သျှမ်းပြည် မိုးဗြဲမြို့တွင် တိုက်ပွဲဆက်လက်ဖြစ်ပွားသည့်ကြားထဲ စစ်ကောင်စီမှ အပြစ်မဲ့ ပြည်သူကို လက်နက်ကြီး၊ လက်နက်ငယ်ဖြင့် ပစ်မှတ်ထားပြီး တိုက်ခိုက်လာသောကြောင့် ပြည်သူ ၁ ဦး သေဆုံးပြီး ၂ ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။
ယမန်နေ့ ဇွန် ၁၄ ရက် နေ့လည်ပိုင်း အချိန်တွင် မိုးဗြဲမြို့ တိုက်ပွဲဆက်လက်ဖြစ်ပွားသည့်ကြားထဲ နေရပ်ပြန်သွားသည့် လင်မယား ၂ ဦးကို စစ်ကောင်စီမှ ပစ်ခတ်ခဲ့ရာ အမျိုးသား ၁ ဦး သေဆုံးပြီး ကျန်အမျိုးသမီးတစ်ဦး ထွက်ပြေးလွှတ်မြောက်နိုင်ခဲ့ကြောင်း MBPDF မှ ယနေ့ ဇွန်လ ၁၅ ရက်တွင် ထုတ်ပြန်ထားသည်။
“လင်မယား နှစ်ယောက်က နေရပ်ပြန်ပြီး ရိက္ခာပြန်ယူတာ။ ပြန်သွားတုန်း သူ့ယောင်္ကျားကို စစ်တပ်မှ သေနတ်နဲ့ ပစ်လိုက်တာ။ အဲ့မှာပဲ ပွဲချင်းပြီး သွားတယ်။ သူ့မိန်းမတော့ ပြန်လွတ်လာခဲ့တယ် “ ဟု မိုးဗြဲမြို့ သတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။
အလားတူ ည ၉ နာရီအချိန်တွင် မိုးဗြဲအနောက်ဖက်ခြမ်းရှိ စစ်ဘေးရှောင်စခန်းတစ်ခုကို စစ်ကောင်စီမှ တာဝေးပစ် (အဝေးပစ်) လက်နက်ကြီးဖြင့် အကြိမ် ၁၅ ကြိမ်ထက်မနည်း တစ်ဖက်သတ် ပစ်ခတ်ခဲ့သောကြောင့် စစ်ရှောင် ပြည်သူ ၂ ဦး ထိခိုက်ဒဏ်ရာရသလို နေအိမ် အဆောက်အဦးများ ပျက်စီးသွားခဲ့ကြောင်း ရေးသားဖော်ပြထားသည်။
ထိုသို့ စစ်ရှောင်စခန်းကို တစ်ဖက်သတ် လက်နက်ကြီးဖြင့် ပစ်ခတ်ခဲ့ပြီးနောက် ယနေ့ ဇွန်လ ၁၅ ရက် နံနက် ၂ နာရီဝန်းကျင်တွင် မိုးဗြဲအနောက်ဖက်ခြမ်းကို ထပ်မံပြီး လေယာဉ်ဖြင့် လာရောက် ဗုံးကြဲချ ခဲ့ကြောင်း ဆိုသည်။
လက်ရှိ မိုးဗြဲမြို့မှာ စစ်ကောင်စီ နှင့် ပြည်သူ့ကာကွယ်ရေး PDF ပူးပေါင်းတပ်ဖွဲ့တို့အကြား စစ်ရေးအခြေအနေ တင်းမာနေလျက်ရှိသောကြောင့် စစ်ရှောင်အပါအဝင် ပြည်သူများအနေဖြင့် နေရပ်ပြန်ခြင်း မပြုလုပ်ကြရန် MBPDFမှ ထပ်မံ သတိပေးထားသည်။
