မြန်မာ – တရုတ် နယ်စပ်ဒေသဖြစ်သည့် မူဆယ်မြို့တွင် တစ်ပတ်ကျော်အတွင်း တရုတ်ယွမ်ဈေး ၁၀၀ ယွမ်ကို ကျပ်ငွေ (၄၃,၀၀၀) ကျော်အထိ မြင့်တက်လာသဖြင့် ကုန်သည်များ အခက်ကြုံနေရကြောင်း စုံစမ်းသိရသည်။
ပြီးခဲ့သည့် ဇွန်လဆန်းပိုင်းတွင် တရုတ်ယွမ်ငွေဈေး ၁၀၀ ယွမ်ကို (၄၁,၈၀၀) ကျပ်သာရှိပြီး အတက်အကျ မရှိခဲ့ကာ ဇွန်လ ၂၁ ရက်နေ့မှစ၍ တရုတ်ယွမ်ငွေ ဈေးသည် ကျပ်ငွေ (၄၂,၃၀၀) မှ (၄၃,၀၀၀) ကျော်အထိ တစ်ပတ်အတွင်း မြင့်တက်လာခဲ့ကြောင်း ယွမ်ငွေလဲလှယ်သူ ဒေသခံ တစ်ဦးက ပြောသည်။
“ ဒီနေ့ ဈေးကတော့ တရုတ်ယွမ် ၁၀၀ ကို ၄၃,၀၀၀ ကျပ်အထိ ရှိတယ်။ ဘယ်နေ့က ယွမ်ဈေး စတက်လာလဲဆိုတော့ ပြီးခဲ့တဲ့ ဇွန် ၂၁ ရက်က စပြီး တက်လာတာ။ ဇွန်လဆန်းပိုင်းတုန်းကတော့ ယွမ် ၁၀၀ ကို ၄၁,၈၀၀ ကျပ်လောက်ပဲ ရှိတာ။ တစ်နေ့ပြီး တစ်နေ့ ယွမ်ဈေးတွေက တက်လာတာပေါ့ “ ဟု ၎င်းက ပြောသည်။
အဆိုပါ တရုတ်ယွမ်ငွေဈေး မြင့်တက်လာသောကြောင့် ငွေလဲလှယ် ဈေးနှုန်းနှင့်အတူ ကုန်ဈေးနှုန်း၊ ဆန်ဈေးနှုန်း မြင့်တက်လာမည်ကို ဒေသခံများက စိုးရိမ်နေကြောင်း သိရသည်။
ထို့အပြင် ယမန်နှစ် ၂၀၂၂ သြဂုတ် ၁၄ ရက်တွင် တရုတ်ယွမ်ငွေဈေး ၁၀၀ ယွမ်ကို မြန်မာကျပ်ငွေ (၄၆,၉၅၀) ကျပ်အထိ မြင့်တက်လာသောကြောင့် ကုန်ပစ္စည်းများလည်း တစ်နေ့တခြား စျေးနှုန်း မြင့်တက်လာခဲ့ကြောင်း သိရသည်။
“ အခု ဗမာဆန်၊ ပေါ်ဆန်းမွေး တစ်အိတ်ကိုတော့ ၁ သိန်းကျော်သွားပြီ။ ကုန်စိမ်း၊ ကုန်ခြောက်တွေတော့ ဈေးနှုန်း တက်လာတယ် မကြာသေးဘူး။ စားဝတ်နေရေးအတွက် ကျပ်တည်းသွားရလောက်တဲ့အထိ၊ လူတွေ တိတ်လန့်သွားတဲ့အထိတော့ မဖြစ်သေးဘူး။ ဘာလို့ဆို ဒီမှာက ကျပ်ငွေတွေပဲ သုံးတယ်၊ တရုတ်ပစ္စည်း တွေလည်း သိပ်မဝင်လာသေးဘူး။ ဝင်လာတာတော့ ရှိတာပေါ့။ ယွမ်ဈေးတွေတော့ ဒီထက်တက်ဖို့ အလားအလာ ရှိလားတော့ မခန့်မှန်းတတ်ဘူး “ ဟု ၎င်း ငွေလဲလှယ်သူ စီးပွားရေးတစ်ဦးက ထပ်လောင်းပြောသည်။
စစ်တပ်က အာဏာသိမ်းပြီး နောက်ပိုင်း မြန်မာနိုင်ငံတွင် စစ်ရေးပဋိပက္ခဖြစ်ပွားပြီး နိုင်ငံရေး မတည်ငြိမ်မှုကြောင့် ငွေကြေးဖောင်းကြွမှုဖြစ်ကာ မြန်မာကျပ်ငွေ ဈေးသည် ကျဆင်းနေပြီး ဒေါ်လာဈေး၊ တရုတ်ယွမ်ငွေဈေးသည် တစ်နေ့တခြား မြင့်တက်လာနေခြင်း ဖြစ်သည်။
