မြန်မာ – ထိုင်းနယ်စပ် ဒေသဖြစ်သည့် တာချီလိတ်မြို့ အခွန်ကောက် ဉီးစီးဌာနမှ ပြောင်းတင်ပို့မည့် ကုမ္ပဏီထံ အခွန်အခ တင်းကြပ်လိုက်မှုကြောင့် တောင်သူများ အခက်အခဲ ကြုံတွေ့နေရကြောင်း စုံစမ်းသိရသည်။
ပြီးခဲ့သည့် ဖေဖော်ဝါရီ ၁ ရက်မှစ၍ မြန်မာ – ထိုင်း နယ်စပ်ဒေသဖြစ်သည့် တာချီလိတ်မြို့ ကုန်သွယ်ရေးတွင် စစ်ကောင်စီ လက်အောက်ခံ အခွန်ကောက်ဦးစီးဌာနမှ ထိုင်းနိုင်ငံဘက်သို့ ပြောင်းတင်ပို့မည့် ကုမ္ပဏီများကို ပြောင်းအိတ် (၅၀ ကီလို) တစ်အိတ်လျှင် ကျပ် ၁ သောင်း အခွန်အခ ကြေးငွေအဖြစ် ကောက်ခံခဲ့ခြင်း ဖြစ်သည်။
“ ပုံပါကျင် – မိုင်းတုံဖက်က လာတဲ့ ပြောင်းတွေဆို တာချီလိတ်မြို့ကိုသွင်းမယ်ဆိုရင် စစ်ကောင်စီ လက်အောက်ခံ အခွန်ကောက်ဦးစီးဌာနမှာ ပြောင်းတစ်အိတ်ကို ကျပ် ၁၀,၀၀၀ သွင်းရတယ်။ ပြီးခဲ့တဲ့ နှစ်တွေတော့ ဒီလိုမျိုး အခွန်သွင်းရတာတော့ မရှိဘူး။ နှစ်ဖက်နိုင်ငံ ကုမ္ပဏီ အချင်းချင်းကြား ညှိနှိုင်းကြတာ။ အခုက ကုမ္ပဏီတွေကို အခွန်အခကြေး တင်းကြပ်လိုက်တော့ ကျနော်တို့ တောင်သူတွေလည်း ဒုက္ခရောက်တယ်။ တင်လာတဲ့ ပြောင်းတွေလည်း ဈေးသိပ်မရတော့ဘူး။ ကုမ္ပဏီက ကျနော်တို့ ပြန်ဖိတဲ့ သဘောမျိုးပေါ့ “ ဟု ပြောင်းစိုက် ဒေသခံ တောင်သူတစ်ဦးက ပြောသည်။
အဆိုပါ စစ်ကောင်စီ အခွန်အခကြေးငွေ တင်းကြပ်လိုက်မှုကြောင့် လက်ရှိ ပြောင်းတစ်အိတ်ကို ဘတ် ၄၀၀ ပေးပြီး ကုမ္ပဏီ ဝယ်ယူနေရကြောင်း သိရသည်။
“အရင်နှစ်ကတော့ ပြောင်းတစ်အိတ် ဘတ် ၅၅၀ ကနေ ၅၆၀ အထိ ဈေးကောင်းတယ်။ အခုက ပြောင်းတစ်အိတ်ကို ဘတ် ၄၀၀ ပဲ ရတော့တယ်။ ကုမ္ပဏီတွေက အမြတ်မရရင် ဘယ်သူမှ မလုပ်ချင်ဘူး။ စစ်ကောင်စီက သူတို့ကိုအခွန်အခကြေး ပိုတင်းကြပ်လေလေ ကုမ္ပဏီကလည်း ကျနော်တို့ကို ပိုပြီး ဖိလာလေလေပဲ “ ဟု အသက် ၃၀ ကျော် အမျိုးသားတစ်ဦးက ထပ်လောင်းပြောသည်။
ထို့အပြင် တောင်သူများသည် တာချီလိတ်မြို့တွင် ပြောင်းတင်လာဖို့အတွက် လမ်း၌ စစ်ကောင်စီ စစ်ဆေးရေး ဂိတ်ထံ တစ်ကြိမ်လျှင် ကျပ် ၃ ထောင်မှ ၂ သောင်းအထိ ပေးဆောင်နေရသေးကြောင်း သိရသည်။
“ ကျနော်တို့ တောင်သူတွေတော့ ဘယ်သူ့ကို သွားပြောပြီး ဘယ်သူ့ကို သွားတိုင်ရမလဲ မသိတော့ဘူး။ စိုက်ပျိုးရေး အဖွဲ့အစည်း တစ်ခုကနေပြီးတော့မှ ကျနော်တို့ ခံစားနေတဲ့ အခက်ခဲတွေကို သွားပြောပြမှပဲ ရတော့မယ်။ အခုချိန်မှာလည်း နိုင်ငံရေးက မကောင်းတော့ သွားပြောလည်း မထူးဘူး။ ကျနော်တို့တောင်သူတွေ ချွေးနဲ့အားနဲ့ လုပ်ခဲ့ရတာ၊ စိုက်ခဲ့ရတာ အခုလို လမ်းမှာပိုက်ဆံတောင်းတာ၊ ကုမ္ပဏီက ဖိထားတာ နည်းနည်းလေးလျော့ နိုင်ရင်တော့ နည်းနည်းလေး အဆင်ပြေသွားမှာပေါ့ “ ဟု အသက် ၃၀ ကျော် အမျိုးသားတစ်ဦးက ထပ်လောင်းပြောသည်။
ပုံပါကျင်မြို့သည် တာချီလိတ်မြို့နှင့် မိုင် ၁၄၀ ကွာဝေးပြီး လမ်းတလျောက်၌ စစ်ကောင်စီ စစ်ဆေးရေးဂိတ် စုစုပေါင်း ၁၀ ခုထက် မနည်း ရှိကာ ပြောင်းတင်ပို့သည့် တောင်သူများသည် ဂိတ်တိုင်းကို ပိုက်ဆံပေးဆောင် နေရကြောင်း သိရသည်။
လက်ရှိ ပြောင်းတင်ပို့သည့် ကုမ္ပဏီများသည် တင်ပို့ပြီး လာရသည့် ဒေါ်လာငွေများကို စစ်ကောင်စီ လက်အောက်ခံ ဗဟိုဘဏ်မှ သတ်မှတ်ထားသော ငွေစျေးနှုန်းဖြင့် ၆၅ ရာခိုင်နှုန်း ရောင်းချပေးရပြီး ကျန်သည့် ၃၅ ရာခိုင်နှုန်း ပြင်ပဈေးဖြင့်သာ ရောင်းချပေးနေရကြောင်း သိရသည်။
Leave a Comments