သျှမ်းပြည် လင်းခေးခရိုင် လင်းခေး – ဟိုမိန်းမြို့နယ်ခွဲရှိ လမ်းပိုင်းတွင် နယ်ခြားကာကွယ်ရေးတပ် ( SSS ) ဂိတ် (၈) နေရာကို အခွန်ပေးဆောင်ရသောကြောင့် ကားခ ဈေးနှုန်း ယခင်ထက် မြင့်တက်ခဲ့ကြောင်း စုံစမ်းသိရှိရသည်။
လက်ရှိ လင်းခေး – ဟိုမိန်း ကားခသည် ယခင်ထက် ၂ ဆ မြင့်တက်လာကြောင်း သိရသည်။
လင်းခေးမြို့မှ ဟိုမိန်းမြို့သို့ သွားရန်အတွက် ကားခကို လင်းခေးမြို့ ဒေသခံဖြစ်ပါက ၇ သောင်းထိပေးရပြီး ၊ တစ်ခြားမြို့ ဒေသခံဖြစ်ပါက ကားခ ၃ သိန်း အထိပေးရကာ ဝန်ထမ်းဖြစ်ပါက ၂ သောင်းမှ ၃ သောင်းထိသာ ပေးရကြောင်း သိရသည်။
ထိုအပြင် လင်းခေးမြို့ မှ ဟိုမိန်းမြို့အထိ နယ်ခြားကာကွယ်ရေးတပ် (SSS) ကို စစ်ဆေးရေးဂိတ်ကိုလည်း အခွန် (၈) နေရာ ဆောင်ရကြောင်း ဒေသခံများ ပြောပြချက်အရ သိရသည်။
“ကားခတွေကတော့ အရင်ကထက် ပိုများလာတယ်။ အခွန်ဆောင်ရတဲ့ နေရာတွေကလည်း များတယ်လေ။ လင်းခေးကနေ ဟိုမိန်းထိကို SSS ကိုပေးရတာ (၈) ဂိတ်လောက်ရှိတယ်။ ဂိတ်တစ်ဂိတ်ကိုပေးရတာ ထိုင်းငွေ ဘတ် ၁ ထောင်လောက်ရှိတယ်။ ကားခဈေးနှုန်းတွေကလည်း မတူဘူး” ဟု ကားသမားတစ်ဦးက ပြောသည်။
အဆိုပါ ကားခဈေးနှုန်းတွေမြင့်တက်လာသည့်အတွက်ကြောင့် ပြည်သူများ ခရီးသွားလာရန်အတွက် ခက်ခဲမှုရှိကြောင်း သိရသည်။
ထိုကြောင့် လက်ရှိ တည်ဆောက်နေသည့် လင်းခေးမြို့ နှင့် ဟိုမိန်း ကြားရှိ တာဆွပ်တိန်း တံတားကို အမြန်ဆုံးဆောက်ပြီးရန်အတွက် ဒေသခံများ နှင့် ကားသမားများက မျှော်လင့်နေကြသည်။
“ အခု ဘယ်ကုမ္ပဏီဆောက်နေလဲတော့မသိဘူး။ ဝင်သွားကြည့်လို့ မရဘူး။ အဲ့နားမှာ တိုင်တွေတော့ ဆောက်ထားပြီး။ မြစ်အလယ်မှာလည်း တိုင်တွေဆောက်ထားပြီ။ အမြန်ဆုံးပြီးဖို့ မျှော်လင့်တာပေါ့။ ဒါမှ ကျနော်တို့တွေလည်း ခရီးလွတ်လွတ်လပ်လပ် သွားလို့ရမယ်။ ကုန်ဈေးနှုန်းတွေလည်း ပြန်ကျလာမယ်လေ” ဟု လင်းခေးမြို့ ဒေသခံ အမျိုးသားတစ်ဦးက ပြောသည်။
အဆိုပါ လင်းခေးမြို့မှ ဟိုမိန်းမြို့သို့ သွားရန်အတွက် နမ့်ခုံးမြစ်(သံလွင်မြစ်) ကို လှေဖြင့် ဖြတ်ကူးသွားလာရသည်။
အလားတူ ဟိုမိန်းမြို့သည် ထိုင်း – မြန်မာနယ်စပ်မြို့တစ်မြို့ဖြစ်ပြီး နယ်ခြားကာကွယ်ရေးတပ် SSS က ထိန်းချုပ်ထားသည့် နယ်မြေဖြစ်သည်။
