သျှမ်းပြည် သိန္နီမြို့နယ်မှ ကျေးရွာ သူကြီးတစ်ဦးကို တအာင်း (ပလောင်) အမျိုးသား လွတ်မြောက်ရေး တပ်မတော် TNLA တပ်သားများက ဝိုင်းဝန်း ရိုက်နှက်ကြောင်း စုံစမ်းသိရသည်။

ယမန်နေ့ (ဇွန်လ ၁၆) ရက် တွင် သိန္နီမြို့နယ်၊ မိန်းပါးကျေးရွာ အုပ်စု ၊ ဝမ်မိုင် နမ့်ဟူးပွက် (ဝၢၼ်ႈမႂ်ႇ ၼမ့်ႁူးပွတ်း) ကျေးရွာသို့ TNLA တပ်သား ၃ ဦး ဝင်ရောက်လာပြီး တောထွက်လည်ရန် အတွက် လမ်းပြ ရွာသား (၅) ဦးကို တောင်းရာမှစပြီး ရွာသူကြီးကို ရိုက်နှက်လိုက်ခြင်းဖြစ်ကြောင်း ဒေသခံများက သျှမ်းသံတော်ဆင့် ကိုပြောသည်။

“သူတို့ (TNLA) တပ်ဖွဲ့ တောထွက်လည်ဖို့ လမ်းပြရွာသား ၅ ယောက်တောင်းတာ၊ ရွာသူကြီးက ဒီအချိန် အားလုံး နီးပါး လုပ်ငန်းခွင် တောင်ယာ ဝင်နေကြတယ်။ မအားကြလောက်ဘူး ဆိုပြီးပြန်ပြောတော့ မရကောင်းလား ဆိုပြီး သူကြီးကို စကန်လိုက်တာ။ အဲ့နောက် ၃ ယောက်လုံး ဝိုင်းထိုးရိုက်ကြတယ်” ဟု ဖြစ်စဥ်ကို သိရှိသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

TNLA တပ်သားများ၏ ရိုက်နှက်မှုကြောင့် ရွာသူကြီးသည် ဘေးအိမ်သို့ ထွက်ပြေးသွားသော်လည်း လိုက်လံ ထိုးနှက် ရိုက်နှက်မှုများ ဆက်လက်ပြုလုပ်နေသဖြင့် ရွာသားများက TNLA တပ်သားများရှေ့ ဒူးထောက်တောင်းပန်မှ ရိုက်နှက်မှု ရပ်သွားကြောင်းလည်း သိရသည်။

“လက်သီး နဲ့ ထိုးတဲ့သူထိုး၊ ခြေထောက် နဲ့ ကန်တဲ့သူက ကန်နဲ့ သူ့မှာလည်း သွေးတွေ ထွက်နေပြီလေ။ အဲ့ကြောင့် သူတို့ဘေးအိမ်က ဝိုင်းထဲကို ထွက်ပြေးတာ၊ အဲ့အထိ လိုက်ရိုက်ကြတယ်။ ရွာသားတွေက ဆက်ရိုက်နေရင် သူသေတော့မယ်ဆိုပြီး ဝိုင်းဒူးထောက် တောင်းပန်မှ ရိုက်တာ ရပ်သွားတယ်” ဟု အထက်ပါ အမျိုးသားက သျှမ်းသံတော်ဆင့်ကို ဆက်ပြောသည် ။

TNLA တပ်သားများ ရိုက်နှက်ပြီး ရွာမှ ပြန်ထွက်သွားသည့် အချိန်တွင် M 22 သေနတ်အမျိုးအစားကို အချက်ပေါင်းများစွာ ပစ်ခတ်သွားကြောင်းလည်း ဒေသခံများထံမှ သိရသည်။

ယင်းကဲ့သို့ ရိုက်နှက်မှု အပြီး ည ၁၁ နာရီဝန်းကျင် အချိန်တွင် TNLA တပ်သားများက ဝမ်မိုင်နမ့်ဟူးပွက် (ဝၢၼ်ႈမႂ်ႇ ၼမ့်ႁူးပွတ်း) ကျေးရွာ အတွင်းသို့ ထပ်မံရောက်ရှိလာပြီး ရွာသူကြီးကို ၎င်းတို့ တပ်စခန်းဆီ ခေါ်ဆောင်သွားကြောင်း အထက်ပါ ပုဂ္ဂိုလ်က ဆက်ပြောသည်။

“ခုနက ရိုက်တဲ့ ၃ ယောက်နဲ့ နောက်ထပ် TNLA တပ်သား နှစ်ယောက်လာတယ်၊ ဒီကိစ္စမှာ ရွာလူကြီး ကျေနပ်လား တဲ့၊ မကျေနပ်ရင် သူတို့နဲ့ အတူ စခန်းကို လိုက်ခဲ့လို့ ပြောတယ်။ ရွာလူကြီးကလည်း အခုချိန်က အရမ်းနာနေလို့ ဘယ်မှ မလိုက်နိုင်သေးဘူး ဆိုပြီးပြန်ပြောတော့ သူတို့လည်း ပြန်သွားတယ်” ဟု ၎င်းကဆိုသည်။

ရိုက်နှက်ခံရသည့် ရွာသူကြီးသည် လုံးဖုန်း ဟု အမည်ရှိပြီး အသက် ၄၃ နှစ် ဝန်းကျင်ဖြစ်ကြောင်းလည်း သိရသည်။

ထို့အပြင် ရိုက်နှက်ခံထားရသည့် ဒဏ်ရာများကြောင့် ရွာသူကြီး လုံးဖုန်းသည် ညာဘက်မျက်လုံး ဖွင့်မရ၊ ခေါင်းကွဲဒဏ်ရာ၊ ရင်ဘတ်ညိုမဲဒဏ်ရာ နှင့် အောင့်နေခြင်းနှင့် ခြေလက် နှစ်ဖက်လည်း ထိခိုက်ဒဏ်ရာများ ရသွားကြောင်းသိရသည်။

ယင်းကဲ့သို့ ကိစ္စဖြစ်စဥ်နှင့် ပတ်သက်ပြီး မေးမြန်း သိရှိနိုင်ရန် အတွက် တအာင်း (ပလောင်) အမျိုးသား လွတ်မြောက်ရေး တပ်မတော် TNLA ၏ ပြန်ကြားရေး ဆက်ဆံရေးရုံးမှ ပြောရေးဆိုခွင့်ထံသို့ ဖုန်းဆက်သွယ်သော်လည်း ဖုန်းလက်ခံ ဖြေကြားခြင်းမရှိပေ။