သျှမ်းပြည် တာချီလိတ်မြို့တွင် အိမ်ငှားခန်း ဈေးနှုန်း အဆမတန် မြင့်တက်လာနေသောကြောင့် ငှားရမ်း နေထိုင်သူများ အခက်တွေ့နေရကြောင်း စုံစမ်း သိရသည်။

ပြီးခဲ့သည့် ဖေဖော်ဝါရီ ၂၀ ရက် ထိုင်း – မြန်မာ နယ်စပ် ချစ်ကြည်ရေး တံတား အမှတ် (၁) ကို ပြန်လည်ဖွင့်လှစ်လာပြီးနောက် တာချီလိတ်မြို့တွင် ထိုင်း၊ တရုတ် လူမျိုးအများအပြား လာရောက်နေထိုင်ကြပြီး အွန်လိုင်းဂိမ်း ဖွင့်လှစ်သည့်အတွက်ကြောင့် ပုံမှန် အိမ်ငှားခန်း ထိုင်းဘတ် ၃ ထောင်မှ ထိုင်းဘတ် ၈ ထောင် (မြန်မာငွေ ကာလပေါက်စျေး ၆ သိန်းကျော်) ၁ သောင်းဘတ် (မြန်မာငွေ ကာလပေါက်စျေး ၈ သိန်းကျော်) ဈေးနှုန်း မြင့်တက်လာနေကြောင်း အိမ်ငှားရမ်း နေထိုင်သူ ဒေသခံ တစ်ဦးက ပြောသည်။

“အခု တာချီလိတ်မှာ အိမ်ငှားခန်း တစ်ခန်းကို အနည်းဆုံး ထိုင်းဘတ် ၇ ထောင်၊ ၈ ထောင် ရှိတယ်။ ဒါတောင် အဲကွန်း၊ ရေခဲသေတ္တာတောင် မပါသေးဘူး။ အရင်ကဆို တစ်ခန်းကို ဘတ် ၂ ထောင်ကနေ ၃ ထောင်ပဲ ရှိတယ်။ ကျနော်ငှားနေတဲ့အခန်းက တစ်လကို ၁ သောင်း ပေးနေရပြီ။ ဒါတွေက ထိုင်းတွေ၊ တရုတ်တွေ အွန်လိုင်းဂိမ်း လာဖွင့်ပြီး လောင်းကစား လာလုပ်ကြလို့၊ စလော့ဂိမ်း လာလုပ်ကြလို့ပဲ “ ဟု ၎င်း ဒေသခံတစ်ဦးက ပြောသည်။

အဆိုပါ အွန်လိုင်းဂိမ်းများ လာရောက်ဖွင့်လှစ်သူ များပြားလာသည့်အတွက် တာချီလိတ်မြို့အတွင်း လူနေထူထပ်မှု များလာကာ ဆိုင်ကယ်၊ ကား များသည်လည်း ကြပ်တည်းနေကြောင်း သိရသည်။

“တာချီလိတ်မြို့မှာ မနက် အလုပ်သွားချိန်ကနေ ညနေ အလုပ်ပြန်တဲ့အချိန်ထိ ကား၊ ဆိုင်ကယ်တွေ ကြပ်တည်း နေတာပဲ။ အခု တာချီလိတ်မှာ လူငယ်တွေ၊ ရွှေ့ပြောင်းအလုပ်သမားတွေ၊ စစ်ဘေးရှောင်တွေ လာနေကြတယ်။ လာပြီး အလုပ်လုပ်ကြတယ်။ အဲ့ကြောင့် အိမ်ခန်းတွေလည်း ဈေးတက်တာ။ မြို့ပြင်မှာဆို တစ်ခန်းကို ဘတ် ၄ ထောင်ကနေ ဘတ် ၅ ထောင်အထိ ရှိတယ် “ ဟု အသက် ၄၀ နှစ်အရွယ် အမျိုးသားတစ်ဦးက ပြောသည်။

စစ်တပ် အာဏာသိမ်းပြီးနောက်ပိုင်း မြန်မာ – ထိုင်းနယ်စပ် မြန်မာနိုင်ငံ တာချီလိတ်မြို့အတွင်း တရားမဝင် လောင်းကစားဝိုင်း၊ တရားမဝင် တရုတ်လူမျိုးများ လာရောက်နေထိုင်ပြီး အွန်လိုင်းဂိမ်း လိမ်လည်မှုများ ပြုလုပ်နေကြောင်း သိရသည်။

တာချီလိတ်မြို့သည် လူနေထူထပ်မှု များလာသည့်အတွက်ကြောင့် မကြာခဏ ယာဉ်တိုက်မှု ဖြစ်ပွားနေပြီး အိမ်ခြေမဲ့အဖြစ် နေထိုင်သူများလည်း မကြာခဏ သေဆုံးနေလျက်ရှိကြောင်း သိရသည်။