆွယ် စည်းရုံးရေး ဆင်းနေကြောင်း စုံစမ်း သိရှိရသည်။
ပြီးခဲ့သည့် မေလမှစပြီး USDP ပါတီက မိုးနဲမြို့နယ် ကျေးရွာအုပ်စုအတွင်းသို့ USDP ပါတီဝင်များကို ကြိုတင်ပြီး မဲဆွယ်စည်းရုံးရေး ဆင်းခဲ့ကြောင်း USDP ပါတီ နှင့် နီးစပ်သူထံ သိရသည်။
“အရင်လ ကတည်းက စဆင်းနေတာ။ ၂ ကြိမ်ပဲ ရှိသေးတယ်။ ဒီလမှာ လှုပ်ရှားတာတွေတော့ မတွေ့ဘူး။ အဓိကတော့ သူတို့ ပါတီဝင်တွေကိုခေါ်ပြီးတော့ စည်းဝေးလုပ်တာ။ ပြီးတော့ ကျေးရွာတွေနားသွားတယ်။ ရွေးကောက်ပွဲဖြစ်ရင်တော့ သူတို့ကို မဲပေးဖို့တွေပဲ ပြောတာပေါ့” ဟု ၎င်းက ပြောသည်။
အဆိုပါ မဲဆွယ်စည်းရုံးရေးကို ကြိုတင်ပြင်ဆင်ထားသော်လည်း ရွေးကောက်ပွဲ ဖြစ်၊ မဖြစ် မသေချာသည့်အတွက်ကြောင့် ဒေသခံများက USDP ပါတီ အပေါ် ယုံကြည်မှု မရှိကြောင်း ဒေသခံများက ပြောသည်။
“ ရွေးကောက်ပွဲ ဖြစ်လာခဲ့မယ်ဆိုရင်လည်း ကြိုတင်ပြင်ဆင်ထားတာပေါ့။ ဒါမဲ့ ရွေးကောက်ပွဲ ဖြစ်ဖို့ကလည်း ရာခိုင်နှုန်း နည်းတာပေါ့။ သူတို့ပြောထားတာတော့ ၈ လပိုင်းပေါ့နော်။ ဖြစ်မဖြစ်လည်း မသေချာဘူးလေ။ အခုနိုင်ငံရေးကလည်း မကောင်းဘူး။ ကျနော်တို့ကတော့ ဖြစ်လာမဲ့ ရွေးကောက်ပွဲ အပေါ်လည်း ယုံကြည်မှု မရှိပါဘူး” ဟု မိုးနဲမြို့ ဒေသခံ အမျိုးသားတစ်ဦး ကပြောသည်။
စစ်ကောင်စီ လက်အောက်ခံ ရွေးကောက်ပွဲကော်မရှင်ကလည်း ၂၀၂၃ ခုနှစ်အတွင်း ရွေးကောက်ပွဲ ကျင်းပသွားမည်ဟု ကြေညာထားသော်လည်း နိုင်ငံရေးလေ့လာသူ တချို့က ရွေးကောက်ပွဲ မဖြစ်နိုင်ဟု သုံးသပ်ထားသည်။
Leave a Comments