သျှမ်းပြည် မိုးဗြဲမြို့တွင် စစ်ကောင်စီတပ်ဖွဲ့မှ အထူးစစ်ဆင်ရေး ပြုလုပ်မည်ဟုဆိုသောကြောင့် မြို့ပေါ်ရှိ ပြည်သူများအား မြို့ကိုစွန့်ခွာပြီး ထွက်ပြေးတိမ်းရှောင်နေပေးရန် ကြေညာခဲ့ပြီးနောက် သောင်းနှင့်ချီ ပြည်သူဦးရေများ အလုံးအရင်း ထွက်ပြေးတိမ်းရှောင်ခဲ့ရကြောင်း စုံစမ်းသိရသည်။
ပြီးခဲ့သည့် ဇွန်လ ၁၆ ရက်တွင် ထွက်ပြေးတိမ်းရှောင်ရသည့် ပြည်သူဦးရေ ၃ သောင်း ဝန်းကျင်အနက် အချို့မှာ ဖယ်ခုံမြို့၊ လွိုင်ကော်မြို့ နှင့် တောင်ကြီးမြို့ စသည်ဖြင့် နေရာအသီးသီးသို့ ထွက်ပြေးတိမ်းရှောင်သွားခဲ့ကြရပြီး အချို့မှာ ထွက်ပြေးနေစဉ်အတွင်း အဆက်အသွယ် ပြတ်သွားသဖြင့် ဆွေမျိုး၊ မိတ်ဆွေ နှင့် ကွဲကွာကာ ထွက်ပြေး တိမ်းရှောင်ရသည့် ပြည်သူအချို့လည်း ရှိနေကြောင်း သိရသည်။
လက်ရှိ ဖယ်ခုံမြို့ အနောက်ဖက်ခြမ်းဒေသသို့ ထွက်ပြေးတိမ်းရှောင်လာသည့် စစ်ရှောင်ဦးရေ ၃ ထောင်ကျော်သည် စားနပ်ရိက္ခာနှင့် မိုးကာ အရေးပေါ် လိုအပ်နေကြောင်း စစ်ရှောင်ကူညီသူ ကော်မတီ တစ်ဦးက ပြောသည်။
“ အဓိက သူတို့အရေးပေါ် ထွက်ပြေးတိမ်းရှောင်လာရတယ်ဆိုတော့ ဆန်တွေ၊ ဆီတွေ မသယ်လာနိုင်ဘူး။ အခု ကျနော်တို့ ကြိုးစားပေးပြီး အလှူရှင် ရှာပေးနေတယ်။ ဆန်တွေ၊ မိုးကာတွေပေါ့၊ မိုးတွင်းလည်း ရောက်လာပြီးဆိုတော့မိုးကာတွေ လိုအပ်နေတယ်။ သူတို့က အိမ်ပြန်ပြီး လုံးဝ ရိက္ခာသယ်လို့ မရတော့ဘူး “ ဟု ၎င်း ကော်မတီတစ်ဦးက ပြောသည်။
အဆိုပါ ထွက်ပြေးတိမ်းရှောင်လာရသည့် ပြည်သူများသည် စိတ်ပိုင်းဆိုင်ရာ နှင့် ပတ်သက်ပြီး ခံစားနေရကြောင်း ၎င်းက ဆက်ပြောသည်။
“ ကျနော်တို့ အပါအဝင် စစ်ဘေးရှောင်လာရတာ အိမ်ပြန်ချင်တဲ့စိတ်တွေ အိမ်ပြန်ချင်တောင်မှ ပြန်လမ်း မရှိတော့ဘူး။ နေ့စဉ် လက်နက်ကြီးကျလို့ အိမ်မှာရှိတဲ့ဟာလည်း ကုန်ကုန်ပြီ။ တစ်နေ့ထက်တစ်နေ့ ဒီလိုဘဝ နဲ့ ရှေ့ဆက်ပြီး သွားရမှာကို စိုးရိမ်နေရတယ် “ ဟု ၎င်း အထက်ပါ ပုဂ္ဂိုလ်က ထပ်လောင်းပြောသည်။
ထို့အပြင် စစ်ရှောင်များသည် စားနပ်ရိက္ခာများအတွက် လက်ရှိတွင် ပြည်တွင်း၊ ပြည်ပ မှအလှူရှင်ထံ အားကိုးနေရပြီး အလှူရှင် ထောက်ပံ့မှုမှ ရပ်ဆိုင်းသွားလျှင် စားနပ်ရိက္ခာ ပြတ်လပ်သွားနိုင်ကြောင်း၊ ရေရှည်အတွက် စားနပ်ရိက္ခာ သိုလှောင်ထားခြင်း မရှိသေးကြောင်း သိရသည်။
မိုးဗြဲမြို့တွင် စစ်ကောင်စီတပ်ဖွဲ့ နှင့် ပြည်သူ့ကာကွယ်ရေးတပ်ဖွဲ့ PDF ပူးပေါင်းတပ်ဖွဲ့တို့အကြား စစ်ရေးတင်းမာနေလျက်ရှိသဖြင့် မိဘပြည်သူများအနေဖြင့် တိုက်ပွဲဖြစ်ပွားရာနေရာများနှင့် အနီးတဝိုက်၌ ဖြတ်သန်းသွားလာခြင်း မပြုလုပ်ကြရန် ဇွန်လ ၁၆ ရက်က MBPDF ကသတိပေးထားသည်။
