သျှမ်း – ကရင်နီ နယ်စပ်အတွင်းရှိ စစ်ဘေးရှောင် ကလေးများအတွက် ပညာရေး သင်ထောက်ကူပစ္စည်းများ လိုအပ်နေကြောင်း သတင်းရရှိသည်။
ကရင်နီပြည်အတွင်း လက်ရှိ စစ်ဘေးရှောင်ကလေးများအတွက် စာသင်ကြားရန် သင်ထောက်ကူပစ္စည်းများ လိုအပ်နေပြီး အလှူရှင် နည်းပါးနေသောကြောင့် စာသင်ရန်အတွက် ခက်ခဲနေကြောင်း သိရသည်။
အဆိုပါ သင်ထောက်ကူပစ္စည်းများအတွက် တောင်ကြီးတက္ကသိုလ်ကျောင်းသားများ သမဂ္ဂအဖွဲ့က ဦးဆောင်ပြီး အလှူငွေ ကောက်ခံပေးနေကြောင်း သိရသည်။
“ကျနော်တို့ အခုက တောင်ကြီး တက္ကသိုလ်ကျောင်းသားသမဂ္ဂ ကနေ စစ်ဘေးရှောင်တွေအတွက် ကမ်ပိန်းတစ်ခုလုပ်ထားပါတယ်။ အခုက ကရင်နီပြည်ဘက်ခြမ်းက စာသင်ကျောင်းက ကျောင်းသားတွေ အတွက်ပါ။ သင်ထောက်ကူပစ္စည်းတွေကို ထောက်ပံ့ဖို့ ဖြစ်ပါတယ်။ ဒီကမ်ပိန်း လုပ်ဖို့လည်း မြေပြင်က အကူညီတောင်းလာတာ ဖြစ်တယ်။ အခု ကျနော်တို့ လုပ်တာက ပထမဆုံး ဖြစ်တယ်။ အခုလည်း ကလေးတွေအတွက် စာသင်ဖို့ အခက်ခဲ ဖြစ်နေကြတယ်” ဟု တောင်ကြီး တက္ကသိုလ်ကျောင်းသားများ သမဂ္ဂ ဒု – ဥက္ကဌ က သျှမ်းသံတော်ဆင့်ကို ပြောသည်။
အလားတူ လက်ရှိမှာလည်း ထိုကမ်ပိန်းအတွက် အလှူငွေ ရရှိမှု နည်းပါးနေသောကြောင့် ကလေးများကို မကူညီပေးနိုင်သေးကြောင်း သိရသည်။
“ကျနော်တို့ စလာတာ ၁၁ ရက်နေ့ ကတည်းက စလာတာ။ ဒါမဲ့ အခုထိ သတ်မှတ်ထားတဲ့ ငွေပမာဏထိ မရသေးဘူး။ ၂ သိန်းလောက်ပဲ ရသေးတယ်။ ကျနော်တို့အတွက်တော့ ဒါက ပထမဆုံးဖြစ်တယ်။ ပြီးတော့ လူထုဆီက ယုံကြည်မှု မရသေးတာ နဲ့ လူထုဆီက သတင်းရောက်ရှိမှု နည်းတာတွေက ကျနော်တို့အတွက် အခက်ခဲဖြစ်နေပါတယ်။ ကျနော်တို့ ခက်ခဲတယ်ဆိုတာထက် စစ်ဘေးရှောင် ကလေးတွေအတွက် ပိုခက်ခဲစေတယ်” ဟု အထက်ပါ ဒု-ဥက္ကဌက ပြောသည်။
ကရင်နီပြည်အတွင်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့က တိုက်ပွဲကြောင့် ပြည်သူ ၂ သိန်းနီးပါးရှိကြောင်း သိရသည်။
Leave a Comments