သျှမ်းပြည် လားရှိုးခရိုင် တန့်ယန်းမြို့နယ်အတွင်း “ဝ” ပြည်သွေးစည်းညီညွှတ်ရေး တပ်မတော် UWSA တံဆိပ်ပါ ဝတ်စုံ ဝတ်ဆင်ပြီး ဓားပြတိုက်သည့် အမျိုးသား လူငယ် (၅) ဦးကို ဒေသခံများက ဝိုင်းဝန်း ဖမ်းဆီးလိုက်ကြောင်း သိရသည်။

ပြီးခဲ့သည့် ဇွန်လ ၁၆ ရက်နေ့တွင် တန့်ယန်းမြို့ အမှတ် (၆) ရပ်ကွက်၊ လုံလိတ်ကျေးရွာအတွင်းသို့ UWSA ဝတ်စုံ ဖြင့် ဓားပြလာတိုက်သည့် အမျိုးသား လူငယ် ၅ ဦးကို ဒေသခံများက ဝိုင်းဝန်းဖမ်းဆီးလိုက်ကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“တစ်ယောက်က ကားပေါ်စောင့်ပြီး ၄ ယောက်က အိမ်ထဲ ဝင်ဓားပြတိုက်တာ၊ သူတို့မှာ ဓားရှည် နဲ့ ပစ္စတိုတွေ ကိုင်ထားကြတယ်။ ပြီးတော့ အိမ်ရှင်ကို ဖမ်းချုပ်ပြီး ငွေတွေကို ဖမ်းထုတ်ခိုင်းတာ၊ တရုတ်ငွေ နဲ့ မြန်မာငွေ စုစုပေါင်း ကျပ်သိန်း ၁၀၀ ကျော်ပေါ့၊ ဒါပေမဲ့ သူတို့ကို အရပ်ထဲက ဝိုင်းဖမ်းနိုင်ခဲ့တယ်” ဟု တန့်ယန်းမြို့နေ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ဓားပြတိုက် လူငယ် ၅ ယောက်ကို ဓားရှည် နှစ်လက်၊ ပစ္စတို သေနတ် တစ်လက်၊ UWSA တံဆိပ်ပါ စစ်စိမ်းရောင် အင်္ကျီတစ်ထည်တို့နှင့် အတူ ဖမ်းဆီးမိခြင်း ဖြစ်ကြောင်း အထက်ပါ အမျိုးသားက ဆက်ပြောသည်။

အဆိုပါ ဓားပြဝင်တိုက်ခံရသည့် လုံလိတ်ကျေးရွာသည် တန့်ယန်းမြို့ပေါ် ရပ်ကွက်အတွင်း ရှိသော်လည်း အိမ်ခြေ ၂၀ ကျော်သာ ရှိနေသည့်အတွက် မြို့စွန်ကျ နေရာဖြစ်ကြောင်းလည်း ဒေသခံများက ဆက်ပြောသည်။

ထို့အပြင် ဓားပြတိုက် လူငယ်အုပ်စုသည် အဖွဲ့လိုက်ရှိနေခြင်းဖြစ်ပြီး အဖွဲ့ဝင် စုစုပေါင်း ၂၀ ဝန်းကျင်နီးပါး ရှိနေကြောင်းလည်း သိရသည်။

“သူတို့က အုပ်စုလိုက် လှုပ်ရှားတာ၊ တစ်အုပ်စုကို ၅ ယောက် ၇ ယောက် အဲ့လိုတွေနဲ့ သွားလာကြတာတဲ့၊ တစ်ဖွဲ့လုံးဆိုရင် စုစုပေါင်း ၂၀ လောက်ရှိတယ်၊ အခုတော့ ၅ ယောက်ဖမ်းထားလိုက်ပြီ၊ ကျန်တဲ့ အဖွဲ့ဝင်တွေ ကိုလည်း လိုက်ဖမ်းမယ်လို့ သိရတယ်” ဟု အထက်ပါ ဒေသခံ အမျိုးသားက သျှမ်းသံတော်ဆင့်ကို ပြောသည်။

လက်ရှိတွင် အဆိုပါ ဓားပြတိုက်သည့် လူငယ် ၅ ဦးကို ဒေသခံများမှ တစ်ဆင့် တန့်ယန်းမြို့နယ် ဒေသတွင်း အာဏာပိုင်များသို့ လွဲပြောင်း ပေးအပ်လိုက်ကြောင်း သိရသည်။

ယင်းကဲ့သို့ UWSA တံဆိပ်ပါ ဝတ်စုံဖြင့် ဓားပြဝင်တိုက်သည့် လူငယ်များကို ဖမ်းဆီးရမိခြင်း နှင့် ပတ်သက်ပြီး UWSA တပ်ဖွဲ့၏ လားရှိုးမြို့ ဆက်ဆံရေးရုံး တာဝန်ခံ ဦးညီရမ်းကို မေးမြန်းရန်အတွက် ဖုန်းဆက်သော်လည်း ဖုန်းလက်ခံ ဖြေကြားခြင်း မရှိပေ။

စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် ပြည်သူများ၏ စီးပွားရေး ကျဆင်းလာပြီး လောင်းကစားဝိုင်းများ၊ ခိုးဆိုးလုယက် ဓားပြတိုက်မှုများလည်း ပေါများလာပြီး ပြည်သူများက လုံခြုံရေး ကင်းမဲ့နေကြောင်းလည်း သိရသည်။