သျှမ်းပြည် တောင်ကြီးခရိုင် ဖယ်ခုံမြို့နယ်အတွင်း စစ်ဘေးရှောင် ၁ သောင်းကျော်အတွက် ကုန်စိမ်းများ လိုအပ်နေကြောင်း စုံစမ်းသိရှိရသည်။
ဖယ်ခုံမြို့နယ်အတွင်း စစ်ဘေးရှောင်များသည် ၂ နှစ်ကျော်ကြာ တောထဲထွက်ပြေးလာရပြီး ယခု ကာလအတွင်းမှာ အလှူရှင်တွေက ဆန်ကိုသာ ကူညီပေးကြသည့်အတွက်ကြောင့် ကုန်စိမ်းများအတွက် ခက်ခဲလာခဲ့ကြောင်း သိရသည်။
“လက်ရှိမှာတော့ စားဝတ်နေရေးတွေ ဖြေရှင်းဖို့ ကြိုးစားနေကြတယ်။ စားနပ်ရိက္ခာအတွက် အလှူရှင်တွေကတော့ ဆန်တစ်မျိုးတည်းကိုပဲ ထောက်ပံ့ပေးတော့တယ်။ ကုန်ခြောက်ဖြစ်တဲ့ ဆီ ၊ ဆားတွေအတွက်က လက်လှမ်းမှီမှုအတွက် အခက်ခဲရှိနေပါတယ်” ဟု KRC က တာဝန်ရှိသူတစ်ဦးက ပြောသည်။
ယခင်က စစ်ဘေးရှောင်များအတွက် ရပ်နီးရပ်ဝေးက ဟင်းသီးဟင်းရွက်များ လာရောက်လှူဒါန်းပေးမှု ရှိသော်လည်း ယခုနောက်ပိုင်း ဒေသထွက် သီးနှံ နည်းပါးလာသည့်အတွက်ကြောင့် ခက်ခဲလာခဲ့ကြောင်း သိရသည်။
ထိုအပြင် လက်ရှိ စစ်ဘေးရှောင်များသည် ရှိရာ နှင့် စားသောက်နေကြကာ အချို့က နေ့စားလိုက်ပြီး ၊ အချို့က အိမ်ဆိုင်ငယ်များဖွင့်ပြီး တစ်ပိုင်တစ်နိုင် ဝင်ငွေများ ရှာနေကြကြောင်း သိရသည်။
“ယခင်ကတော့ တစ်ချို့ကပေးတဲ့ ဟင်းသီးဟင်းရွက်တွေ ရှိတယ်။ အခုက ဒေသထွက် သီးနှံတွေမရှိတော့ အစစအရာရာ ဝယ်ယူစားသောက်နေရပါတယ်။ အလုပ်ကိုင်လည်း မရှိတော့ ဝင်ငွေခက်ခဲမှုရှိပါတယ်။ ဝယ်ယူစားသောက်ဖို့ ခက်ခဲနေပါတယ်။ တစ်ချို့ကတော့လည်း နေ့စားလိုက်ကြတယ်။တစ်ချို့ကတေ့ာ တစ်နိုင်တစ်ပိုင် ဈေးဆိုင်သေးသေးလေး ဖွင့်ထားကြတယ်” ဟု အထက်ပါ တာဝန်ရှိသူတစ်ဦးက ပြောသည်။
အဆိုပါ စစ်ဘေးရှောင် ၁၀,၀၀၀ ကျော်သည် ဖယ်ခုံမြို့နယ် နဲ့ မိုးဗြဲအတွင်းသာဖြစ်ပြီး အများစုက တောတောင်ထဲတွင်နေထိုင်ကြရကာ အချို့သည် ကျေးရွာများ၌ နေထိုင်နေရသည်။
Leave a Comments