သျှမ်းပြည် မူဆယ်မြို့မှ မူလတန်းကျောင်း ရှေ့တွင် လုံခြုံရေး နေရာယူထားသည့် အာဏာသိမ်း စစ်ကောင်စီ တပ်ဖွဲ့ နှင့် ပြည်သူ့စစ်တပ်ဖွဲ့တို့သည် အမည်မသိ လူတစ်စု ဝင်ရောက်ပစ်ခတ်မှုကို ခံရကြောင်း စုံစမ်း သိရသည်။

ယမန်နေ့ ဇွန်လ ၂၂ ရက် ညနေပိုင်း ၆ နာရီခွဲ ဝန်းကျင်တွင် မူဆယ်မြို့ ဟိုနားရပ်ကွက် မူလတန်း ကျောင်းရှေ့ ၌ လုံခြုံရေး ယူပေးနေသည့် စစ်ကောင်စီ နှင့် ပြည်သူ့စစ်တပ်ဖွဲ့သည် အမည်မသိ လက်နက်ကိုင် တပ်ဖွဲ့ တစ်ဖွဲ့၏ ပစ်ခတ်မှုကို ခံရပြီး ပြည်သူ့စစ် တစ်ဦး သေဆုံးသွားကြောင်း ဒေသခံများက ပြောသည်။

“စစ်ကောင်စီ နဲ့ ပြည်သူ့စစ်တပ်ဖွဲ့က ကျောင်းကို လုံခြုံရေးယူပေးတာ၊ အမည်မသိ လက်နက်ကိုင် တပ်ဖွဲ့ တစ်ဖွဲ့ က ကားတစ်စီး နဲ့ သူတို့ကို လာပစ်တာ၊ ပြည်သူ့စစ်တစ်ဦးကတော့ ပွဲချင်းပြီး သေသွားတယ်၊ ထိခိုက်ဒဏ်ရာ ရတဲ့ သူတွေကတော့ မသိဘူး” ဟု အနီးပတ်ဝန်းကျင် ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

ယင်းကဲ့သို့ ပစ်ခတ်မှု အပြီးတွင် စစ်ကောင်စီတပ်ဖွဲ့ စစ်ကား ၄ စီး၊ တစ်စီးကို လူအင်အား ၁၀ ယောက်နီးပါး ခန့်ရှိ လူအင်အား ထပ်မံ ရောက်လာပြီး အဆိုပါ ပစ်ခတ်မှု အနီး ပတ်ဝန်းကျင်ကို လာရောက် စစ်ဆေးသွားကြောင်း လည်း သိရသည်။

ပစ်ခတ်မှု ဖြစ်ပွားသည့် မူလတန်းကျောင်း၏ မျက်နှာချင်းဆိုင်တွင် Hotel နှင့် KTV လည်း ဖွင့်လှစ်ထားလျက်ရှိပြီး ဒေသအတွင်း ပြည်သူ့စစ်များက အဓိက လုံခြုံရေးယူပေးနေသည့် နေရာလည်း ဖြစ်နေကြောင်းလည်း သိရသည်။

“ဒီနေရာတွေ တော်တော်များများ ပြည်သူ့စစ်တပ်ဖွဲ့က လုံခြုံရေးယူပေးထားကြတာ များတယ်၊ နောက်တစ်ခု ကတော့ KTV တို့ ၊ Hotel တို့လာတဲ့ သူတွေ တချို့ကလည်း လက်နက်တွေ ပါလာကြတာ ဆိုတော့ ဘယ်သူက လက်နက်ကိုင်တပ်ဖွဲ့လဲ ဘာလဲဆိုတာတွေ ခွဲခြားရခက်တယ်” ဟု အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။

မူဆယ်မြို့သည် မြန်မာ – တရုတ်နယ်စပ် ကုန်သွယ်မြို့ ဖြစ်ကြသည့် အပြင် လက်နက်ကိုင် တပ်ဖွဲ့များ သွားလာ လှုပ်ရှားသည့် နေရာလည်း ဖြစ်သည့် အတွက် ပစ်ခတ်တိုက်ခိုက်မှုများ၊ အကြောင်းရင်းမသိ ပစ်သတ်ခံရမှုများက မကြာခဏ ဖြစ်ပွားလေ့ရှိသည်။

ထို့အပြင် စစ်တပ်မှ နိုင်ငံတော် အာဏာသိမ်းပြီးနောက်ပိုင်း မြန်မာ – တရုတ် နယ်စပ်ကုန်သွယ်ရေးဇုန် မူဆယ်မြို့နယ်အတွင်း လောင်းကစားဝိုင်းများ၊ ခိုးဆိုးလုယက်မှုများလည်း များပြားလာကြောင်း ဒေသခံများက ပြောသည်။